傾計既內容離唔開D是非,兩個女既又係咁問晨哥唔同人既是非。 

因為晨哥基本上乜野都知。 

Cherry唔知係咪興奮過頭,主動提返起上次Dennis單野,搞到阿欣扯哂火,仲叫晨哥打柒佢。 

大概一個鐘左右我地就散,我送左Cherry去到地鐵站都走。 

臨走前佢仲千叮萬囑我聽日記得帶份禮物比佢,唉,真係心淡。 





我按照自己既承諾直飛返屋企,加入師父佢地既戰團。 

但無論係RC定係SD,肥豬都無上缐。 

我:「喂,肥豬呢?」 

師父:「偽毒捨得返黎啦?肥豬話訓覺唔玩喎。」 

唉,仲想探下肥豬口風添。 





我:「咁好啦,等我而家就用拜亞蘭custom屠你班傻仔。」 

Jason:「妖收皮啦,次次唔係sp就抽彈,真男人就玩刀。」 

師父:「Agree呀,我用AS The O打遍天下無敵手。」 

Aaron:「我用00七劍贏硬!」 

我地就係咁,開始打之前總要嘴炮一番。 





我都唔知我地打左幾多埸,上演左幾多場經典對決。 

「師父!!」 

「多蒙!!」 

以下省略,請自行腦補。 

玩到傍晚,大家都開始話就食飯唔玩,RC漸漸變得清靜。 

我要等埋美星食飯,所以繼續上網打發時間。 

睇緊火影個陣突然有人開咪,嚇到我彈起。 

「有無人係度呀?」 





係肥豬。 

我:「太遲啦,個個去哂食飯,而家得番我同你。」 

肥豬:「屌,我岩岩先訓醒咋..咁仲玩唔玩?」 

我:「1on1囉,反正我仲要等我家姐食飯,仲有少少時間。」 

係個機會去了解下肥豬而家點諗。 

當然,總無可能一黎就問架。 

最簡單既做法就係先陪佢打一輪機先問。





GP01FB對GP02A,突自對命運,00 Raiser對須佐之男,我地兩個重現左一場又一場經典打鬥。 


我見都差唔多係時候,決定膽粗粗咁問佢。 

我:「喂,今日見你跟住林穎欣尾走喎,你無野嘛? 」 

我用一個關心朋友既語氣問佢。 

肥豬:「哦…我無野,想陪下佢啫。」 

我:「咦,聽你語氣好似有故仔聽喎,反正而家得我同你,講黎聽下。」 

RC靜左半分鐘,我睇住肥豬移我同佢去一間有Password既房。 

我:「做乜移我。 」 





肥豬:「費事有其他人聽到啦,我見係你先同你講咋。」 

我:「So ing gay,講啦。」 

肥豬:「其實呢..我放新年假個陣有搵過佢,係14/2。」 

我突然諗起我13/2先同Ada出過街,有點漸愧。 

我:「你又同佢..咩啊? 」 

我唔想提起「表白」呢個字。以免刺激佢。 

肥豬:「係啊屌,又衰左 ,不過已經好過上次啦。 」 





我:「哦?好過上次係咩意思?」 

肥豬:「上次我衰講錯野搞到佢嬲到即刻走人,今次無不突至,佢仲同我傾計。」 

我:「wow,sounds great,傾左D乜講唔講得。 」 

肥豬:「屌,你就梗係可以講啦,我地兄弟黎架嘛。」 

「兄弟」,我配唔配做佢兄弟?

「佢拒絕左我果陣不停咁同我講Sorry,話其實佢一早就鐘意左人。」 


我:「哇…」 

我心痛一痛。 

肥豬:「我當時同你反應一樣,佢仲話佢同果個男仔表白都衰左。」 

我開始乖乖地做個聽眾,聽由肥豬口中講Ada既事。 

「佢同我講,佢又係試過幾次向果個男仔表達自己真係好鐘意個男仔,甚至模仿個男仔既女朋友,但都無用。」 

「但佢話佢會一直等,直至個男仔需要佢,所以唔可以接受我。」 

「係咁多啦,講完。」 

我:「嘩,真係睇唔出…」 

其實呢一切我都知。 

我:「咁咪對你好唔公平囉,你憎唔憎個男仔?」 

黎啦話憎我啦,等我好過D。 

肥豬:「呢D野有咩公唔公平吖,我無憎果個男仔,反而想多謝佢添。」 

我:「仲多謝佢?」 

肥豬:「就算無果個男仔,我都未必可以成功,但因為有佢,我先起碼可以做到佢朋友。」 

我:「咁你之後想點做?」 

肥豬:「而家咁樣夠了,可以陪佢放學,有時同佢傾下計就夠了,我想做佢既守護神去保護佢,唔俾人傷害佢。」 

哇,仆街我眼濕濕。 

肥豬:「魯路修,若然有朝一日我需要你幫手去保護佢,你肯嘛?」 

我:「洗乜講,兄弟叫到一定幫。」 

我冇諗過就答。 

我聽到開門聲,應該係美星。 

我:「喂,唔傾啦要食飯。」 

肥豬:「OK BYE。」 

睇黎,肥豬已經幫我揀左。 

只要維持現狀,就應該係肥豬所期望既。 

希望Ada早日察覺到肥豬既一片真心啦...