「去日本?點解係日本既?韓國唔好咩? 」 

對於lulu突然提出話要去日本,我有少少驚訝。 

Lulu:「因為我想去日本囉,點呀快d話我知啦,你幾時要走。」 

好少聽佢用咁硬既態度講野,佢做乜事? 

我:「20/8走囉..」 



lulu:「咁得啦,我地8/8出發,13/8返黎,好唔好?」 

佢真係好少咁積極話要做一件事,好似一定要做到咁。算啦唔好潑佢冷水啦,應承佢啦。 

雖然俾我揀我會揀去韓國,不過日本都唔算差吖,最緊要佢開心。 

我:「好吖,但今日已經係1/8,你sure你買到機票同book酒店? 」 

lulu:「eh…你肯同我去既,我會搞掂所有野,你完全唔洗擔心! 」 



佢拍左自己心口一下,好似想話我知佢好有信心可以處理好咁。 

正一傻仔,成個細路仔咁。 

好啦,就將所有野都交俾佢啦。 

我:「咁就拜託你啦,我去打個電話返屋企講聲先。」 

其實我都唔知媽咪佢地俾唔俾我同魯路修兩個人自己去日本。 



不過既然魯路修佢都講到出口咯,我都要努力D先得。 

就算佢地反對,要點鬧我,我都無所謂,我唔可以要魯路修佢失望。 

難得佢肯同我講佢想點,又肯自己搞掂哂機票酒店既野,令我只要同屋企講一聲就可以成行。 

試問我又點可以失敗呢?所以我一定要做到,就算我承受咩後果都要做到。 

咁講又好似誇張左少少,同佢去個旅行啫,應該唔會有嚴重後果既我諗,哈哈。 

不過我都係有少少緊張。 

我走入我間房,關上門,打左比媽咪。 

「喂?有乜事吖乖女?」



好似好耐無聽過媽咪把聲,有少少錯愕添。 

我:「無吖,有少少事想同你地講聲啫。」 

媽:「咁係咩事吖?」 

我:「我呢..想下星期同lulu佢去日本,13號返。」 

通話突然靜止左落黎,無人講野。 

我由電話裏隱約聽到媽咪佢同唔知邊個講野。 

「阿女話要同果個男仔去日本喎。」 



睇黎佢應該係同Daddy講緊野。 

我:「媽咪?」 

我大聲左少少,希望佢將注意力放番過黎。 

呢招果然有效,我聽到佢拎番起電話既聲。 

「阿女,我話你知,我地唔放心你地兩個自己去日本。」 

呢把聲唔係媽咪,係Daddy。 

我都估到佢地會咁,但我唔係一個咁輕易放棄既人。 

如果我係一個咁輕易放棄既人,我又點可能爭取到呢一年既時間? 



我:「我要去,如果係安全既問題既話,你唔洗擔心,我保證我可以照顧好自己。」 

「而且呢個係一個好機會,等我可以適應一下無你地係我身邊既生活。」 

我嘗試用道理去說服Daddy,即使我知道成功既可能性好低。 

Daddy:「唔可以,你兩個去實在太危險,我唔可以批准。」 

我:「唔好再阻住我!! 」 

我忍唔住發脾氣,因為我實在心急到無左耐性。 

我唔可以俾人阻住我同魯路修。 



「我已經得番二十日時間左右,每一分每一秒都變得好珍貴,點解你仲要阻住我.. 」 

「明明我已經應承左你會去讀書,點解你連比我地兩個係最後自己去一次旅行呢個咁簡單既要求都唔比?」 

「咁樣一D都唔公平,明明只係一個咁簡單既要求你都唔比… 」 

我忍唔住開始抱頭痛哭,電話果邊亦再次靜左落黎。 

係我無防備既一刻,有人係我耳邊拎走左部電話。 

「兩個人去唔比,咁三個人去得啦掛。 」 

咦..呢把聲係..? 

我抬起頭,擦擦眼淚望下眼前既人係邊個。 

原來係魯路修既爸爸。

佢對我揮一揮手,好似想我出去咁。 


我都未俾得切反應就被人帶左出廳,佢仲關上房門,令我睇唔到佢。 

而帶我出去既人,係魯路修既媽媽。 

「唷,好似好耐無見喇阿女。」 

我:「Auntie..?點解你地會係度既..?」 

lu媽:「無呀,原本我地兩個係想上黎搵你地三個食lunch既,但上到黎就見到佢忙緊。」 

佢?忙緊? 

我周圍搵魯路修,發現佢同家姐係房上緊網,好似好忙咁。 

我:「Uncle好似聽到哂我講電話..」 

lu媽:「一部分啦我諗,因為你真係幾大聲哈哈,我諗係房入面果兩個先聽唔到。」 

呢個應該係笑話,但我笑唔出,仲開始係捽眼。 

「無事既,諗定到時去邊度玩好過啦傻女。」 

Auntie輕輕咁摸我個頭,令我突然變得好安心。 

但Uncle係咪真係可以說服到我Daddy架.. 

「屌你要坐一定係坐ANA架喇! 」 

「屌!咪撚係我耳邊大叫呀八婆!你又無份去關你差事咩!  」 

佢地鬧緊交?咁大聲既。 

我望入佢房,見到佢兩個係度拉拉扯扯。 

我諗住入去勸交,但被Auntie阻止。 

Lu媽:「由佢兩個喇,無事架。」 

呢個時候,我房門都打開左,Uncle拎住我部電話行出黎,表情好輕鬆。 

Lu爸:「搞掂啦阿妹,你爸爸批准左啦,比番部電話你先。 」 

佢雙手遞部電話比我,我都用雙手接過。 

佢究竟係點做到… 

我見佢都應該傾左五分鐘,佢同Daddy講左D乜? 

「美星!」 

美星:「咩事吖老豆。」 

家姐一聽到Uncle叫佢就即刻係lulu間房行左出黎。 

Lu爸:「你同佢兩個一齊去日本。」 

美星:「吓點解要我。 」 

lu爸:「吓乜你唔想去?仲諗住洗費我包添,算啦唔好勉強 ,喂魯路修!你有無朋友想去日本?」 

美星:「喂我無話唔去! 我去吖! 」 

lu爸:「一時一樣 ,快d去訂酒店機票啦。」 

家姐都無聽完Uncle講完就已經衝返入lulu房。 

美星:「喂我都有份去吖而家!訂ANA!酒店要新宿京皇!呢間好正! 」 

lulu:「八婆!!  」 

lulu呢句令係廳既我地三個都哭笑不得。 

Lu爸:「咁而家無問題啦,記得玩得開心d吖阿女。」 

Uncle好細聲咁同我講。 

魯路修都有幾分似佢,一樣咁關心人,一樣咁幽默,唔知日後魯路修會唔會變成Uncle咁呢? 

「好!而家我地就去食飯喇,我肚餓喇! 」 

Uncle係廳度拍左一下手,好似示意我地要動起來咁。 

呼,多得Uncle日本之旅總算成行。 

希望魯路修可以令我好好享受下呢個trip啦,因為所有野都係佢plan,我只負責去。