[校園][應該純愛][友情]「我想要你，仲有你既世界。」: 我最大

晨哥叫大家先返房，話一陣會叫佢地黎我地房傾。 

咁我同晨哥一間房架嘛，只好跟佢返去睇下佢有乜搞。 

佢一返房就搬開自己堆行李埋一邊，盡量製造更多空間。 

我：「你係度搞乜？」 

晨哥：「唔？一陣佢地會過黎，唔搬開D野邊夠位傾？」 



我：「其實你想點做？」 

晨哥：「講下道理囉，你去叫若睛過黎啦。」 

佢好似唔得閒理我，開始用房個電話。 

於是我就按照佢既吩咐，走過去隔離房㩒鐘搵佢地。 

開門既係Cherry。 



我：「eh…晨哥話可以過去啦，你地過黎啦。」 

我一講完若睛就唔知係邊度彈出黎，無視我咁過左去我間房。 

喂，老闆又唔係我得罪你，做乜好似嬲埋我咁。 

我：「搞咩呀佢，比人錫一啖就好似嬲左全世界咁。」 

Cherry：「有時女仔對呢D野係好執着架，你唔可以怪佢。」 



我：「哦，你講到咁就算啦。」 

連Cherry都為佢護航咁我無辦法啦。 

返到房睇左陣書，坐左一陣就有人㩒門鐘，晨哥示意我去開門。 

搞錯，自己有手有腳乜都要我去做，離譜。 

可能我平時太縱佢了，搞到佢咩都靠哂我。嗯，一定係咁。 

我打開門，係子琪同俾若睛摑果個男仔。 

我：「唷。」 

子琪：「阿晨呢？」 



我：「係入面，入黎先啦。」 

我望左個男仔一眼，眼神好似好驚咁，應該好易說服。 

我都希望係咁啦。

氣氛好平和，晨哥笑面迎人，叫做有個好開始。 

我自己就最怕處理呢D糾紛，所以我又選擇左戴起耳機逃避。 

所以我只係睇住佢地傾，但聽唔到佢地講乜。 

從表情上黎睇，晨哥一臉輕鬆，而子琪就好激動咁。 



至於兩位當事人呢..女既就好似好唔耐煩，男既就好似好無耐咁。 

唉，我諗個男仔心入面一定同我一樣咁諗： 

「屌，點解會變到咁麻煩。」 

我一於小理，沉醉係音樂既世界，只留低軀殼係間房。 

當我回過神個陣就發現，咦，奇怪啦，做乜野大家突然都望住我既？ 

我係咪又Miss左D野？ 

我望下Cherry，佢見我好似唔知發生咩事幫我除低耳機，再係我耳邊細聲講： 

「晨哥問你，若然你無啦啦俾人錫你會點做呀。」 



我：「屌，如果係個三唔識七既人錫我我就肯定打佢一鑊先。」 

Shit，一時口快講左粗口添。 

我即時向Cherry雙手合十，以表歉意。 

晨哥：「嗱，聽到啦，連佢都咁講。」 

子琪：「但係我地只係玩game啫！」 

晨哥：「喂，咁我而家咀你之後話玩game啫叫你唔好出聲得唔得？」 

子琪：「總知打人就唔啱！」 



晨哥：「咁你想點？」 

子琪：「我要佢道歉。」 

晨哥：「無可能，我唔會要我朋友覺得受委屈。」 

子琪：「咁我會同老師講佢打人。」 

晨哥：「我會話番佢非禮我朋友。」 

哎，好緊張呢，晨哥又入左認真mode。 

我要調停下先得，唔係既我怕會更大鑊。 

我：「喂，靜一靜先。」 

我突然插嘴令佢兩個都望住我，哇，壓迫感好大。 

我：「其實…若睛都係玩true or dare先走去打你個frd兩巴啫.. 」 

我好佩服自己咁都可以講得出，Cherry甚至偷偷地係我後面笑。 

不過呢句野一出，大家都靜左，我即刻打蛇隨棍上。 

我：「嗱，你玩game要咀人一啖，至於佢就要打人兩巴，大家都係玩game啫。」 

Cherry都加入遊說行列。 

「係囉係囉，大家都係玩game啫，就咁算啦。」 

個男仔好似終於忍唔住出聲。 

「其實都係我唔好，唔講清楚先，就咁算啦好無。」 

好！非常好！ 

由於個男仔都決定唔再追究，子琪都無得再講咩野，返房休息。 

Cherry同若睛都返左房，Cherry臨走前仲俾左個like我話我勁。 

成間房又得番我同晨哥。 

「今次做得好吖，魯路修。」 

晨哥邊伸懶腰邊同我講。 

我無理佢，繼續抹乾岩岩洗完既頭。 

晨哥：「今次你最大，hold住全場，我都唔夠你黎。」