咁家姐都開到聲,無理由拒絕佢既。 

我:「好啦我聽日約佢啦。」 

美星:「而家打過去約。」 

我:「咁心急做乜,聽日都未遲。 」 

美星:「咁我自己打去約。」 





佢走入房拎出自己部電話,禁兩下放係耳邊。 

搞咩呀佢,平時都唔會咁架。 

美星:「喂,阿妹呀?我係美星啊。」 

睇黎電話接通了。 

「我想約你今個星期五食餐飯啊,方唔方便?」 





有夠單刀直入呢。 

「係,係,無問題呀,仲有一件事,我想你叫埋你哥哥出黎。」 

咦!?咦!?佢想做乜!?

我無即時阻止佢,只係係度望住佢。 


佢「哦」,「唔」左幾句之後就放番低部電話望住我。 





「約左啦,食和民。」 

我:「點解你要約埋佢阿哥? 」 

美星:「本來我就係想約佢阿哥。」 

我:「所以我咪問你點解囉。 」 

美星:「還拖囉咩呀,夠膽咁同我可愛既細佬講野,唔可以咁輕易放過佢。 」 

吖…好似會好麻煩添… 

第二朝同Cherry返學我地都即刻傾呢件事。 






Cherry:「點算好呀,你家姐好似好嬲咁喎,會唔會出事架?」 

我:「應該無事嘅,佢都叫做係個大人,應該識分輕重既。」 

我咁樣答佢,除左係安慰佢之外,亦係同自己講,叫自己唔洗咁擔心。 

我全日都擔驚受怕咁上堂,因為我地全家都係顛既,我真係唔知會發生咩事,。 

星期五,話咁快就到。

今日我原本要跟晨哥去同隔離學校D人傾野,但我話屋企有事做唔得聞。 


我開頭以為佢會為難我一陣先放我走,出奇地佢咩都無講就放左我走。 

可能咁係個好預兆? 





我今日送Cherry到地鐵站就算,因為反正一陣就會再見。 

返到屋企,見美星已經換好哂衫坐係梳化飲緊咖啡。 

我:「EH…我返黎啦。」 

美星:「嗯,我見到,沖個涼換件衫先啦,未夠鐘。」 

我:「未夠鐘你又咁快換好哂衫… 」 

美星:「你理得我,快D去沖涼啦成陣汗味。」 

我乖乖地咁聽佢説話去做,沖個涼換好哂衫,出到黎發現佢唔見左人。 





餐枱上多左杯野。 

我望左一眼,發現係紅茶,同時我亦聽到開門聲。 

原來係美星由房行出黎既聲。 

美星:「哦?你咁著幾好睇吖,飲埋杯茶就差唔多行啦。」 

我:「屌杯茶又幾好飲喎,喂,你右手拎住D乜。」 

美星:「車匙lor,我地揸車去。」 

屌,我聽到茶都噴左出黎,我唔想死啊。 

坐佢手車同坐開左《高智能方程式》入面既「凰呀」冇乜分別,好易死人。 





好彩我無穿無爛咁去到目的地,真係要講番聲Thanks God。 

去到果陣收到Cherry Whatsapp,話佢已經同佢阿哥坐低左。 

咁我就帶住美星入去和民周圍咁搵,你知啦,燈光咁暗好難搵架嘛。 

最後我俾美星扯走左,原來Cherry佢兩個一直坐係我地視缐旁邊。 

我坐低發現佢阿哥係度陰陰嘴笑,應該係有心唔提我,等睇我柒。 

我望一望美星,發現佢一直啤住Dennis。 

唔好搞事啊老闆。

大家都唔出聲,氣氛好似有少少緊張。 


唔得,要做少少野打破僵局。 

正當我準備拎起餐牌之際,Cherry就快我一步拎走左。 

Cherry:「睇下食乜好無,我有少少肚餓… 」 

Good 呀傻婆,今次你既大食性格有用啦! 

