[校園][應該純愛][友情]「我想要你，仲有你既世界。」: 多疑

第二朝我好早就起左身，換好哂衫再溫左陣書。 

到差唔多時間，我就落左樓。 

每日最期待既畫面出現了，Cherry真係係度等緊我。 

Cherry：「尋晚訓得好唔好啊？」 

我：「梗係唔好啦，掛住你嘛。 」 



Cherry：「口花花，行啦。」 

一路返學Cherry都不停問我通識野，好彩我仲記得。 

我有諗過問尋日個男人係邊個，但我唔想影響我考試心情，所以決定唔問住。 

等今日考完先問。 

可能因為尋晚惡補左幾個鐘，份通識卷我覺得幾易做，冇停過手咁密密寫。 



我今日又冇X科考，所以考完通識就走得。 

原本打算偷偷地飛返屋企訓陣先，點知Cherry已經係學校門口捕住我，捉左我返去。 

我：「聽日考中文卷一，二，邊有得溫啊老闆。」 

Cherry：「咩都話冇得溫，你次次都係咁講！寫作手法都大把野比你溫啦。」 

講到好似留意左我好耐咁，算啦我唔夠佢鬥架啦，我認命啦。 



我又過左個地獄般既下午，不過今日冇㝷日咁Chur，因為Cherry要溫物理。 

係佢旁邊睇佢溫書都幾過癮。 

溫到四點幾，我有少少肚餓，所以係問準左Cherry之後落街買大家樂tea。 

當然，有買埋Cherry果份啦，佢咁大食一個餐都唔知夠唔夠食添呀。 

返到上去，我就叫Cherry唔好溫住食完野先。 

佢一見到有野食就推哂堆書埋一邊，開始大吃大喝。 

見佢冇咁緊張，我就借D依咁問佢。 

我：「尋日個男人…邊個黎架？」 



Cherry：「唔？男人？哦，果個。佢係我阿哥啊。」 

阿哥？個男人目測有廿幾歲喎？ 

咦唔係喎，阿哥廿幾歲都唔出奇啫。 

我：「好少聽你提起你阿哥喎？佢搵你做乜？」 

Cherry：「無謂人唔提都罷，尋日佢都係因為我Daddy叫佢車我去整護照佢先出現咋嘛。」 

呼，睇黎係我太多心。 

但係，果個好似可憐我既眼神，又係咩事？