「吓好似唔係幾好喎,我黎你地屋企既團年飯…」 

「係我老豆話想見你啫,不過你唔想就算啦,冇乜所謂架。」 

「咁我黎啦,反正我八號先返大陸。」 

其實我冇諗過Cherry會應承,不過都好,又可以見到佢。 

我講左個時間比佢,到時我會去接佢。 





估唔到拍拖五個月就帶人去見父母,我仲係個中學生咋。 

不過就算要我而家揀結婚對象,都一定係Cherry。 

佢就係我既一切。 

只係唔知佢係咪咁諗。 

話咁快就到七號,我照約定去Cherry屋企樓下接佢。 





因為天氣都比較凍,我都叫Cherry著多D衫。 

結果佢都只係著左件白色冷衫同藍色長裙。 

我:「你唔凍架?」 

Cherry:「唔?唔凍呀,行啦我地。」 

痴線,咩構造。 





Cherry:「你呢件漁夫䄛著得幾好睇喎。」 

無錯,我而家係著緊漁夫褸。 

同佢手拖手行係街上面引黎唔少阿叔同MK仔既目光。 

對於佢地,我會以勝利者既姿態自居,優越感爆棚。 

但若然遇上同我相似既人既目光,我會報以一個鼓勵既眼神。 

希望佢地可以好快就遇上屬於佢地既Cherry。 

一去到酒樓,我成個人呆左係度。屌你成四圍枱!? 

雖然我知會有唔少親戚食啫,都唔係成四圍枱咁撚誇張呀? 





一時之間我都搵唔到我屋企人係邊,好彩有Cherry提下我。 

美星一個人企係一邊自己玩電話,所以Cherry好快搵到佢。 

我:「喂,也太誇張了吧?」 

美星:「黎左嗱?嘩阿妹你今日好靚喎。」 

Cherry:「多謝家姐,你都係。」 

呢兩個人完全無視左我。 

老豆係呢個時候都拎住支雪碧過黎。 





父:「黎左嗱乖仔。」 

我:「係吖,等我介紹下,佢係芷晴。」 

Cherry:「Uncle你好。」 

父:「唔好叫我Uncle,叫到我老哂,叫我哥哥得嗱,哈哈哈。」 

Cherry好似唔知點做,我要幫佢解圍。 

我:「喂,我地坐邊。」 

父:「係喎係喎,我地坐最入果張檯,去坐低先啦,就齊人。」 

唔係嘛,咁都未齊人? 





我,美星同Cherry三個就行左埋去坐低,我坐佢兩個中間。 

同檯既仲有二叔一家五口,二叔見我帶左個女仔黎就開始講野。 

二叔:「厲害喎魯路修,有個咁靚既女朋友仔。」 

我同Cherry即刻紅都面哂。 

聽二叔9up左一輪之後,老豆老母佢地都返左黎坐,話要上菜了。 

老母一見到Cherry就開始起勢咁問野,我好緊張,好怕問到一D敏感野。

好彩大部分問題都係一般野,但係有一個問題令我好在意。 






母:「點解你揀我個仔既?」 

我都有D想知答案。