[校園][應該純愛][友情]「我想要你，仲有你既世界。」: 交易

「佢應該同我講笑啫。」 

我既superego咁同我講。 

「有乜所謂啫，多個女朋友唔好咩？」 

今次輪到id。 

平衡兩方既意見之後，我作出左一個決定。 



維持現狀。 

咁做應該係最好既。 

另一方面，我都開始係度諗我到底有咩吸引力。 

結論當係冇啦。 

過多幾日，考試就結束了。 



我終於脫離左Cherry既溫習班地獄。 

緊接而黎既，當然就係派卷。 

今次派卷我真係特別緊張，因為係第一次溫好書咁去考，好希望有好成績。 

同時亦都係想對Cherry既付出負返責任。 

幸好，主科既成績都唔錯，就連數學都岩岩好合格。 



通識我仲緊隨晨哥其後，拎到全班第二。 

總算叫做有個交代啦。 

不過最唔想發生既事都發生左。 

雖然我歷史今次拎第二，但計總成績我都係第一，所以我要拎學科獎。 

Cherry一聽到我有獎拎就好開心。 

Cherry：「多謝我啦，唔係我陪你溫書你點會有獎拎？」 

咁多謝啊老闆，但我真係唔想拎獎…. 

我：「咁不如我送左個獎狀比你？」 



Cherry：「真係架？」 

我：「嗯，你鐘意就得。」 

就係咁，我係周會就頂硬上，係三百幾四百人面前上台拎獎。 

上台果刻，我聽到唔少人對我指手刻腳。 

「喂，就係佢吖，同Cherry一齊個個呀。」 

「點睇都係毒撚一個啫。」 

「唔係喎，聽人講佢用手段搞左Form5班MK仔一鑊喎。」 



我就估到會係咁。 

但世俗既眼光我已經唔會再理。 

之後既小息，我托若睛將我份獎狀放係Cherry櫃桶。 

我暫時想自己靜下。 

所以我走左上空中花園玩自閉。 

但晨哥走左黎搵我。 

晨哥：「恭喜你拎獎喎，而家你出哂名，下星期閃避球預埋你啦。」 

我：「唔好搞我啦晨哥。」 



晨哥：「哈，不如咁啦，同你做個交易，你肯出場既話，我講一個關於Cherry既秘密你知吖？」 

Cherry既秘密?