[校園][應該純愛][友情]「我想要你，仲有你既世界。」: 記錄

好嬲，真係嬲。

返到屋企我先後悔點解唔打佢一拳。

搞到而家谷住度氣，唉睇下《銀魂》放鬆下先。

睇緊個陣，我都將自己代入成銀時，打柒班天導眾。

睇完之後心情總算舒暢左少少，個人無咁嬲。



諗落好似有一排無ON RC，上去吹下水刷下存在感先。

入到去平時去開既群，發現師父同Jason兩個係一間房，仲有五個人係另一間。

梗係搵左師父先啦。

我：「Yo~Miss Me Bitch？ 」

師父：「無人想聽到你把聲呀柒頭。」



Jason：「精既就交你家姐出黎啦。」

「邊個既家姐啊？ 」

女人聲！？

成個RC一瞬間靜哂。

「Jason你個死偽毒！！我要同你決鬥！！ 」



師父既咆哮終結左短暫既寧靜。

之所以可以一口咬定係Jason，因為呢間房只有我地三個。

我無開咪，咁就一定係Jason啦。

我大慨估到師父而家既表情係點，肯定嬲到喑倉都可以谷爆佢。

係喎，聽到把女人聲我先記起，等我搵本簿記低今日Cherry講既野先，我唔想唔記得。

我係書櫃入面抽出一本藍色既A4筆記，翻開佢。

但就咁記低好似又冇乜意思，應該要加個前言落去好D。

係時候發揮中二病既力量啦。



我拎起支ZEBRA SARASA既黑色0.5原子筆，開始落筆。

「致未來的自己：

在翻開下一頁之前，我想你好好想一下，你為何而來？

這本筆記為何存在，你還記得嗎？

當初之所以會有這本筆記，是為了避免自己忘記有關她的事。

你現在翻開這本筆記，是為了甚麼？

為了懷念她的事？還是你真的忘了她的事？



不管你是為何而來，我只希望你記得，在我寫這本筆記時，

我是深愛著她的。

但願現在的你亦深愛著她。

好了，去吧，未來的我，祝你幸福。

當年的魯路修上」

屌，寫完都覺得自己on9。

但每一句都係發自內心。

至少呢一刻我可以斷言，我最愛既人係佢。



我亦希望唔會有揭開呢本筆記既一日。

我用平時抄筆記都唔會用上既耐性，逐個字逐個字慢慢咁寫低。

每隻字我都好比心機寫，花左我半個鐘左右先寫好。

寫好之後就好似幫自己立左份遺囑咁，了左件心頭大事咁。

我合埋眼，長嘆左一口氣。

「記錄完了。」

我同自己講，同時間我收到個Whatsapp。



「今日我阿哥同你講左D乜啊？佢好似好嬲咁。」

噢，係Cherry。

佢阿哥好嬲？我都好嬲呀，我開頭直頭想食人添呀。

「點解你同你阿哥差咁遠？你咁好但你阿哥咁乞我憎。」

我亳不留情咁覆佢。

覆完佢我就帶住部電話行出廳搵野食，因為我都餓了。

美星：「做完功課嗱，廚房有野食啊，自己整番熱佢啦。」

我：「功課？」

美星：「岩岩入你房見你好似好專心咁寫緊野，乜唔係功課黎架？」

大鑊，本野我唔想俾佢知，尤其係果段前言。

我：「噢，係吖，唔講啦我肚餓。」

我嘗試轉移話題，佢好似無起疑，太好了。

我入左廚房，發現有一碟野上面有個蓋掩住，應該係呢碟了。

不出我所料，果然又係拿破崙意粉，唉照食啦。

我整番熱碟意粉之後拎返出廳，準備享用我既晚餐。

美星：「喂，乜你今日見過阿妹果阿哥咩？」

我一聽到即刻望住佢，發現佢用緊我部電話。

我：「你點知我PASSWORD架？ 」

美星：「呢D事好簡單啫，答左我先。」

於是我就將成件事講哂比佢聽，結果只係得到佢一句回覆。

「豈有此理，下次再有D咁既事call我，我即刻過黎。」

佢對眼話我知佢而家係認真，原來家姐咁著緊我，有少少感動添。

「啊，星期五幫我約阿妹食飯吖，我請。」

我：「點解？」

「我有野想同佢講。」