呢一刻,係我腦入面幻想過無數次,但從來無諗過可以實現。 

哇,好開心,好想大聲嗌出黎。 

今日實在太多開心野,我甚至懹疑自己而家係咪發緊夢。 

首先係我終於可以見到佢著SUIT個樣,如我所料,真係好型。 

係佢身邊,好似有光包住佢咁。 





啊,今晚一定要同佢影張相,要提自己。 

最驚喜既都係晨哥叫我同lulu領舞,完全係預料之外。 

真係好多謝佢地,無佢地,我同魯路修可能唔會咁順利,可能好快就散,邊會有今日。 

不過我估魯路修佢唔會識跳舞,因為佢肯定覺得跳舞好麻煩。 

果然,佢一見燈光打落我地度就成個人都呆哂,好似完全唔知發生咩事咁。 





難得有呢個同佢跳舞既機會,我唔想錯過。 

我原本打算由我做主動,就算夾硬拉都要拉佢出去。 

但係,佢居然自己企左起身。 

「May I?」 

慘啦,我想喊。 





要忍住呀,唔係又要佢擔心架啦。 

我強忍眼淚,交左隻手。 

魯路修,你勇敢左好多,換轉係以前既你,一定打死都唔肯。 

見到你咁,我好開心。 

或者咁係我想見到既結果之一。 

就算佢明知自己唔識跳舞都好,佢都敢努力踏出第一步帶我去舞池,我好開心。 

之後,就交比我啦,我知你已經盡力架啦。 

佢好聽話咁將手腳都交比我,由我操縱佢既行動。 





我地兩個開始伴隨著音樂而起舞。 

慢慢,我開始聽唔到音樂,視界入面都只係得番佢。 

每一分每一秒突然都變得好慢,啊,咁就好喇,我都想咁。 

唔好喊啦..你喊既話我都會忍唔住喊架衰人… 

我已經再忍唔住,由得眼涙流。 

「要好好記住呢一刻啦,知唔知吖?」 

嗯,我知道。 





硬係覺得今日既佢成熟左好多,但無丁點陌生感,佢仍然係我認識既白癡lulu。 

我滿足喇。應該再無遺憾啦。

同佢跳完隻舞我地就坐埋一邊,睇大家跳舞同玩。 


我地大家都無講野,只係一直暗地裏捉住大家隻手。 

奇怪既係,大家都好似無想放開既念頭。 

唔可以架..我明明已經下定左決心,亦都因為咁先無視你果句「唔好走」… 

我想知,我地經唔經得起五年既考驗… 

我想睇五年後既你會變成一個點既人.. 





但我又好想一直係你身邊,睇住你… 

魯路修,我係咪一個好貪心既人啊…? 

唔好用果種眼神,果種好似同我講:「你做乜我都會支持既眼神」望住我啦.. 

