[校園][應該純愛][友情]「我想要你，仲有你既世界。」: 一家人
哇真係超緊張，個心幾乎跳左出黎咁濟。
估唔到我可以係咁多唔識既人面前唱歌，以前既我一定一定做唔到。
但因為有佢，我做到喇。
我都唔知點解自己會唱呢首歌，只係因為個腦第一時間彈左呢首歌比我，所以我就唱左呢首。
希望佢聽得開心啦，雖然我知道自己唱得唔算好。
Party完左，大家都開始散水，有D人就有下場，我就好想返屋企，因為真係好攰。
但作為一個紳士，我都係需要問下佢意見既。
我：「你會唔會想去食糖水之類..？」
Cherry：「唔喇，返去啦我地。
」 佢笑住咁同我講，但我知道佢唔係真心笑。
因為佢對眼紅哂，把聲都唔同哂。
佢又喊過黎？因咩事？太開心？
我諗唔通，實在諗唔通。
出到門口，我發現有一架好熟悉既車係門口。
係美星架車。
哇因乜解究佢今日咁好死包接送？
美星：「唷兩位靚仔靚女，我黎接你地啦。
」 我：「咁你幫我開車門啦仲企係度。
」 我諗咁多人係度，佢唔會打我掛？
我錯了，佢係會照打我既。
美星：「我可以幫你開既只有車尾箱門，你係咪會坐車尾？
」 我：「Sorry係我錯，當我無講過。
」 美星：「咁就快d去幫阿妹開門啦阿騎士先生。
」 我：「知道知道。」
我匆匆行去後座，幫Cherry開門。
我：「我既女王，請~
」 佢笑住咁行前左一步，突然好似恍然大悟咁停低左，仲回頭走向人羣。
我頭上有十萬個問號，完全唔知佢做緊乜。
過左兩三分鐘，佢係人羣度行番出黎，仲拖住一個人。
係Ada。
你到底想做乜野..？
Cherry：「反正都順路..不如載埋人..？」
美星：「好吖。
」 嘩乜你答得咁快既，你有無腦..呀，我意思係你有無諗過架。
不過司機都話好，咁我都無野好講。
作為一個紳士，我當然要俾兩位女仕上車先啦。
等佢兩個都上哂車，我就同晨哥佢地揮手道別再上車。
全程車大家都無講野，靜得恐怖令我好唔舒服。
好不容易終於返到屋企，等美星泊好車就可以返屋企，可以解脫。
泊好車我就第一個跳落車，幫Cherry佢開門。
Cherry：「唔該，你自己返上去先啦，我有D野想同Ada講。」
我：「吓我點可以俾你地兩個女仔咁夜自己行.
.」 美星：「咁我陪佢地啦，你返上去啦。
」 我好唔願意，但又再搵唔到理由留低，唯有返屋企。
Cherry你究竟想做乜啊。
返上樓既路，我不停係度猜想佢地會傾d乜？
會唔會出事架？不過有美星佢係度應該無事既，佢都叫做係個大人。
我拎起鎖匙，打開屋企大門。
咦有光既？美星有無搞錯，出去都唔熄燈？
「返黎嗱？咦佢兩個呢？
」 喂你兩個點解會係度..
我老豆老母突然出現係我屋企。
唔係話星期五先到架咩？
我當然有即刻問佢地啦，但得到既回答係咁。
「掛住你地咪早少少返黎囉。」
Bull Shit，居然想用呢d答案敷衍我。
我：「講啦，點解會早左兩日返。」
父：「老婆呢個仔真係唔可愛。」
母：「唉你兩仔爺真係…我地早左做完野咪早d返黎囉。」
我：「哦..咁點解黎左我度？」
父：「想見下屋企人唔洗理由架，而且呢d野唔重要，重要既係你啊，魯路修。」
我？我有咩重要？
母：「美星話哂我地知啦。」
係咩..
父：「魯路修，你仲記唔記得我同你講過乜？」
我當然記得啦…
我：「發生咩事都好，都要盡力維持呢段關係，唔好失去佢..」
父：「嗯，記得你就真係記得啦，但你有無咁做呢？」
做咩啫而家，特登上黎笑我咁話囉？
我有呀，我仲好辛苦添呀！
我唔敢直接講出黎。
我自己都唔知點解，可能我覺得自己根本無盡力啦。
呢個時候，Cherry同美星都返左黎。
Cherry：「Uncle Auntie？」
父：「Hi~住呢度慣唔慣呀？
」 我：「喂！
」 我想阻止佢，唔比佢亂講野。
母：「嚇親人喇，Sorry呀阿妹，我地好耐無見喇。
」 Cherry：「呃..係吖我地好耐無見喇，你地兩位最近幾好嘛？」
母：「好，當然好。」
父：「真係好有禮貌呢，好乖。」
美星：「喂你兩個咁夜上黎做乜？唔係單純為左見我地掛？」
嗱，美星就說出個重點來喇。
父：「唔，係喎都夜喇，咁我都無謂轉彎抺角喇，你兩個，到底想點？」
我：「咩意思？」
母：「即係問你地係咪真係打算分開五年？」
呀媽咁講完即刻成個靜哂，無人出聲。
明明已經就呢個問題有左共識，但每次提起都總係唔想開口。
或者我可能係度期待緊有變數？
父：「老實講，我已經當左阿妹你係我地既一份子，係我屋企人。」
「以屋企人既角度，當然希望你以讀書為重啦。」
呢個男人到底想點呀？
「但同時，魯路修都係我個仔，我希望佢過得開心，你可唔可以應承我，五年後點都要返黎搵佢？」
我一直都唔敢咁同Cherry講，怕咁做會束縛住佢。
老豆咁做，我都唔知係好事定壞事，我只係靜待Cherry既答覆。
Cherry：「絕對無問題，我保證。」
佢好快就答左，好似無思考過咁。
八個字，勝過千言萬語，我成個人安樂哂。
爸：「非常好，有你呢句就夠。咁我地都走啦，唔阻你地。」
兩老企左起身，應該準備走。
父：「魯路修，送我出去。」
吓？唉是但啦。
我送左佢兩個去lift口，陪佢地等lift。
等lift果陣大家都無出聲，又deadair，好麻煩。
打破deadair既又係佢，睇黎佢同我一樣好唔鐘意deadair。
父：「魯路修。」
我：「係，我響度。」
父：「我幫你講左心入面一直想講果句喇，而家你應該無迷惘啦？」
佢睇穿左我諗乜？
我無出聲，佢繼續講落去。
父：「根本由你知道佢要走果一刻開始你就無諗過要留佢。」
「因為你太善良，認為自己會阻住佢，但又偏偏放唔低佢，先會搞到自己心情咁複雜。」
「聽到佢咁講，你應該做到最後既決定喇？」
呢個時候，lift門打開左，佢兩個行左入去。
母：「你果然係個溫柔既人呢乖仔，我好開心你咁為人設想，就算明知自己會受苦都好。」
lift門好快就關上，留低我一個。
嗯，果然係一家人呢，佢地完全睇穿左我諗乜。
亦因為咁，佢地幫左我好多。
由她去吧。