[校園][應該純愛][友情]「我想要你，仲有你既世界。」: 我錯了

第朝食早餐之前阿Ray就黎左我地房搵晨哥找數，吠左三聲。 

晨哥都無特別為難佢，吠完就叫佢走。 

食完早餐我地就出發去下一個地方參觀，唔知乜柒科學館。 

晨哥今日成為左全團人既注目所處，睇黎尋日場波已經揚左開去。 

今日Cherry係咁痴住我，叫我同佢去睇呢樣睇果樣。 



雖然唔知佢有乜動機，但我就好enjoy，一於小理。 

Cherry：「你睇下呢個！識浮架！」 

我：「係係，好得意好犀利。」 

Cherry：「做咩呀你，咁無精神既，尋晚訓得唔好？」 

我：「唔係既..只係我對呢度無乜興趣啫…」 



我無講大話，我對呢D野無興趣，寧願去圖書館好過。 

Cherry：「咁你同我去睇星星啦」 

我：「睇星星？而家仲係日頭喎。」 

Cherry：「我有辦法啦，跟我黎啦。」 

佢帶走左我，帶左我去一個放映廳。 



原來如此，睇星星係咁既意思。 

雖然D星星係幾靚，但我仍然無興趣，因為更靚既野已經係我面前。 

Cherry：「點呀？睇完星星覺得點呀？靚唔靚吖？」 

我：「唔係好靚啫。」 

Cherry：「你份人真係難滿足。」 

我：「你應該知架，我覺得最靚既野係乜。」 

Cherry：「咪我囉係咪吖。 」 

我：「叻女，獎勵下你啦。 」 



我伸出手，摸佢個頭。 

今次輪到我拖住佢周圍去，當拍下拖咁。 

但有D奇怪，當每次有其他學校既女仔出現係我地面前Cherry就會捉實我。 

我：「做乜呀？你怕陌生人？」 

Cherry：「唔係吖..」 

哦，咁我知咩事了。 

我：「你唔想我同其他女仔有交流？你驚？ 」 



Cherry：「係吖乞人憎！尋晚若睛同我講話好似有人睇中左你啊。 」 

我：「有乜好驚啫，要驚都係我驚啦，肯定大把人睇中你啦。」 

呢個係事實，我同Cherry一齊行個陣已經見到有好幾個男仔眼甘甘咁望實Cherry。 

Cherry：「係咩哈哈，咁我地兩個都要好好捉實對方先得啦知唔知吖？ 」 

我：「YES YOUR MAJESTY。」 

再行多陣就到集合時間，要去下個地方，圖書館。

呢個圖書館，不得了，好撚大。 

如果呢度拎黎玩捉，肯定成日都唔會有人搵到我。 



呢度可以停留既時間有兩個鐘，好好行下先。 

我望下個地圖，睇下應該去邊先好。 

Cherry：「上八樓啦不如，歷史分類係果邊。」 

果然知我心意。 

我：「嗯，上去睇下啦。」 

上到八樓，我行左兩行就叫Cherry走，因為好多想睇既topic都無。 

Cherry：「咁快就走？唔睇嗱？」 



我：「好多想睇既野都無啊，反正我無期待過。」 

Cherry：「咁我地而家去邊好呀？仲有個幾鐘喎。」 

係喎，無諗過添。 

我望下周圍，睇下有無邊度可以hea時間，結果比我發現左個空中花園。 

我：「去空中花園坐下囉不如。」 

Cherry：「好吖。」 

行到出去，第一個反應係哇一聲。 

強國地方真係大，連個空中花園都大過人。 

重點係一個人都無，簡直就好似係我同Cherry既秘密花園咁。 

Cherry：「哇呢度大過我地學校好多吖，我諗有兩倍。」 

我：「我諗有啦，唔好講咁多快D搵張櫈坐低先啦。」 

我搵左張長木櫈同佢坐低，一齊睇風景。 

Cherry：「呢度好靚喎，好多花。」 

我：「係咩，我覺得都係你靚D。」 

我伸一伸懶腰，訓左落佢大脾度。 

Cherry：「咁係當然架啦，你有個咁靚既女朋友應該要自豪啦。」 

我：「叻啦叻啦。」 

我開始合上雙眼，打算抖返陣。 

我：「喂，而家我地似唔似新婚旅行？」 

Cherry：「邊個話會嫁比你。」 

我：「你戒指都收左架喎，想反口？」 

無錯，佢而家都仲有戴住隻戒指。 

Cherry：「車，你又無同我求婚，隻戒指我當禮物咁收咋。」 

我：「咁我同你求婚，你會唔會應承？」 

Cherry：「唔想答你喎。」 

我：「呵~唔得，我訓陣先。」 

Cherry：「懶鬼，剩係識訓。」 

我：「唔鐘意咪分手囉。」 

我再無聽到佢答我，我睜開眼望佢，發現佢望到我實一實。 

佢向我四目交投左一下之後就即刻企左起身，嚇到我都企左起身。 

換黎既係一巴掌。 

佢之後揮䄂而去，離開我既視野。 

我好似做錯野，仲係一件好錯既事。