雨並冇減弱既跡象,反而仲愈落愈大。 

我地就on99咁坐係看台等,好彩晨哥有啤牌,我地先冇咁悶。 

Jason:「我諗今日都應該要腰斬了,賽道已經唔適合跑。」 

晨哥:「應該就快宣佈架啦,唉唔玩了收野啦。」 

我:「腰斬既話仲上唔上我度?」 





晨哥:「梗係上啦屌!你屋企又唔係露天有乜關係。」 

我:「問下啫,唔洗咁激動既,今晚有邊個?」 

晨哥:「我地六個啦,若睛啦,明慧啦,十四啦,仲有阿欣囉。」 

我:「嘩,咁計埋Cherry同我家姐咪成十二個人?」 

晨哥:「party就係要多人先好玩架嘛傻。」 





算啦,一次半次由佢啦。 

不出晨哥所料,四點半學校宣佈今日到此為止,未舉行既比賽下星期決賽日繼續。 

我地一行十個人係運動場門口集合,唯獨Cherry企埋一邊唔過黎。 

我:「做乜呀你?」 

Cherry:「我黎好似唔係咁好…全部都係你果班…」 





我:「佢地都唔介意,黎啦有野食喎。」 

Cherry好似仲猶豫緊咁。 

晨哥:「仲諗咩啊芷睛,一齊玩啦!~」 

再加上其他女仔既遊說,Cherry終於唔扭計,肯黎了。 

十一個人,一齊去買料既話都幾麻煩,所以我諗住叫堆女仔上去先,免得佢地阻住。 

但係用咩理由好? 

係喎,阿欣隻腳傷左,就用呢個理由啦。 

我:「喂晨哥,阿欣隻腳傷左唔好俾佢行街市啦,不如叫佢地上我度先?」 





晨哥:「魯路修你真細心,就咁做啦。」 

計劃通。 

我急急腳走去同Cherry講,叫佢帶其他女仔上去先,順手叫美星執好間屋先。 

講完我就join番晨哥佢地,發現佢地用好奇怪既目光望住我。 

我:「咩事?」 

Jason:「你唔帶佢地上去既?佢地有人知你住邊咩?」 

Shit,一時大意了,唔記得Jason佢地唔知Cherry上過我屋企添。





我:「無,我岩岩叫左我家姐係屋企樓下接佢地啦。」 


虧我可以臉不改容咁講大話。 

其他人聽完「哦」左一聲就算,唯獨晨哥係後面偷笑。 

屌。 

我地幾個男仔係街市好快咁掃左好多野,有肉有丸又有海鮮。 

晨哥:「想食乜就買!錢我有!最緊要開心!」 

最鐘意呢D咁豪爽既朋友。 

七個男仔拎住一袋二袋行出街市,浩浩蕩蕩咁向我屋企進發。 





係屋企樓下等LIFT個陣,佢地開始講起美星。 

肥豬:「唔知lulu家姐正唔正呢?」 

Jason:「正都唔關你事啦毒撚。」 

師父:「笑什麼畜生,你也是毒撚。」 

我:「我只講一句,我家姐正過師父家姐。」 

成班人聽到都「wow~」。 

師父:「好難正唔過喎,我家姐咁醜。」 





晨哥:「唔係吖,Kenny你家姐都幾靚吖~」 

圍繞「家姐」既話題去到我屋企門口都未結束。 

正當我想拎鎖匙出黎,我聽到屋入面好嘈。 

我行近鐵閘拉一拉,發現根本冇鎖。 

我好似D美軍咁用手勢示意其他人跟係我背後,準備入屋。 

我輕輕推開木門,偷偷視察入面究竟咩情況。 

結果係咩都睇唔到,只係得震耳欲聾既笑聲。 

晨哥:「屌,你屋企黎架嘛,鬼鬼祟祟做乜,入去啦。」 

晨哥一手推開道門。 

入面既情況完全超出我所料。 

一班女人係度打機,仲打到七情上面,幾乎揸碎我既PS3手制。 

「呢班…男人黎架?」 

我地七個男仔異口同聲咁講。

我:「喂,細聲少少啦,出面都聽到你地D笑聲啦。
 」 

美星:「唷返黎啦lulu?我有好好招呼你D朋友架~ 」 

嘩,屌你咩家姐,知有人上黎就執到正一正,白tee加黑色長裙。 

我:「哦,我都見到,喂,呢個我家姐,美星。」 

美星:「Halo大家好~ 」 

屌,咩語氣,扮哂溫柔咁,邪惡的傢伙。 

全男:「家姐你好! 」 

唔,唔知有幾多個已經俾佢收左做兵呢? 

Cherry同若睛冇打機,坐埋左係一邊,見到我地拎住一袋二袋即刻黎幫手。 

其餘果兩個,仍然忘我咁打緊「火影」。 

我,十四,Cherry仲有若睛係廚房洗野,準備打邊爐D野,其他人就打機。 

Cherry:「哇,好多野食咁喎。 」 

我:「係吖,食三日都得。 」, 

十四:「妖,我地咁多人,三個鐘就食哂啦,你地出去啦,呢度我搞掂。 」 

十四開始洗手,睇黎佢好想趁呢個機會大展身手。 

但係今日打邊爐咋喎。  

就係咁,我地三個被十四趕左出廚房,只好坐係廳度睇佢地打火影。 

喂,唔係嘛?阿欣打機打贏左師父? 

師父:「WHAT THE FUCK? 」 

阿欣:「廢左少少喎同學。」 

師父輸左比個女仔令我地男子組大受打撃,大家都挑戰阿欣,試圖幫師父報仇。 

師父:「幫我報牛啊徒弟們。 」 

阿欣:「呵,無任歡迎,喂魯路修呢隻game叫咩名,幾好玩。」 

師父竟然輸比一個連火影都唔識既女仔… 

之後我地逐個逐個挑佢機,但冇人成功,個個都慘敗。 

晨哥係我地剩低唯一既希望。 

肥豬:「你係人類唯一既希望呀晨哥,上啦! 」 

晨哥:「比你見識下「黃色閃光」既實力啦阿欣。」 

阿欣:「少廢話,黎啦阿晨。」 

就係咁,電視準備上演四代火影對宇智波班既大戰。