好痛,呢一巴好痛。 

屌,今次玩大左添。 

我真係無諗過佢會咁大反應架,知我就唔會講啦係咪先。 

「分手」呢兩個字睇黎要列入禁語先得,一講即死。 

唉鬼叫我第一次拍拖咩,點知咁多野。 





無錯!錯既唔係我,係世界! 

唉,講就咁講,但而家點算好。 

係我發呆個陣佢應該已經走到好遠,仲追唔追好? 

反正一陣都會見到架啦,唔好追啦不如。 

但唔追會唔會顯得我無誠意架? 





屌,都係追啦。 

我終於企起身,離開空中花園。 

而家問題係,我要去邊度先搵到佢? 

呢度咁大,搵一個人完全係大海撈針。 

今鋪真係要係度玩捉伊因了。 





但我都係逐層逐層咁搵,跑住咁搵。 

相信大家都好清楚我既體力計係比其他人短,跑兩下都會氣喘個種。 

不過我仍然盡力燃燒我既生命,嘗試搵出佢既蹤影。 

只係,期望越大,失望越大,我無辨法搵到佢。 

我決定用最無誠意但一定可以俾佢知既方法,Whatsapp。 

我拎電話出黎,連上wi-fi,再開Whatsapp搵佢。 

「Sorry呀,一時衰口賤,你原諒我啦,我真係無咁既意思架。 」 

Send完確認到有兩個剔之後我就收起電話,開始去搵張櫈坐低休息下,因為我真係無力了。 





我去左四樓一個有好多張梳化仲有兩部自動售賣機既位坐低,仲買左罐雪碧。 

真係好難搵到佢,因為我移動時佢可能都移動緊,撞上既機會其實好微。 

而家仲有成個鐘先集合,抖多陣再去搵佢啦。 

「喂,係度做咩呀魯路修?你女朋友呢?」 

我都想知啊,不如你話我知啦子琪,念左大家做左咁耐朋友。 

無錯,同我講野既係子琪。