都唔明點解佢咁心急要去海洋公園,應承過佢就會帶佢去架啦。 

我見上早會無乜野做,拎本手冊出黎睇下復活節有幾多日假放。 

一睇,屌得五日假。 

我:「屌,今年復活節得五日假?Serious?」 

若晴:「一早知啦,我地Form5好似仲話有個交流團添呀。」 





我:「睇死咪又係返大陸,傻鳩先會報。」 

若睛:「我同意,唉一陣又要派卷,好緊張。」 

我:「緊咩張啫,你都炒硬架啦,怕乜。」 

若睛:「食屎啦lulu,我話俾Cherry知。」 

其實我都好緊張,只係收埋收埋。 





萬幸既係,中,英,數都有好成績,歷史仲又拎第一,仲有ICT同LS未派。 

努力並無白費到,今次全級頭二十應該不是夢。 

食LUNCH個陣,我無去搵Cherry,選擇左同師父佢地食。 

我想放學先一次過話佢知我考成點,雖然佢已經知我英文幾高分,仲好開心。 

師父:「威啦魯路修,科科都頭三,歷史仲要第一。」 





Jason:「咁肯定唔洗補課啦。」 

肥豬:「唔洗補課咪自己返屋企毒囉。」 

我:「無辦法啦鬼叫我太勁咩,認真少少就咁。」 

Aaron:「屌,串得你,今日LS堂連埋補課上呀,到時打死你。」 

屌,係喎,咁即係可以又同Cherry上堂!?

一陣補課就同Cherry匯報成績,等佢開心下先。

ICT都唔會差得去邊,問題係LS可唔可以有高分,食粥食飯睇佢。 

ICT同自己預計一樣,係安全範圍,而家上LS堂。 





Miss一到我成個人都緊張起黎,成個人坐立不安。 

Miss Leung:「大家今次都好努力呢,整體成績都好好,俾D掌聲自己先。」 

唔好係度賣關子啦乞人憎,快D派啦我想知道自己幾分呀! 

Miss Leung:「今次我地班出左兩個全級第一呢。」 

全級第一?兩個?邊個可以同晨哥同分? 

全班人都嘩左一聲,睇黎大家都好意外。 

我擰轉臉望晨哥,佢臉不改容咁繼續玩手指,好似完全唔care。 





「邊兩個咁厲害呀Miss?」 

唔知邊個契弟問Miss。 

Miss:「大家靜少少先,我而家講。」 

但其實無人講野,大家都望實Miss。 

Miss:「第一個係藍洛晨,第二個係魯路修,大家俾D掌聲佢地!」 

吓!?我? 

熱烈既掌聲令我一時之間處理唔到而家既情況。 

晨哥係我後面拮左我一下。 





「叻仔喎,魯路修。」 

呢樣真係預料之外。 

我傻下傻下咁出去拎卷,途中受到唔少祝賀,但感覺總係怪怪der。 

好似有D野唔係好岩。 

我可以追上晨哥? 

我無辦法蓋住我既好奇心,我決定去問晨哥。 

我:「晨哥,借你份卷睇下得唔得?」

晨哥:「你同我同分,有乜好睇啫。」 





我:「黎啦俾我睇下啦。」 

我拎左晨哥份卷睇左兩眼,就比佢搶返。 

雖然只係睇左兩眼,但我見到晨哥每題都有做。 

我:「你無放水?」 

晨哥:「咪玩啦,次次都咁考架啦,放乜水。」 

我:「你無專登同我同分?」 

晨哥:「我唔係萬能架傻仔,點可以考到同你同分。」 

哇,即係我真係追到晨哥尾? 

晨哥:「恭喜你呀,魯路修。」 

突然好開心添,一陣一定要同Cherry講先得。 

「一陣補課我有野要宣佈,大家記得準時到,我唔想遲放。」 

原來已經落堂,好想衝落去同Cherry講,但要忍! 

去到四點,我地班準時去到多用途室霸個靚位,我都留左個靚位比Cherry。 

等多幾分鐘B班都到左,我揮手示意Cherry坐過黎。 

Cherry:「點呀派卷派成點呀?」 

我:「講出黎嚇死你添吖。」 

Cherry:「數學74分第三,中文67分第二,歷史68分第一嘛。」 

我:「你點知架?」 

Cherry:「我有好多線眼架傻佬。」 

我:「唉仲諗住嚇你一跳添。」 

Cherry:「不過我仲未知你LS考成點喎,講黎聽下。」 

我:「第一,68分。」 

Cherry:「晨哥68分,咁你呢?」 

我:「68分。」 

Cherry:「咩話?」 

我:「我話我68分,同晨哥一樣。」 

Cherry:「嘩!你同晨哥同分?」 

我:「係吖,我自己都嚇親。」 

Miss Leung:「唔好再傾計啦,我要宣佈D野。」 

全部人靜哂,望住Miss。 

Miss Leung:「咳咳,相信各位都知Form 5有個交流團架啦,係LS科既。」 

我:「我無興趣!」 

我突然大叫,引起全場大笑。 

Miss Leung:「你無興趣都無用,你要去,因為今次係全級LS頭十要去 。。」 

HOLY SHIT。 

若睛突然拍拍我膊頭。 

若睛:「唔知今朝邊個話傻鳩先會去呢。」 

屌,好柒,好想打開隻窗跳出去。 
[/justify]