[校園][應該純愛][友情]「我想要你，仲有你既世界。」: 下雨

「上我度打邊爐？我要問下我家姐先喎。」
 
晨哥：「咁你lunch time後覆我啦，我而家去跳遠個邊。」
 
佢講完就走左去，我又on99咁返去鐵餅個邊，原來已經去到男甲預賽。
 
肥豬：「快D過黎幫手啦企係度望。」
 
我：「嘩，乜甲組咁多人報鐵餅架咩。」
 


Jason：「夠hea呀嘛。」
 
我又開始投入工作。
 
成個上晝都留左係草地睇班契弟9掟，又幾過癮。
 
之後就到lunch time，工作人員可以走先，爽。
 
正當我地三個行出運動場，準備去搵野食之際，晨哥又唔知係邊度彈出黎。
 


晨哥：「喂食乜好呀手足。」
 
我：「喂點解你咁快出到黎。」
 
晨哥：「我去左工作人員個邊坐囉，點呀食乜啊。」

Jason：「吉野家囉，有學生餐。」
 
肥豬：「好主意，帶路啦魯路修。」
 


我地就係咁去左最近既吉野家，霸左張6人枱。
 
師父同Aaron過多五分鐘都會合左我地，六條友係吉野家大吵大鬧。
 
師父：「今年啦啦隊冠軍一定又係我地個社，有我唔會輸。」
 
我：「得啦得啦知你勁啦，今朝男甲鐵餅真係勁好笑，勁多人foul。」
 
Aaron：「屌你啦，我掟完唔小心行左出去就被人foul左。」
 
Jason：「咁係你on9，唔怪得人喎。」
 
晨哥：「喂魯路修你打左電話未呀。」
 
我：「係喎冇左回事添，而家打。」


 
Jason：「問乜？」
 
晨哥：「冇，我諗住今晚上魯路修屋企打邊爐兼開party啫，有冇人有興趣？」
 
Aaron：「圍爐取䁔我岩喎，預我！」
 
我：「等我打埋個電話先啦。」
 
我拎出電話，打俾美星。
 
我：「喂，起左身未。」
 
美星：「未起身點聽你電話呀，用下腦啦細佬，咩事呀？」
 


我：「我班朋友話今晚想上黎打邊爐喎，得唔得？」
 
呢個時候我發現佢地五個全部望住我，等我答案。
 
美星：「得既…」
 
搞掂，我向佢地舉起隻手指公。
 
「如果請埋我食咪俾你地黎囉。」
 
屌…又想痴飲痴食。
 
我向晨哥佢地講番之後，佢地都話ok，話反正冇見過我家姐。
 
希望佢地見完唔會後悔啦。


 
Lunch之後我地又開始工作，而家係女甲鐵餅，大部分人我都識。
 
個個都叫我地計距離計鬆手D，屌，同你有親咩八婆。
 
下晝我認為重頭戲都係班接，你班港女快快手掟完俾我去睇啦唔該。
 
睇佢地掟左一輪之後，我都開始有少少悶，但肥豬好似仲睇得冿冿有味。
 
我行埋一邊禁電話，第一時間就想搵Cherry。
 
不如叫佢今晚上黎一齊食？
 
都係問下Jason先，帶女朋友去聚會好似唔係咁好。
 


正當我轉身準備去搵Jason個陣，發現電話mon上有水。
 
我抬頭望天，原來開始落雨。
 
個天明剃鳩校長眼眉。
 
一場雨令運動場陷入一片混亂。
 
唔少人都即時跑去有蓋既地方，工友都開始搬出一個又一個帳篷出黎。
 
起初徑賽項目都冇受影響，但雨越來越大，開始有人仆街，學校只好暫停。
 
我呢邊因為都只係差少少就完成鐵餅項目，所以老師們決定繼續。
 
Miss A：「大家快少少啦~搞掂一齊返看台~」
 
Miss B：「後生細仔淋下雨無事既。」
 
屌，你兩個企係個帳篷入面梗係咁講啦，難為我地咋。
 
我插住個袋準備頂硬上之際，發現衫袋有野。
 
係喎，我有Cherry俾我既雨䄛。
 
我拆開其中一包雨䄛，即刻著上身，再笠返頂安全帽跑出草地。
 
肥豬：「喂點解你有雨䄛既。」
 
我：「咪問啦，著左佢啦。」
 
我將兩包雨䄛掟俾Jason同肥豬，佢地都即刻著住。
 
最後既果一包，我收埋左。
 
有唔少人見我有雨䄛都走黎問我仲有冇，我都話冇。
 
又唔係friend，點解要比你。
 
過多一陣，鐵餅比賽終於都搞掂，我地終於可以返看台。
 
兩個Miss叫我地就咁留低D野係草地，直接返看台先。
 
我地當然恭敬不如從命，開始小心翼翼咁跑返看台，唯獨肥豬企左係度。
 
我：「喂你搞乜呀，快D行啦。」
 
肥豬：「lulu你仲有冇多一件雨褸。」
 
我望望肥豬望既方向，原來係林穎欣。
 
佢同幾個人企左係遠離主看台既一個帳篷，走唔到。
 
我考慮左一秒，拎左最後一包雨䄛比肥豬。
 
我：「你去拎比佢啦，看台等。」
 
肥豬：「唔該你，一陣見。」
 
佢收左雨褸就開始跑去果邊。
 
原來佢，仲未完全放低。
 
我同Jason先返看台，順手問埋佢叫唔叫Cherry好，佢話ok無所謂。
 
所以我一返看台就開始搵Cherry，問佢今晚一唔一齊打邊爐。
 
佢一聽到有野食就瘋狂點頭。
 
我好期待今晚既party。