[校園][應該純愛][友情]「我想要你，仲有你既世界。」: 拜託了
我慢慢行返自己房，沿途同Cherry傾計。
我：「估唔到晨哥最後個下射籃會入。」
Cherry：「無可能架咩？」
我：「eh…我只係係漫畫見過囉。」
Cherry：「但佢係晨哥，做到都唔出奇吖。」
我：「你啱。」
不經不覺已經去到我房門口，未入去已經聽到入面好嘈。
Cherry：「入面好嘈喎，咩事呢？」
我：「入去睇下咪知囉。」
我拎張匙卡出黎開門，發現入面起碼有成八個人。
晨哥：「哦，魯路修你拍完拖返黎嗱？」
「wow~」
晨哥笑容滿面，同頭先有好大反差。
我：「無呀屌你！咁多人係度搞乜？」
晨哥：「哦，我地玩緊大富翁囉，呢兩個朋友仔新識架，叫阿輝同阿明，子琪間學校架。」
大富翁？on9架去交流團帶咁撚大盒野？
阿輝，阿明：「Hello。」
我：「唷，唔洗理我，你地慢慢玩。」
Cherry：「咁我返過去先啦，聽朝見啦。」
各：「阿嫂再見！」
唉，好尷尬。
我無加入佢地，而係坐上自己張床係一邊睇。
今日只係第一日已經搞D咁既野，仲有三日點捱呀老闆。
生生性性啦晨哥，我唔想揹鑊呀。
坐下坐下就訓著左，醒返個陣D人已經走哂，成間房得返我同晨哥。
正確D黎講，係得我一個，晨哥企左係個露台度，好似若有所思咁。
我：「咁大風仲出黎搞乜。」
晨哥：「醒左啦？我出黎吹下風清醒下頭腦啫。」
我：「偽文青，咁有無諗到D呀老闆。」
晨哥：「我係度諗，我有時會唔會過左火位？」
唔？小可喎會反省。
我：「講黎聽下。」
晨哥：「好似今日咁，原本我只係打算隨便贏左佢就算，但佢竟然搞Chris，搞到我好嬲同時好自責。」
唔怪得知果陣成個人即時唔同哂啦。
我：「所以你意思係因為你既過火行為，令身邊既人受傷？」
晨哥：「exactly，幾時都話你醒目，我好怕終有一日會累到阿欣甚至你。」
我：「我？」
晨哥：「畢竟你係唯一一個我可以稱之為「兄弟」既朋友啊。」
居然係我，非常榮幸。
我：「咁，可唔可以話我知，點解你做乜都要贏？」
晨哥：「呢樣野我又真係無諗過喎，可能只係暫時我無要輸既理由啫。」
我：「好中二病呀你。
」 晨哥：「光明正大咁贏我我無意見，但我最忍唔到既係我被人睇小同埋D人得把口，遇到呢D我會出手。」
我：「所以你咪成日惹麻煩返黎囉。」
晨哥：「哈哈，我都無辦法，想改都改唔到。
」 我：「唔洗改啦。」
晨哥：「唔？」
我：「改左就唔係我地識既藍洛晨啦，D麻煩等我搞掂，你做番自己就得。」
晨哥：「咁就拜託你啦兄弟，我去沖涼先，早D抖聽朝聽人吠啦。
」 佢轉身行向廁所。
呀，有野唔記得問。
我：「喂，晨哥你最後個下射籃究竟點做到？同綠間一樣咁濟喎。」
晨哥：「呢D野，想做就做到架啦。
」 「不過其實我無諗過會入，只係純粹太嬲先射左出去。
」 原來只係偶然？