[校園][應該純愛][友情]「我想要你，仲有你既世界。」: 光影

考試期間，Cherry幾乎每日都有上黎我屋企陪我溫書。 

但佢有時會因為考試時間唔一樣而唔上黎。 

今日考既係中文說話，大家都唔同時間考。 

我非常好彩，排左係好早既組考。 

而Cherry就要等一陣先有得考。 



所以我話佢知我會自己返屋企先，叫佢一放學就call我，我地一齊食lunch。 

即係代表我考完就會有一段自由時間。 

終於可以去一趟久違了既信和。 

考左D咩題目？我唔知道喎。 

我只係知道我終於有機會去信和！ 



一踏出班房門口，我就準備使出惡魔蝙蝠幽靈直奔信和。 

正當我就行到樓梯口個陣，見到一個人係其中一個考場行出黎。 

林穎欣。 

原來佢都咁早考。 

佢好快都留意到我，仲用手勢示意我過去。 



反正落去既路得一條，算啦跟佢走啦。 

落到地下，我打算就此分別，但又俾佢叫住。 

林：「有冇時間同我去飲杯野呀？反正你都要等佢。」 

我：「你又知我會等佢？」 

林：「係你既話，一定會。」 

唔好講到好了解我啦好嗎？我都唔了解我自己，其他人又點會了解我。 

但我都係同左佢去飲野。 

我冇辦法拒絕佢。 



我一望到佢雙眼就非常內疚，好似對佢有所負欠咁。 

明明好想避開佢，卻又總係避唔開。 

最後我跟佢去左STARBUCKS，大家各自叫左杯野飲。 

林：「同佢一齊，玩得開唔開心？」 

我冇諗過佢一黎就咁問。 

我：「雖然有時佢逼我溫書係有少少辛苦，但同佢一齊成日都會有笑位，好開心。」 

林：「係咩，咁就好。」 



佢既語氣就好似係我既EX咁。 

大家都DEADAIR左一陣，我決定轉移下話題。 

我：「考試識唔識？」 

林：「咪又係咁，我都唔Care。」 

喂大佬你咁答叫我點傾落去呀。 

正當我苦惱緊點傾落去果陣，電話就響，係Cherry打黎。 

Cherry：「喂傻佬我考完啦，你係邊呀我黎搵你吖。」 

我：「咁十分鐘後商場等啦。」 



Cherry：「好吖一陣見啦。」 

我收左線之後先發現林穎欣一直望住我，有點尷尬。 

林：「你變左好多，魯路修。」 

吓？ 

林：「以前既你，點叫都唔會溫書，但佢竟然咁簡單就叫得郁你溫書。」 

林：「對你而言，佢就係引導你既光。」 

如果係指Cherry既話，都冇錯既，Cherry一直都帶住我行每一步。 



林：「但你唔好只顧追尋光，都要注意身邊既事，唔係既話會跌得好痛。」 

完全聽唔明。 

佢突然企起身，走向我身邊，細細聲同我講： 

「覺得有咩唔開心記得搵我，我好樂意做你既影聽你傾訴，我會一直等你。」 

我：「eh….」 

林：「叫我Ada啦，係咁先啦，你都要去搵佢架啦。」 

咁又何苦呢…