[校園][應該純愛][友情]「我想要你，仲有你既世界。」: 最初的最後
究竟點解會心痛？我自己都唔知。
只係個心好唔舒服，好似有人緊緊握住我個心咁。
玩完煙花，我地三個就返去酒店。
美星在前，我同Cherry係後面跟住。
我拖住佢，但大家一句野都無講，只係一直默默咁行。
我相信，有時候無須講太多，安靜一下都係一個唔錯既選擇。
寂靜最終由美星打破，係入房前既一刻。
美星：「喂阿妹，不如上澡堂浸下？」
唔知係咪習慣左靜，Cherry好似嚇親，我從佢隻手感覺到佢個人震左一下。
Cherry：「好吖。」
佢用一個好平和既語氣答美星。
我係一邊睇，唔知點解有一種莫名其妙既心酸。
點解我覺得佢係度死撐咁既…
久違既直覺，我信唔信你好？
美星：「咁不如而家就拎野去，我好想快d沖涼浸下熱水。」
Cherry：「好吖，lulu你開門啦。」
佢仍然用個好平靜既語氣講，平靜到好可怕。
究竟佢咩事？明明頭先睇煙花仲係好開心架？點解突然會唔同哂？
係咪我又做錯左D乜？
我一路開門，一路諗自己有乜位做錯左。
結果我完全搵唔到自己做錯D乜，唉好煩吖好想問佢呀！
但我又問唔出口，成個人傻傻咁企係度望住佢執野。
Cherry：「你自己係房沖？定係會去澡堂？」
面對佢突如其來既提問，一下子我唔知點答好。
但混亂亦只有一瞬間，我既思緒好快就整理好。
我：「咁難得有澡堂，緊係去澡堂啦傻。」
我唔知係邊度搵到個笑容出黎答佢。
明明有野煩緊應該笑唔出，但只因為對象係佢，我好自然就笑到。
可能，我都係度勉強緊自己？
我好快咁拎左所需物品，等埋Cherry就出去準備去搵美星。
一出到去已經見到美星著住套浴衣企左係度。
美星：「行得嗱？咦你又去咩？
」 佢所指既「你」擺明係講緊我啦。
我：「唔洗沖涼咩，有得去澡堂就緊係去澡堂啦。
」 美星：「吖咁串既你，醒你一拳先。
」 佢走埋我度，輕輕打左我個肚一下，仲挨個頭埋我膊頭度，好細聲咁同我講左句野。
「去露天果個池，我會盡力比你聽到你想知既答案。」
！？
佢…
佢無等我俾反應就轉返身去搵Cherry。
美星：「咦做乜阿妹你唔換埋套浴衣？係咪因為佢係度怕羞呢~
一陣家姐幫你著！
」 佢又用返個個無忽正經既態度，令我好困惑。
佢睇穿左我已經唔係咩值得困惑既事，我困惑既係，佢想做乜同埋點做？
我地係澡堂前分別，我帶住疑惑同一個滿身㚖汗既身體走入男湯。
按照美星既吩咐，我沖一沖個身就行左出去露天浴池。
一出到去，見到左邊有幅石牆，我留意到石牆後有同呢度類似既燈光，仲有蒸氣。
石牆後應該就係女湯啦，距離咁近唔怪得美星叫我出黎，留心d既一定聽到佢地講野。
呼，好彩呢個家姐都叫細心啫，今次終於有用。
我搵左個最近石牆既位置坐低浸，開始等待佢地。
浸左一陣左右，我聽到有兩把講廣東話既女聲，毫無疑問係佢兩個。
好啦，靠你喇，我既聽覺，我要你幫我搵出原因。
「而家呢度得番我同你喇，話俾家姐知點解頭先突然唔開心？」
唔，呢把聲係美星，岩喇係佢地喇。
我合上雙眼，以隔絕其他干擾。
Cherry：「唔開心？我？點解咁講？我個樣好唔開心咩？」
美星：「你突然咁平靜，好似變到另一個人咁，係人都feel到你有野傻妹。」
Cherry：「唉，始終都暪唔到家姐你，我係有少少感觸啫，希望lulu佢發現唔到啦。」
Sorry，我已經發現左，其實好難發現唔到。
感觸，有乜好感觸呀佢？
「lulu頭先咪放左個煙花陣既，就係因為果個陣令我好感觸。」
吓，果個陣係想令佢感動，而唔係想感觸架喎。
美星：「點解會感觸？正常都應該係感動先岩架。
」 係囉係囉。
Cherry：「我突然覺得，我同佢會唔會好似D煙花咁，係最靚果一刻就消逝..」
又係咁，又係呢個問題。
我俾唔到安全感佢？點解佢又會諗返起呢D野。
美星：「呢D可唔可以叫做觸景傷情呢可..不過你對佢無信心？你覺得佢會被人搶走？」
