過多左幾日,就開始左新年假。 

Cherry都未返大陸既,不過佢話要做好堆功課先,所以冇同我出去玩。 

我呢排都只係同佢whatsapp傾計,得閒互相sd下相咁。 

不過咁都好,我怕日日見會厭。 

係佢厭我。 





我呢種deadline fighter又點會咁快做功課吖,梗係打機啦。 

我同師父佢地成班幾乎每日都係召喚峽谷。 

Jason:「屌你識唔識GANK架仆街。 」 

我:「師父你咁唔得喎,叫你家姐代你啦。」 

肥豬:「Agree,交你家姐出黎啦契弟。」 





師父:「收皮啦,你地配合唔到我咋。 」 

我:「屌,睇我波比神操作啦。」 

我用當時仲未改既甜點精靈波比,一個人開大技衝入敵陣。 

只係一陣,系統已經響起: 

「quadra kill!」 





但並未有PENTA KILL。 

師父用拉姆斯反甲反死左對面隻ADC。 

我:「屌你! 」 

師父:「關我撚事咩佢係都要打我。 」 

就係咁,我失落左Penta kill。 

失落左Penta kill之後我都冇乜心機玩落去,退下左火缐走出廳。 

一出到廳就見到美星佢著緊鞋。 

我:「喂你去邊。」 





美星:「唔?打完機嗱?我出去同老豆老母佢地食飯啊,你join?」 

又好啫,反正肚餓。 

我地四個去左食和民,叫左個set餐。 

爸:「咦,三個月無見又唔同左喎乖仔,拍拖係唔同D。」 

嘖,呢條友認真麻煩,肯定係啊媽話佢知。 

我:「聽過茶杯弒父未?」 

爸:「未喎哈哈。」 





我:「你想做第一個?」 

媽:「魯路修!」 

吵吵鬧鬧咁又一餐。 

臨分開前老豆叫左我埋一邊,美星就同啊媽行街。 

爸:「喂魯路修。」 

我:「屌,又點呀。」 

爸:「注意一下你既態度,我而家係認真。」 

我第一次係佢身上感覺到壓迫感,同認真Mode既晨哥同level? 





唔係,係晨哥以上。 

我:「咁咩事呢?」 

我無意識咁插袋,可能因為我驚。 

爸:「而家中五,即係下年DSE?」 

我:「係吖。」 

冇諗過會去到呢個話題,睇黎佢都係想叫我努力讀書。 

爸:「有得玩,好玩盡佢啦,拍拖都係。」 





我:「吓?」 

爸:「成績並唔係一切,對我黎講,最重要既,係你兩個做個好人,過得開心,咁就夠。」 

我:「唔似你作風喎。」 

爸:「我都覺,我最想同你講既係,珍惜你既人生,唔好錯過任何一刻。」 

「畢竟,呢一秒對於下一秒黎講都已經係過去,無法挽回,無法改變了。」 

我完全冇諗過呢D說話會出自呢個人把口。

爸:「七號果晚試下約埋你女朋友出黎啦,我都想睇下係咩人改變左自己個仔咁多。」 

而家咁樣望住佢,第一次覺得佢有「父親」既感覺。