[校園][應該純愛][友情]「我想要你，仲有你既世界。」: 苦戰

第一日就係考數學，仆街。 

乜撚野sin cos tan全部唔識。 

磨死個part A算。 

唉，出師不利。 

小息個陣我地幾個圍埋傾計，大家都表示數學已經陣亡。 



到卷二MC個陣，我已經放棄左思考，見到邊個答案合眼緣就填果個。 

第一日考試冇X科，所以成個Form5都係一齊放學。 

我一放學就狗沖去接Cherry，一跑到落去就見到B班放學。 

Cherry岩岩係班房行出黎，見到我就好開心咁衝上黎。 

Cherry冇戴戒指，因為校規唔俾。 



Cherry：「今次數學好易啊，我識好多啊！ 」 

真係咁易咩？我地做既究竟係咪同一份卷？ 

我：「係咩？我好多都唔識喎… 」 

Cherry：「叫左你溫書你肯定走左去打LOL啦？ 」 

我：「嘻嘻… 」 



Cherry：「唔理呀，你今次考試除左數學一定要全部合格呀！」 

我：「有d難度喎老闆…」 

Cherry：「咁好啦，我上你屋企陪你溫書！ 」 

我又再一次俾佢既發言所震懾。 

一出校門，有少少凍，我就係袋入面拎返頸巾出黎戴。 

Cherry：「記得戴頸巾，算你啦！ 」 

我：「咁你係咪可以唔洗上黎陪我溫書？ 」 

Cherry：「唔得呀！我唔係度你肯定唔會溫書！ 」 



唉，算啦走唔甩架啦。 

係呢個時候，有架車響安。 

係一架黑色七人車。 

有個男人落左車，行過黎我呢邊。 

男：「我黎接你啦，芷睛。」 

佢搵Cherry？佢係邊個？ 

Cherry：「嗯，咁lulu咁我四點左右上你度啦，一陣見。」 



Cherry就係咁跟左個男人走。 

個男人一聽到Cherry叫我做lulu望左我一眼，再轉身離開。 

佢既眼神我到今日仲記得好清楚。 

係一個憐憫弱者既眼神。 

我好討厭呢個眼神。

我自己返左屋企，個腦全部都係果個男人既眼神。 

佢可憐緊我？我有乜野要佢可憐我？ 

真係恨不得撕開佢兩邊。 



我望望個鐘，差唔多四點，Cherry應該就到，拎定堆通識筆記出黎先。 

不過佢真係會黎咩？ 

唉，算啦唔好諗太多，自己溫住先啦。 

溫左一陣「全球化」之後，我聽到開門聲。 

美星條友今日咁早返既。 

但原來開門既唔係美星，而係Cherry。 

我：「點解你會有我屋企鎖匙架？ 」 



Cherry：「嘻，上次元旦家姐俾我既，仲叫我多D上黎玩。咦，好乖喎自動自覺溫書。 」 

嘖，美星條友同Cherry既關係幾時變到咁好。 

Cherry：「家姐仲叫我地專心溫書，佢會買埋野食返黎比我地。」 

究竟美星係佢家姐定係我家姐，我開始分唔到。 

溫書對我黎講簡直就係一個地獄，而Cherry就係我既天使。 

但有冇人可以話我知點解天使係都要推我落地獄？ 

溫到七點幾，苦戰左一輪終於都叫做溫完，美星都帶住盒Pizzahut返左黎。 

我望住D pizza，第一反應唔係想食，而係諗起通識野。 

外國飲食文化如何衝擊傳統中華文化？ 

香港的多元文化能在哪些方面體現？ 

救命，想死。 

食完pizza之後，Cherry禁左兩下電話，再係袋度拎左疊notes出黎。 

Cherry：「嗱，呢D係中英文既notes，我聽日上黎同你溫呢d。」 

我：「但係你後日唔係要考物理咩？」 

Cherry：「我聽日會帶埋上黎溫，唔洗擔心我，我要走啦。」 

我：「我送你。」 

落到樓，Cherry唔係行去地鐵站方向，而係行去停車場方向。 

果個男人應該係度。 

果然，行左五分鐘，我見到今朝個架黑色七人車。 

Cherry：「我走啦，聽日見啦，記得早d訓，抖足精神。」 

我：「聽日你會唔會係樓下等我？」 

Cherry：「梗係會啦傻佬。」 

佢講完就上左架黑色七人車走左。 

我返番上樓，執番好張枱，順手睇下Cherry俾我既notes。 

一望，全部都係手寫字。 

傻瓜。 

睇黎今次考試要俾D心機先得。