屌,我到底講左D乜。 

我好似做錯野?無吖,如果我係講左d唔岩既野,班訓導就已經捉左我落台啦。 

大家都拍手,應該因為同意我講既野? 

但點解我硬係有種唔舒服既感覺? 

呢種係失落..? 





我講完之後就坐返低,司儀都話結業禮到此結束,學生返班房等解散。 

呼,終於結束啦,真係麻煩。 

咦,今日我好似無講過「好麻煩」之類既說話? 

可能因為成朝都集中哂d精神係個talk度啦,無時間分心落諗其他野度。 

有獎拎既人永遠係最後先走得既人,又要等,我都係坐多陣先。 





晨哥:「喂。」 

我:「唔?做乜?」 

晨哥:「頭先講得好好,好有feel。」 

我:「屌,講乜feel,你由一開始已經係成功個堆人,都唔洗人肯定。」 

晨哥:「我係話朋友果part。」 





我:「哈,心底話黎架。」 

晨哥:「我知,我當然知啦,話說暑假有無諗住去邊度玩。」 

暑假..?去邊度都好啦,反正只要有佢去邊都得,留係屋企我都可以。 

只要呢個幾月佢一直係我身邊就夠喇。 

咦,話時話,佢呢?唔見左人既? 

我周圍望左右隔離,但都見唔到佢。 

可能去左廁所掛。 

「喂,行啦魯路修。」 





晨哥拍我個頭咁講,原來終於走得,咁算啦放學先搵佢啦,而家返班房先啦。

我拎住幾張獎狀跟住晨哥尾返班房,沿途有唔少人望住我地。 


咁又係既,我前面果個人又靚仔讀書又叻,頭先仲要拎成七個獎,多人望都係係正常。 

呢個時候,有個女仔揸住部電話行過黎,睇個身高應該係Form3左右。 

女:「eh..可唔可以同我影張相? 」 

哇,而家d後生女咁進取既。 

睇下晨哥點俾反應先。 





晨哥:「當然可以啦,我好樂意吖。 」 

唔,配埋佢呢個笑容真係絕殺,抵佢咁受女仔歡迎。 

我:「拎你d野黎啦阿藍晨,我幫你拎住先。 」 

我特登唔講個洛字,玩下佢咁。 

佢揮手示意唔洗,走埋去個女仔旁邊。 

唉,咁算啦,我做下好人啦,幫佢地影。 

我:「咁我幫你地影啦。」 

我伸出手,示意叫個女仔比部電話我。 





但個女仔好似好唔想咁,仲同晨哥細細聲講左幾句。 

搞乜我今日係咁食檸檬 ,咁搞一搞令我無哂心情,想返班房了。 

我:「你應該都有排搞架啦,我返去先啦。 」 

晨哥:「喂~企係度先。 」 

我唔想睇你攬女影相吖,我會好提子架。  

不過晨哥既命令係絕對既,我只好乖乖轉身。 

我:「咩事呀。 」 





我扁起嘴,仲索鼻索左兩下,表示我而家好傷心。 

晨哥:「人地話想同埋你一齊影吖on9仔。」 

eh!?同我影相?好吖好吖!求之不得啦! 

有女女撩我影相,我好興奮吖!! 

唔得,唔可以表現得好開心,要cool D。 

我:「好囉我無乜所謂。 」 

就係咁,我同晨哥夾住個女仔影左幾張相。 

我無乜點笑,因為我知我一笑得大幅度d就成個on9仔咁。 

不過而家成個人都飄飄然咁,好容易就忍唔住笑到四萬咁口,搞到我表情管理得好辛苦。

「我又要影!」 

「我都要影!」 

一個接一個咁黎,有男有女,幾乎要排隊咁濟。 

我見勢色唔對,就同晨哥打個眼色,叫佢諗下辦法。 

晨哥:「Sorry呀各位,我地都要返去啦,有機會既下次再影啦,我一定會同你地影既。」 

佢講完就轉身走,我都急急腳咁跟住佢。 

我:「屌影左成五分鐘。 」 

晨哥:「你咪撚同阿欣講添呀,佢知道我同咁多女仔影相肯定會打死我。」 

我:「你怕條鐵咩,你認真既邊個會敢郁你。」 

晨哥:「佢肯定敢,我已經比佢打過兩次。 」 

屌,又好似係,阿欣係唯一可以剋制晨哥認真mode既人。 

行行下,原來已經去到班房,兩條友吹吹下水都唔知添。 

未入去已經聽到師父係度鳩叫,唔通已經開始派成績表? 

我打開門睇,又唔係吖,大家都無拎住野,只係企係度傾計。 

我:「門口都聽到你叫啦師父,咩事呀? 」 

師父:「Yo~你兩條友捨得返黎啦咩~」 

晨哥:「多事啦,我去左同魯路修談心咋嘛。 」 

全班:「Gay~~~ 」 

有時就係咁,全班可以突然同一時間講同一句野。 

可能係因為大家已經熟左,思想都開始變得類似。 

不過咁樣幾好吖,大家會更合拍,周不時又可以有笑料。 

我之後番埋位坐,問Jason點解師父鳩叫,原來係因為知道左班際比賽總冠軍係我地班。 

我聽到呢個消息其實唔意外,因為多得晨哥,我地一場班際比賽都無輸過,總冠軍預左架啦。 

不過,都有幾分開心既,因為話哂係同佢地奮鬥左一年既成果。 

好奇怪,我以前都唔會有咁既感覺,係今年先有。 

過左一陣,班主任帶住個獎盃同成績表上左黎班房。 

大家都接過成績表,但無人特別在意,大家都掛住影相,成班放個獎盃係中間影左張大合照。 

我同師父佢地都影左幾張,擺D on9 pose,我仲俾佢地抬起左。 

嘩,又真係幾開心,衰鬼我笑到停唔到。 

呢一年,結束啦,中五結束啦,九月我就中六啦。 

暑假都要開始啦,我同佢唯一一個暑假要開始啦。 

「喂,lulu,出面。」 

若睛走過黎叫我留意出面,原來Cherry已經係出面等緊我。 

全班人異口同聲咁叫我快D走,搞到我哭笑不得。 

我臨走前,係黑板前對大家講左句「多謝大家呢一年既照顧,祝大家暑假玩得開心」就走左。 

呢一年,呢一班其實留俾我好多美好回憶。 

我之後就同Cherry走左,開始我地既暑假。