以下內容以Cherry視角出發,請注意 

佢考到全級第六,我就梗係開心啦,問黎都多餘既。 

不過除左開心,我反而更加擔心佢。 

佢呢個人係要人逼或者推下先肯俾心機做野,一無人睇住佢就hea做。 

都唔知我一唔係佢身邊佢會變成點,真係擔心死我。 



而家已經四月頭,距離DSE已經得番唔夠一年,但佢好似完全無危機感咁。 

成日就只係掛住玩玩玩,要讀書架嘛。 

講係咁講,但唔知點解一見到佢個樣,就點都嬲唔落佢。 

正一傻仔,不過我就係鐘意佢咁。 

同佢一齊左半年有多,開心既事多到數唔哂。 



當然,都有令我嬲同唔開心既事啦,一定有架啦。 

返到屋企已經差唔多七點,媽咪佢已經煮緊飯。 

媽:「返黎啦?好快有得食啦,你阿哥今晚都返黎食飯喎。」 

我:「哦~咁我去換衫先啦,一陣我再出黎幫你手啦。」 

媽:「乖啦唔洗你幫啦,你去溫書做功課啦。」 



咁呀…咁我去寫下日記啦。 

我其實無寫日記既習慣,但一有好想記住又或者好深刻既事我就會想寫低去。 

Form1到而家都已經寫左兩本簿lu,同佢一齊左之後寫得特別多,我自己都唔知點解。

今日寫乜好呢?今日個傻佬又做左好多蠢事,寫邊樣好呢? 


唔好諗啦,全部都寫入去啦。 

「6/4 

今日學校終於都派左上次UT既成績單啦,今次我全級第五,lulu佢話自己第六,仲好開心咁show比我睇。 

睇住佢沾沾自喜個樣,真係好開心,佢真係好傻仔feel。 



不過我真係有少少出奇佢話係為左我先咁努力。 

聽到佢咁講我其實有少少感動,但感慨反而更多。 

我唔想佢以後都只係為左我開心先去努力,我想佢為自己開心而去努力。 

畢竟我…」 

「你又係度寫緊野吖?」 

我:「可唔可以敲門啊你!無禮貌! 」 

「我有敲,食得飯啦阿妹。」 



我:「得啦,我一陣出黎。」 

我合上本簿,放番入去櫃桶底。 

對上一次一家四口食飯係幾時我已經唔太記得,應該係新年掛。 

爸:「嘩今晚好多餸喎!影返張相先。」 

哥:「無聊。」 

媽:「芷睛不如我地自拍吖,你揸機喎。」 

我:「好吖。」 

每次食飯我地都好鐘意搞一大輪先,因為大家都好珍惜一齊食飯既時間。 



至少Daddy媽咪同我係咁。 

食飯食完七七八八,大家都開始放慢速度食,傾下偈咁。 

爸:「上次果個魯路修幾好仔喎,又有禮貌,有眼光呀乖女。」 

媽:「係呢~都話個女似我架啦。」 

我:「唔好睇佢上次咁,佢成日傻傻地咁架又成日惹麻煩,不過同佢一齊真係好開心.. 」 

無錯,真係好開心。 

哥:「哦,咁真係恭喜你,但係你同佢講左果件事未? 」
係我最唔想面對既事.. 



我:「未…」 

我唔敢望阿哥,因為我知佢一定係度笑緊。 

Daddy媽咪都無出聲,氣氛一瞬間變哂。 

哥:「我係你我就快D同佢講啦,等佢快D醒,唔再發埋D無謂夢。 」 

我:「我真係唔想走…」 

阿哥:「呵~一年前你話仲有一件一定要做既事未做,叫我地俾多一年時間你,結果你而家?哈。」 

我無得反駁。 

爸:「女,乖啦,我地唔係應承左架咩?今年就過去架嘛。 」 

我記得,我當然記得,但我放唔低佢。 

而家佢應該仲未可以接受到,畢竟上次情人節我俾佢既衝擊太大… 

我忍唔住摸下隻戒指。 

哥:「唔好玩啦,佢呢種男仔行出街都執到五個啦,咁執着為乜?貪佢夠傻?」 

「你係想拍拖既,阿哥我隨時都可以介紹人俾你識,保證好過佢。 」 

好過魯路修..? 

我眼中唔會有人好得過魯路修。 

「只有佢,我眼入面只有佢,我將來一定要嫁俾佢。」 

阿哥:「隨便你,異地戀一定唔會有好結果,你肯等佢,但佢未必肯等你。 」 

「啪!」 

媽:「同我收聲,你係咪太耐無比我打過,無哂分寸?」 

大家都靜左落黎,阿哥掩住自己塊臉,應該好痛。 

「五年,五年唔見佢,得唔得?」 

Daddy突然開聲。 

我:「五年?」 

爸:「若然你五年唔見佢,之後都仲係話想同佢一齊,我唔會反對,做唔做到?」 

一時之間,我真係答唔到。 

五年唔係長,但亦唔短。要我完全唔見一個而家朝夕相見既人,肯定好辛苦。 

Daddy:「我唔洗你答我,你答你自己就可以,子朗,執碗。」 

媽:「唔洗諗太多,無論你想點,啊媽都會支持你,而家就好好珍惜同佢一齊既日子先啦。」 

仲有四個月,呢四個月入面,我要搵出答案。 

魯路修,你知道左呢件事既話你又會點做?我好想知,但又無膽去問。 

我唔想離開你..想一直都留係你身邊..想睇你笑,想睇你做一堆白癡野..