我即刻和應佢,話自己都肚餓,嘗試吸引佢地兩個既注意力。 

呢招果然有效,佢兩個都即刻睇menu,呼,鬆一口氣。 

可惜叫左野食之後又陷入deadair,今次我都唔知點好。 

「lulu你仲記得我叫咩名架可哈哈。 」 

睇黎連佢都忍受唔到deadair了,要俾個下馬威佢。 

我:「我記得好似係D字頭,Danny?Daniel?定係Don?你知啦,冇用既人名我記架。 」 

睇佢笑左兩下,好似不為所動咁,真難對付。 

Dennis:「你記得一個字就夠啦,俾人記著自己個名我都唔好受,尤其係D垃圾。」 

我:「大家咁話,我而家周身唔自然。」 

唔可以示弱。 

Dennis:「聽講係妳想見我,點解唔出聲既,有禮貌D介紹下自己先啦小姐。」 

美星:「對你唔洗有禮貌,叫我Alice。」 

Alice唔係美星英文名黎喎,佢想搞乜? 

野食開始陸續送到,我同Cherry暫時拋開煩惱,不顧一切咁食。 

Cherry:「食野啦大家~」 

我:「我開動了~」 

點都要形造下氣氛既。 

食既中途我都有望下佢兩個,兩條友都唔講野淨食野。 

暫時應該可以放心食掛? 

呼,食到好飽。I love Japan。 

Dennis:「咁,Alice小姐搵我有咩事呢?」 

咁快又入番正題!?我未有心理準備喎! 

美星:「冇,原本想睇下邊個咁夠膽串我細佬,原來只係個mk仔。 」 

Dennis:「哦,原來只係個想靠家姐既細佬。咁都想做我個妹條仔? 」 

嘩嘩嘩,又講呢D? 

「啪!」 

Dennis俾人打左一巴。

Cherry:「lulu你做咩呀..?
 」 

我:「我?我做左D咩? 」 

Dennis:「唔錯吖,夠膽打我,總算似番個男人。 」 

我打佢?摑佢一巴既人係我?我冇印象喎!!我仲以為係美星打既添! 

我同美星對望,佢對我點頭。 

我真係打左佢!!我究竟在做什麼蠢事!! 

美星:「摑你一巴咪算小事,如果係我既話我一掌打到你訓係張檯度添呀。 」 

夠啦求下你唔好再火上加油啦,我到而家仲唔敢相信自己居然打左女朋友個阿哥呀。 

Dennis:「呼,有意思吖,但打到我又代表D乜?」 

佢地三個都突然將目光集中到我身上,好似等緊我答咁。 

既然唔打都打左(我唔sure係咪我打),咁就要型D咁答啦。 

我:「我最憎人睇小我,再有下次就係你個嘴。 」 

一定唔會有下次。 

Dennis:「哈,真係幼稚。咁Alice小姐,可以跟我出黎傾兩句嘛?」 

佢好似完全唔care我點答,分明睇唔起我。 

美星:「怕你麼。行咪行。」 

美星毫不猶豫咁跟佢出左去。 

我有一秒擔心過美星會打佢一鑊,但商場咁多人應該無事既。 

等佢兩個一出餐廳,我即刻伸個頭去Cherry度細細聲講: 

我:「頭先真係我打你阿哥? 」 

Cherry:「係吖嚇死我,你頭先直頭好似變左另一個人咁吖。 」

我:「簡單咁講一次比我聽得唔得,我真係無印象。
 」 

Cherry:「又係度扮傻搏我講返你D威水史比你自high。 」 

Cherry:「頭先阿哥講完之後你就企左起身,突然一巴車左落去,個樣好惡咁講左句「廢物話多」之後就坐返低啦,係咁多啦。」 

Wow,如果Cherry講既係真,頭先我應該好型。 

吖,而家唔係諗呢d野既時候,應該要同Cherry道歉先。 

我:「Sorry啊…明明應承過你唔打交,而家仲打左你阿哥添。 」 

Cherry:「原本我嬲架,不過今次算啦。 」 

我:「我打你阿哥wor..」 

Cherry:「因為今次佢抵打lor,無野架佢唔care呢D。」 

我:「錫哂你。 」 

Cherry:「仲有其他人架! 」 

我無理其他人既目光,錫佢隻手。 

如是者我地係度吹水等佢地返黎,傾下復活節有乜做咁。 

傾左十分鐘左右佢地終於返黎,但好奇怪。 

Dennis一臉得戚,而美星一臉失落咁。 

呢餐飯真係多起伏。