Cherry：「我唔係咁既意思…我只係度諗，我地好快就要分開五年，五年之後我地可唔可以順利咁係返埋一齊，定係好似煙花咁，消失得無影無蹤…」
「我成日聽人講，異地戀最終都係失敗收場..」
「我走左之後，佢會變成點？我返黎之後，佢會唔會再接受我？呢D問題係睇完個煙花之後就突然爆哂上黎..」
老實講，我自己之前都有諗過同樣既問題。
可能頭先我心痛都係因為咁，多得佢無啦啦提咩「永恆中的剎那」。
不過而家知道佢為乜而態度突變，我總算放心左小小。
我甚至有小小開心，原來佢同我擔心緊同一樣野。
Cherry：「家姐你可唔可以唔好同lulu佢講吖，我唔想俾負擔佢，我想佢開心。
」 Oh shit…
美星：「唉~而家D後生個個都咁蠢既，永遠都想自己咩哂上身自己煩。」
我同意吖。
美星：「好喇我之後唔會同佢講架，你可以放心，我地都差唔多走啦，浸太耐唔好。」
嗯，唔洗你之後同我講喇，我已經聽到哂。
好喇，我都走喇，浸夠啦。
聽日仲要送最後一份禮物比佢。
我係澡堂外面等佢兩個，我仲飲左枝牛奶，嘩爽。
等左一陣佢地都出左黎，嘩，兩個人都著住浴衣，好日本妹feel。
美星：「唷~等左好耐？」
我：「又唔係等你，我等Cherry咋架。
」 我扮到完全唔知佢地講過d乜咁，用平時個種好搏打既語氣講。
美星：「嘖，有必要好好糾正下你既態度，話哂我都係你家姐。
」 Cherry：「係吖，對家姐要好D，你得呢個家姐架咋！要好好珍惜。」
比起美星，我更想珍惜你啊傻婆…
我越來越覺得我地好似，諗法好多時一樣，甚至連煩既野都一樣。
好難得先覺得你再唔係遙不可及，居然係係你就快走之前先感覺到，太可惜啦..
呢一切都黎得太遲..
不過！遲到總好過無到！而且我信你會返黎我身邊架！我信你！
到時候我一定會同你一齊，一定會！
所以…你去啦，開開心心咁去讀書啦！唔好煩呢D野啦！因為…
我都想你開心。就係咁簡單。
Cherry之後先去左美星房一趟，話要換番件衫同執行李。
都唔知點解要換，明明套浴衣著得佢咁靚。
但我無問佢，因為問既好似好咸濕咁。
我自己一個返房先，執下行李，較左個鬧鐘就上床訓覺。 唔知係咪因為有個目標，我好快就訓著左，一睜開眼已經天光。
我望望隔離張床，睇下佢訓醒未。
果然，佢未醒，之前幾日都係我醒先。
我放輕腳步，降低聲浪咁行去窗邊。
我打開小部分窗簾，睇下窗外既景色。
一望出去就見到大大個富士山係度，哇仲要係正中間，可以話一覧無遺。
比我預期既仲要好啊個view..咁就perfect池了。
呢個就係我想送比佢既禮物。
我行去佢床邊，輕輕咁拍佢，試下叫醒佢。
佢都好合作，唔係用左好多時間，佢就醒左。
Cherry：「咩事吖…我尋晚同家姐執行李執到好夜我好眼訓吖..
」 我：「我有野想送比你吖，唔好訓啦。
」 Cherry：「送比我..？」
佢卒下對眼，之後就落左床。
Cherry：「咁份禮物係邊..？
」 佢仍然用把未訓醒既聲缐講野，好得意。
我：「follow me。
」 我笑住咁牽起佢隻手，引領佢到窗邊。
我：「禮物就係窗簾後，自己打開睇喇。
」 佢聽到我咁講就好無力，好懶洋洋咁拉開窗簾。
「嘩…
」 預期中既反應呢。
我深呼吸左一下，望住個富士山講：「富士山，係我係呢個trip送比你既最後一份禮物。」
「你之前話想睇架嘛，呢個係我地第一次一齊去旅行既最後時刻啊，你要好好記住吖。」
「換句話講，呢個moment亦可以話係最初既最後。
」 我從富士山既景色中抽身，再次將注意力放番落佢度。
原來佢已經涙流滿臉。
我笑左一笑，將佢收入我既懷裏。
「但係，呢個moment唔會係我地既最後，一定唔會，我向你保證。」
我開始聽到佢既喊聲，仲隱約聽到佢叫我個名。
今次既日本之旅，亦在此告終。
即使知道分別在即，但我仍然玩得好開心，亦有好多回憶，所謂既「永恆中的剎那」。
當初有隨心所欲實在太好了。