[校園][應該純愛][友情]「我想要你，仲有你既世界。」: 回家了
唔知係咪我處理得唔好，之後兩日若睛都仲係嬲嬲地，唔理我。
唉，我都無辦法架，當時咁做已經係最好既處理。
過多兩日個交流團都完，我總算甩難。
好彩大家都無再點惹麻煩返黎，只係有時對我發下脾氣，講下悔氣說話咁。
我明架，因為佢地唔敢對晨哥發脾氣嘛，所以咪拎我黎出氣囉。
我無乜所謂，只要唔好搞出D乜麻煩野就得。
返香港既途中，大家都係度回味緊個trip。
男既係度唒自己識到幾多人，女既就傾成團邊個最靚仔。
我地學校十個人入面得三個女仔，一個仲要嬲爆爆，無計傾。
至於我？我無參與討論，只係想自己好好靜下抖下。
呢四日我既神經長期都係極度繃緊既狀態，成個人好辛苦。
要照顧晨哥真係一件好辛苦既事。
幾經辛苦終於返到學校，我終於可以返屋企親親我張大床。
我以為係咁。
兩個隨團老師話仲有少少野要同我地講，叫我地去有蓋操場等佢地。
我地個個都怨聲載道，但無反抗，畢竟對方係老師，我地只係學生。
好彩佢地都無阻我地太多時間，只係叫我地要做好堆工作紙同要準備分享就放人。
仲要分享？唉，真係麻煩，我好怕對住咁多人講野。
嘛，船到橋頭自然直，而家都係唔好諗太多，返屋企訓下先。
一出到學校門口就見到阿欣企左係度，睇黎佢真係好緊張晨哥。
晨哥見到阿欣就即刻行快兩步上去摸阿欣個頭，但結果換黎阿欣一下巴頭。
阿欣：「叫左你唔好搞事架啦！若睛話哂我知啦！擔心死我啦！」
我好似係第一次見晨哥咁樣俾人指住黎鬧。
不過睇黎唔會開認真mode啦，見佢笑笑口咁。
Cherry：「不如食埋飯先返去囉？」
「吓唔好啦，我想返屋企沖涼訓覺啊。」
你估我唔想咁講咩，我不知幾想咁講呀，問題係女朋友開到聲點拒絕呀？
我：「好！食咩？」
晨哥：「不如食薩莉亞？我請。」
晨哥對我打左我眼色，睇黎好想我救佢咁。
我：「殺你！」
Cherry：「若睛你黎唔黎呀？」
若睛：「唔啦，我想返屋企沖涼訓覺。」
頂，我好羡慕佢可以咁講。
一行四人去左薩莉亞大吃大喝，反正又無係我錢，一於食盡佢。
不過不得不提食左四日大陸野再食返香港野真係另有一番感覺。
只能說，I Love Hong Kong。
食飽飽又吹左陣水我見Cherry開始係度㩒電話。
我：「你屋企催你返去？」
Cherry：「嗯，Daddy叫左我阿哥黎接我，我五分鐘後走啦。」
晨哥：「咁今日去到呢到先啦，我去埋單。」
Cherry：「唔洗啦你地可以繼續傾喎。」
晨哥：「唔啦，我而家有另一樣野想做。」
唉，我有唔好既預感。
果然，我地同Cherry講再見之後晨哥就捉住我去跟縱Cherry。
我：「喂你又想點呀。」
晨哥：「我對佢阿哥好有興趣，好想親眼睇下佢咩樣。」
阿欣：「我想你打佢多D。」
我無出聲，但我贊成阿欣。
跟左一段路我又見到果架黑色七人車。
我：「係果架車啦。」
架車駕埋避車處，司機位開左門，有人落左車。
係佢啦，係得佢先有果種咁令人討厭既感覺。
我：「係佢啦，Cherry阿哥。」
晨哥：「個格好衰，乞我憎。」
阿欣：「準備啦阿晨。」
準備？準備咩？
晨哥拎左個棒球出黎，屌我已經唔想去諗佢係邊度拎出黎。
佢擺好姿勢，準備全力一擲。
唉屌，我咩都唔知，我咩都唔知。
咦？仲有人落車既喂！？
「STOP！停！」
我捉住晨哥隻手，唔俾佢擲出去。
從年齡判斷，落車既阿叔仲有個阿嬸應該係Cherry既父母。
呼，差少少出事。
Dennis好似注意到我，佢地四個人都望左過黎，Cherry仲行緊過黎。
FUCK MY LIFE，被發現了。
Cherry：「仲未走既？」
我：「唷..行緊去巴士站搭車嘛。」
嗱，我無講大話架，我去搭車都係呢個方向，只係行多左路啫。
Cherry：「係咩？算啦跟我過黎啦，你好似仲未見過我Daddy媽咪。」
我：「eh..而家我呢身裝束好似…」
Cherry：「怕咩啫，黎啦。」
晨哥：「咁我地走先啦，學校見啦魯路修。」
你！背叛我！Traitor！
我係半拉半推既情況下被Cherry引領左去見佢父母。
Cherry：「佢就係魯路修呀。」
我：「Uncle，auntie你地好…」
Uncle：「唔，幾好幾好，有禮貌，好仔好仔。」
佢兩隻手拍落我膊頭度，我下意識咁推開左。
仆街，肯定留低個壞印象。
我：「Sorry..我..唔係好習慣俾人掂我膊頭。」
Auntie：「我都有聽芷睛講過，果然有性格呢，唔洗咁介意。」
Uncle：「哈哈，我太興奮一時無留意，係我唔好，哈哈。」
呼，好彩啫。
之後簡單問候左幾句佢地就走左，我都開始返屋企。
Cherry父母睇黎都係好人呢，應該只係果阿哥有問題啫。
我企係屋企門口，深呼吸左一下，打開大門行入去。
「我返黎啦。」