[校園][應該純愛][友情]「我想要你，仲有你既世界。」: 不甘

美星：「返去啦lulu。 」 

第一次見美星咁既樣，一副好唔甘心既樣。 

肯定係Dennis唔知對佢講左D乜。 

我：「喂！」 

Dennis：「唔？做咩呀，又想打我啊？」 



老實講，我真係好想再打多佢一拳，但而家都係睇住家姐好D。 

Dennis：「唔打既咁我埋單啦，今餐等我請啦，反正我食得好開心。 」 

Cherry：「哥！ 」 

連Cherry都開始出聲，睇Dennis個得戚樣真係想搵十四打佢一鑊甘。 

返屋企既路上，美星一句野都無講，平靜到令人可怕。 



我開始好奇究竟Dennis條仆街講左D乜野令到佢突然變成咁，明明之前佢仲好好火。 

泊好車之後，佢終於開口講野。 

「我終於明白點解你咁憎佢，佢簡直就係一個賤人。」

既然係你打開對話，咁我就打蛇隨棍上啦。 

我：「佢同你講左D乜？」 



佢呆左幾秒先俾到反應我。 

美星：「內容唔係重點啦，從語氣同眼神中已經經feel到佢係個賤人啦。」 

哎，探唔到內容添，不過眼神呢點我認同，Dennis望我個眼神真係好乞我憎。 

我：「同意呀，佢望我個眼神好似係度可憐緊我咁。 」 

佢再無應我，果然我係話題終結者。 

不過佢返到屋企入房之前有留低一句說話。 

「唔好俾人睇死你啊細佬，覺得唔甘心就諗方法去反抗啦。 」 

洗你教咩，我自己有分數。 



我始終好奇Dennis對美星講左D乜，試下從Cherry果邊入手先。 

我Whatsapp Cherry，嘗試搵出答案。 

「傻婆，你知唔知你阿哥同美星講左D咩？佢而家唔出聲怪怪地咁。」 

我SEND完就上床訓，因為而家都幾夜下。

第朝起身，望下電話，無人搵我，唉，毒撚的悲哀。 

傻婆仲未睇我既Whatsapp，最後上線時間係尋晚十點。 

而家十一點，唔知佢醒左未呢？ 



唉，係度諗都無用架啦，直接打過去啦魯路修。 

我撥出電話，等待電話接通。 

半分鐘之後，電話終於接通。 

Cherry：「喂？ 」 

好似都係第一次係電話入面聽到Cherry把聲，好好聽。 

我：「係我吖，lulu呀。 」 

Cherry：「我知吖，來電顯示有寫架傻佬，做乜啊掛住我？」 

我：「有無睇我個Whatsapp吖？」 



Cherry：「咩Whatsapp吖？ 我未睇喎，我而家去睇先。 」 

我：「唔洗啦，我直接問你啦，你知唔知你阿哥同美星講左D咩？」 

Cherry：「我都有問過佢架，但係佢又唔答我，靜係笑笑口。」 

我：「唉，尋晚家姐返黎之後就怪怪地，我有少少擔心。」 

Cherry：「算啦，唔好諗太多啦，下星期UT你準備成點？」 

我：「一早準備好啦，今次我應該可以緊隨晨哥其後。 」 

Cherry：「嗯，比心機吖，唔好比我阿哥睇死你。 」 



我唔甘心比人睇死，我要令睇唔起我既人大吃一驚。 

當然Cherry想我考好D亦係其中一個原因啦。