[校園][應該純愛][友情]「我想要你，仲有你既世界。」: 日本我來了
正，可以同Cherry去旅行，仲要係日本，直頭係完美！
不過點解老豆要叫美星一齊黎呀！我打算二人世界架嘛！
唉，諗起都嬲，個死人港女咩都話哂事，又話要住咩酒店坐咩航空公司，麻煩！
好彩佢唔阻我plan行程咋，唔係我實發佢脾氣。
不得不提呢個港女真係去旅行去到熟哂，結果book酒店同機票都係佢搞掂哂，我乜都無做過。
話咁快，聽日就飛了，早機，05:30要去到機場。
行李喼已經準備好哂，我都已經pack好哂行李，隨時準備好出撃。
不過時晨就未到，我就先去召喚峽谷跑一趟先。
始終都係要同師父佢地夾先好玩，同街場玩無乜feel。
諷刺既係，我又停唔到手，係咁troll人。
「D野執成點吖。」
哦？係Cherry把聲喎。
我擰轉身望，原來佢企左係我房門口。
我：「唔？一早執好哂啦，你睇。」
我好有自信咁打開個喼比佢睇。
換黎既卻係佢既沉默。
我：「係咪有乜問題..？」
Cherry：「唉..你咁叫執好行李？全部都就咁塞哂入去就算？」
吓，執行李唔係都係咁既咩。
我：「咁我應該要點做呢老師？」
Cherry：「拎埋個喼出黎！我睇住你執！
」 我：「吓但我打緊LOL喎..
」 佢離遠望一望我個mon，鄒左一下眉就跨過個喼行到黎我面前，仲搶左我keyboard打左幾個字。
「抱歉，去拉個屎。」
我見到真係哭笑不得，ok u win。
Cherry：「行啦。
」 我：「Yes Your Majersity。」
我輕輕蓋上個喼，推出客廳。
Cherry：「首先同我拎哂所有野出黎，之後摺好D衫！
」 我：「係既係既。」
我唔敢反抗呀，我怕死。
我一件衫接一件衫咁摺，哇真係攰死人，突然覺得好眼訓。
唔知摺左幾多件終於摺好哂，我就眼定定咁睇佢眼色。
Cherry：「唔，得啦，逐件逐件整齊咁放入喼啦。」
佢好似軍訓D軍官check你洗野洗得乾唔乾淨咁check我D衫，真係好嚴格。
好彩無叫我重新摺過，如果唔係真係會死人。
我逐件逐件咁放入喼，結果出乎我所料。
奇怪啦，個喼多左咁多位既..
我望望周圍睇下有無衫漏左無放，係無既，全部都已經放哂入去。
我：「點解既..」
Cherry：「係咪唔同哂呢？執行李就係想咁，盡可能減少所佔空間，就可以放多d野入去啦。」
哇，我懂啦。
我：「謝謝大大無私的分享。
」 Cherry：「又係度玩啦？
夜啦快d去訓啦聽日早機。」 我望一望鐘，嘩原來已經十一點半，都係去訓好d。
我：「咁你都早d訓啦，聽朝見。」
Cherry：「嗯，聽朝見啦。」
我地講完早抖之後就各自返房，唔知係咪因為有體力勞動，我好快就訓著左。
誇張到要佢兩個打我我先識醒。
我地三個好準時到機場，搞掂哂寄行李D野就入左禁區。
食埋個早餐，我地就去到登機閘口等上機。
又等左一排終於有得上機，原來我地三個坐哂係左邊，我仲以為三個人一定係坐中間添。
我：「Cherry你坐窗口位睇下風景啦，我坐中間。」
Cherry：「哦..哦好吖。」
美星：「屌真係當我無到，好彩我唔鐘意坐窗口位。」
我就係知道你唔鐘意坐窗口位先叫Cherry坐窗口位，方便我親近佢唔洗理你呢個電燈膽。
日本，等我吖我好快到。