[校園][應該純愛][友情]「我想要你，仲有你既世界。」: 不要哭

黎啦黎啦，佢要講啦。 

今日既佢睇落成個人好精神，都係多得我份早餐同幫佢熨校服咋。 

我一手培育..可唔可以用培育呢？ 

總之，我都叫做幫佢做到「傑出學生」，唔知佢係咁多人面前會唔會多謝我呢？ 

應該唔會啦，我同佢寫果份稿都無提到要多謝人。 



講起份稿，唔知佢有無背好份稿呢？ 

我估佢背好左啦，行路咁有自信又無拎住貓紙。 

「校董，校長，各位老師，各位同學，大家好，我係5C班既魯路修。」 

唔，岩啦，無搞錯先後次序。 

你知啦，佢好容易搞錯呢d細節架，我怕佢出醜比人笑，擔心左我好耐。 



「首先，我對於校方頒發呢個「傑出學生」俾我而深感榮幸，多謝校長肯定我呢一年既努力。」 

「或者在座既各位會諗，咩係傑出學生？我起初都有呢個問題。」 

咦？我份稿入面無寫呢D野架喎。 

佢即場諗到既？又講得幾好幾得體喎傻佬。

「有老師同我講，呢個獎唔係年年有，係用黎肯定學生既努力。」 



「的確，我成績係有所進步，進步幅度大到可能嚇親人。」 

「當然，我為左咁付出左相當大既努力，但係咪只靠努力就可以令成績突飛猛進？」 

「係咪只係得「努力」呢個途徑先可以令成績突飛猛進？」 

「我既答案係「NO」。」 

「我絕對唔係鼓吹大家唔努力讀書，我既意思係，努力當然重要，但比起努力，我認為朋友更重要。」 

吓？冋我份稿完全唔同既？ 

「我有一班好朋友，呢五年黎佢地一直都支持住我。」 

「朋友，係我既動力來源之一，大家互相競爭，互相勉勵，令大家進步。」 



「除此之外，朋友亦會係你失意時扶你一把，令你振作，係你開心時替你高興。」 

「我想講既係，因為有朋友，係讀書既途上先唔會覺得孤單，大家要好好珍惜你既朋友。」 

嗯，講得岩。 

「除此之外，我仲好想藉著呢個機會多謝一個人，係邊個我唔講啦，佢應該知。」 

佢係台上面望住我，同我四目交投，佢仲對我眨左一下眼。 

Oh my god，佢講緊我？

「之前既四年，我同台下大多數同學一樣，每次結業禮都只可以睇人攞獎。」 



「但佢呢一年不斷鼓勵我督促我，令我改變左好多，更令我終於提起勁讀書。」 

「我拎到呢個獎，唔多唔少都係因為佢，我好多謝佢。」 

慘啦，我好想喊。 

唔喊得架。 

「係佢俾我睇到我自己身上既可能性，令我覺得「原來我都可以做到」，所以我先會咁努力。」 

「我今後都會繼續努力，我唔想辜負佢對我既期望，同時亦想對得住呢個獎。」 

「啊，唔記得講重點添。 」 

佢咁講惹黎全場大笑。 



「總言之，我希望大家可以好好珍惜時間同身邊人，同時係學業上努力。」 

「傑出學生呢個稱號係學校給予我既一個肯定，但我唔認為只要有好成績，有大進步就係傑出學生。」 

「只要大家盡力讀書，對得住自己同支持你既人，我相信各位就可以成為其他人心目中既傑出學生。」 

「希望下一個傑出學生會係台下既你，大家一齊努力。」 

「多謝各位。」 

佢深深咁對台下鞠躬，換黎台下既熱烈掌聲。 

我始終忍唔住，流左少少眼淚。 



魯路修，你今日成熟左好多。 

以前既你，一定會用D好唔耐煩既語氣黎講，不過你無咁做。 

雖然你完全無用到我比你份稿，但你講出黎既道理，絕對唔比份稿差，甚至更好。 

最重要既係，你無忘記到一直支持你，令你有呢一日既人。 

我一直都同你講，朋友好重要，睇黎你無忘記到。 

你係咁多人面前多謝我，我好開心，雖然我有幻想過多謝我既畫面，但始終不及真係聽到咁有衝擊力。 

你，係咪已經變成左一個成熟既男仔？ 

不過我唔討厭啊，你變成點都係我既魯路修。 

你係我既，你既世界都係我架。