我唔想再面對啊… 

「係!兩位靚仔靚女不如影張相? 」 

一把聲將我由沉思中拉走,係子琪,佢拎住部即影即有相機。 

我都未黎得切反應,lulu已經拉左我起身,面向鏡頭。 





我:「等等先..」 

我急急腳整下條披肩同條裙,亦幫佢整下件衫,希望以最靚最型既姿態影呢張相。 

因為呢張相,可能會係我一生人最貴重既寶物。 

「唔洗整啦,你同我都夠型夠靚架啦,望鏡頭啦。 」 

佢一隻手攬住我條腰,另一隻手托我塊臉等我面向鏡頭。 

「咔喳!」 

伴隨閃光燈既一下聲,張相已經伸左出黎,lulu隨即接過張相,小心翼翼咁拎住。 

但係,我覺得咁未夠,咁樣唔符合係我想要既畫面。 

我:「可唔可以影多張? 」 

子琪:「唔?見係你兩個咋,準備啦! 」 

lulu:「做乜要影多..」 

佢擰轉頭問我,我無放過呢個機會,一下出其不意咁錫左落去。 

「咔喳!」 

多謝你捕捉到呢一刻啊子琪,好多謝你。 

我搶係lulu前拎走張相,唔比佢睇到。 

梗係啦,呢張相係只屬於我既寶物黎架。 

咁就真係足夠啦。
「俾我睇下影成點啦~ 」 

「唔得~ 」 

「睇一眼咁多啦~ 」 

「話左唔得囉~張相我架。 」 

我地為左頭先張係度吵吵鬧鬧,當然係玩玩下個種啦。 

係我既銅牆鐵壁下佢始終都係要投降,無再問我拎張相,轉而陪我周圍行下食下野。 

音樂一首接一首咁播無停過,同大家既熱情一樣無停既一刻。 

大家好似熟左咁,已經打成一片,一齊跳舞。 

我拎起塊曲奇,咬左好細啖,唔,都唔夠我整果D好食既。 

話時話,佢去左邊?明明頭先仲係我後面架。 

「Hi…我叫Keith吖…頭先你跳得好好吖,賞臉同我跳舞嘛..?」 

吓!?做咩呀?咁突然既!? 

有一個唔識既男仔突然行到我面前邀請我跳舞,搞到我唔知點好。 

點算好吖,我唔識處理呢D野架… 

要點拒絕佢好吖… 

偏偏呢個時候lulu先唔係我身邊… 

「唷~唔好意思呀!想跳舞既請你搵第二個啦!佢係我既。 」 

我望下我後面,佢又突然出現返,滿臉笑容仲拎住兩杯野飲。 

個男仔聽到佢咁講就自己行開左,呼,真係嚇死我。 

我:「你去左邊呀! 」 

我忍唔住發佢脾氣。 

lulu:「eh…拎野飲比你囉,做乜事? 」 

我:「我唔係叫你唔好俾人撩我架咩。 」 

lulu:「我記得,今日我係你既騎士嘛,所以我咪趕走左佢lor。 」 

啊…佢好似又岩喎.. 

算啦今日我實在太易激動啦。 

若睛:「喂Cherry,借魯路修比我影張相吖,難得佢今日咁靚仔。」 

楚珊:「我又要我又要!」 

子琪:「咁唔差左我啦,等我集下郵。」 

大家唔知係邊度彈出黎,圍住我地兩個。 

問心個句,我唔想借比佢地影,你當我自私啦。 

今日我想佢完完全全屬於我,唔同其他人分享。 

但始終都係朋友,算啦由佢地。 

Lulu:「唔得,我唔影,今日我只屬於佢。 」 

佢扁哂嘴仲用手打左個X字。 

點解你總係要令我咁感動… 

我又開始想喊啦…

「又回到最初的起點…」 

咦?呢把聲係晨哥? 

大家都望上台,發現晨哥係度唱歌。 

大家開始歡呼助興,仲打哂拍子咁。 

晨哥開左個頭,開始都有其他人接力上台唱歌,大家都無再跳舞,改為係度聽歌。 

唱下唱下原來已經到尾聲,Party都應該要完。 

我見晨哥同子琪拎咪上台就令我更確信Party應該要完了。 

啊~今晚玩得好開心。 

我:「lulu你…」 

咦?佢又唔見左人既? 

搞乜呀佢成日都要人擔心既。 

晨哥:「好啦各位,接下來係今晚最後一首歌啦,大家俾d掌聲先! 」 

子琪:「有請! 」 

仲有人要唱歌? 

我俾呢位「壓軸」吸引到,望左上台。 

點解..lulu你會係果度.. 

佢一臉尷尬咁行左上台。 

lulu:「eh…我要唱既係台北下著雨的星期天…送比一個人..」 

大家都即刻一片「wow~」聲,而我只係雙手掩住嘴去掩飾自己既驚訝。 

「台北下著雨的星期天 你那邊現在是幾點」 

唔好咁。 

「享受著思念你的感覺 你和我 平行線」 

我就忍唔住啦,我唔想再喊。 

我咬緊牙關,嘗試唔比自己喊,但雙手仍然無離開過個嘴。 

我好辛苦捱過成首歌咁濟,但始終都係功虧一簣,涙腺輸左比最後一段。 

「等待再相遇那一天 你微笑的臉」 

「台北下著雨的星期天 不知覺 淚已汪洋一片」 

「好想你再回到我身邊 你和我 平行線 哪裡才是我們的交會點」 

聽到呢段我就忍唔住爆喊,停唔到。 

偏偏係呢首歌,呢d歌詞… 

魯路修,你究竟想我點..? 

你係咪真係會等我? 

會想我返黎你身邊? 

想再見我笑既樣? 

Party係一片掌聲中落幕。 

但應該無人注意到我既哭泣聲。 

今晚,超出我預期。