究竟我係對Ada同肥豬殘忍,定係對自己殘忍我已經分唔到。 

不過我願意自己負上一切責任,即使所有人都怪我。 

我將之前係晨哥度拎番頸鏈放入櫃桶既最深處,盡量避開佢。 

算啦而家唔好諗太多,都係早D抖,考埋聽日UT就完啦。 

第朝起身,我第一時間就將隻CD放入個袋度,以免自己唔記得帶。 





LS呢科其實都無乜難既,只係多野寫,煩左少少啫。 

我用左個半鐘就做好份卷,之後就訓著左。 

訓醒已經要收卷,我抹下口水同師父佢地say goodbye就落左三樓搵Cherry。 

落到去B班班房發現佢地仲收緊卷,咁我唯有等陣啦。 

等陣個陣我發現有人係入面望住我,我下意識就去搵邊個望我啦,原來係Cherry。 





佢係入面不停向我揮手,不過係好細幅度,無俾老師發現。 

個feel就好似D家長去幼稚園接仔女咁。 

到佢地班走得個陣,佢幾乎係第一個衝出黎。 

Cherry:「行得啦! 」 

見到佢呢個充滿期望既眼神,令人好安心。 





我:「乖~ 」 

我摸摸佢個頭,引起周圍既人既注意。 

「wow~!」 

「好sweet呀!~」 

「偽毒可恥!」 

我都未俾反應就已經被人好大力咁強行帶走左。 

落到地下佢都無放開我,我忍唔住出聲。 

我:「肯放開我未呢老闆。 」 





Cherry:「噢,Sorry呀,岩岩太多人好尷尬好想快D走所以就…」 

佢好似被我講既野嚇親,馬上就放開左手。 

呢個情景,似曾相識。 

我:「我突然諗起同你第一次出街,同而家好似。」 

我將手搭係佢膊頭。 

Cherry:「又好似係喎哈哈。 」 

我地開始繼續上路,離開學校。 





我:「原來已經半年,時間過真係快。」 

Cherry:「因為開心嘛。 」 

我:「咁又係,嗱,禮物呀。」 

我係袋抽出隻CD,交到佢手中。 

Cherry:「嘩,係《四月》既cd?」 

我:「我係諗到買呢樣咋..你唔鐘意?」 

Cherry:「點會呢,就算你買個電話case比我我都收貨架,不過真係冇諗過你會買呢樣..」 

佢拎住隻CD,個樣好似幾滿意,呼,安樂哂。 





我無再留意份禮物既事,繼續同佢行去地鐵站。 

係等緊佢果邊班車個陣,佢突然開口。 

Cherry:「魯路修,復活節假去海洋公園,可以嗎?」 

我:「但係海洋公園唔係多數萬聖節去架咩?羅蘭Queen喎。 」 

Cherry:「但我想復活節就去! 」 

佢突然激動起來,嚇親我。 

我又再次摸下佢個頭,嘗試安撫佢激動既情緒,地鐵都開始埋站。 

我:「我盡量安排下啦,我唔知到時會有乜做。 」 





車門打開左。 

Cherry:「你話架! 」 

佢講完就揮䄂而去,無回過頭。 

唉,女人真係麻煩。