母:「點解你揀我個仔既?」 

呢個問題由最初開始已經係我心入面,到而家我都未能得到答案。 

因為Cherry之前反問過係咪一定要理由令我卻步唔敢再問。 

估唔到,呢個問題會由我阿媽問。 

阿媽,我愛你。 





而家就睇Cherry點答。 

我見佢深呼吸左一下。 

Cherry:「伯母,其實你個仔有好多優點,只係可能佢自己注意唔到。」 

母:「哦?例如呢?」 

Cherry:「有一次落好大雨,佢見到有兩個低form男仔冇遮走唔到,明明三唔識七都肯借把遮比人,寧願自己用塊紙皮。」 





嘩,呢件事兩年前架喎。 

Cherry:「仲有每次有朋友要幫手佢總係第一個行出黎,從來唔問原因。」 

Cherry:「佢好關心人,唔計較付出幾多,心地又好,其實好完美。」 

「有時又會傻下傻下咁,我就係因為咁俾佢吸引到。」 

HOLY SHIT我想喊。 





母:「你唔講我都唔知我個仔咁好添。 」 

Cherry:「係架,佢而家只係差少少自信,所以我好想同佢一齊,扶佢一把。 」 

母:「魯路修你聽到啦,好好地對人呀! 」 

咁樣拋個波比我? 

我:「YES YOUR MAJESTY。 」 

原來我有咁多優點吸引到Cherry,不禁自high 。 

但最令我驚訝既係,原來佢一直都留意住我。 

究竟佢由幾時開始留意我? 





之後既圑年飯,離不開都係親戚互相問候,老一輩鬥劈酒咁。 

Cherry就一直同美星仲有我老母傾計,變到我先係外人咁。 

但係我好開心。 

食到九點幾,我就話送Cherry走先,因為佢第朝要早起身。 

母,美星:「吓,要走嗱?」 

我:「人地聽日要早起身呀,想見既下次再約食飯啦。」 

Cherry:「Sorry啊,各位玩得開心D啦,Bye Bye。 」 





講完我就同Cherry走。 

一出門口,有個女仔向我地迎面行黎。 

女:「哦?好耐冇見喎,魯路修。」 

邊個黎? 

我:「Sorry,我而家有D趕時間,有機會再傾。」

行到落街,Cherry又拖住我行去地鐵站。 


Cherry:「岩岩個女仔都係你親戚?好靚喎。 」 

我:「eh…我冇乜印象。 」 





Cherry:「傻佬。」 

我:「但係你鐘意喎。 」 

Cherry:「巴閉啦你,係你父母面前先咁講咋。 」 

我:「即係頭先果d係假架? 」 

Cherry:「你話咩咪咩囉,最緊要你開心。 」 

佢又將問題交番比我。 

好快我地就行到去地鐵站,佢話唔洗再送。 





我:「返到去Whatsapp我啦。」 

Cherry:「知啦傻佬,快D返去啦。 」 

我笑左一笑,轉身準備走,點知佢從後攬住我。 

Cherry:「記住,你係最好架。」 

我:「你都係。」 

係我眼中,你直頭係完美。 

我個心好暖。