[校園][應該純愛][友情]「我想要你，仲有你既世界。」: 對話

「我？哈哈，有意思有意思。」 

Cherry阿哥指一指自己，開始行過黎。 

Oh My God，我好似做左件好錯既事。 

佢會唔會打我？應該唔會啦，佢個妹係度。 

咁佢行過黎做乜？唔好講笑，佢個笑笑口既樣令我仲驚。 



「他好像永遠對著你笑 笑得你心裡發寒。」 

我不禁向後退左一步。 

「係咪唔俾望先？」 

佢而家同我只有兩步之距，係揮拳必中既距離。 

屌，我好憎俾人大。 



豁出去啦。 

我：「我同你講，我好唔鐘意你望我個眼神。」 

哥：「你唔鐘意又點，我無必要就你。」 

屌你吖，咁串都有。 

Cherry：「哥，走啦我地…」 



哥：「你上車先，俾五分鐘我同呢條友傾下。」 

正有此意。 

我跟住佢行左埋一邊。 

我：「點呀，有咩想講呀。」 

哥：「你叫lulu啊可？我係芷睛阿哥，叫我Dennis啦。」 

我：「客氣說話唔洗講咁多，反正我唔會記住你個名。」 

頭先條友咁串，點都要俾個下馬威佢。 

Dennis：「咁又係，若然唔係芷睛成日提起你，我都唔會記得你呢種人既名。」 



嘖，有無人可以借把刀比我。 

Dennis：「我趕時間，我直接講啦，你憑乜覺得自己配得起我個妹？」 

屌！一黎就踏中我條尾！ 

我：「屌，配唔配你話事？」 

Dennis：「呢種説話真係十足十D失敗者講既咁。」 

我：「若然你今日只係想羞辱我既話，你唔會成功。」 

Dennis：「吓，點解咁講呢？我完全無咁既諗法wor。 」 



我開始慢慢捉到呢個人既諗法，佢只係想用盡一切方法羞辱人。 

但呢D招數，對於同Cherry一齊左半年，聽過無數咁多冷言冷語既我係無用既。 

我：「歸根咎底，係你個妹揀左我，明我想講咩未？」 

講完我就轉身走。 

「哈！你就盡力掙扎啦！為左可以繼續係你既美夢入面安睡。」 

呢一句係我最後聽到佢既說話。 

冇諗過咁溫柔體貼既Cherry會有個咁既阿哥。 

破壞哂我今日既心情。