[校園][應該純愛][友情]「我想要你，仲有你既世界。」: 「誤會，擦過，錯過」

「誤會」
 
五年後就可以再見返佢，可以重新同佢一齊喇。
 
上飛機果一刻，我係咁樣諗。
 
但我好傻，居然會認為佢真係會乖乖咁等我。
 
點解我會咁講？呢一切都係係我走左之後既第三年，當時我Yr1，佢Yr2。
 


我每年既暑假都會返黎香港，不過我唔會去搵佢，因為我要遵守同Daddy既承諾。
 
直至讀完書返黎，我都唔可以同佢見面，如果唔係我就唔可以同佢結婚。
 
「見面，係雙向既，若然我只係偷偷咁離遠望佢，咁就唔構成見面啦。」
 
我當時就有呢個諗法，所以我決定左一於咁做。
 
不過我亦規限左自己一年只可以咁做一次，因為我知道自己見得太多的話我一定會唔捨得。
 


我第一年返黎係係旺角見到佢，當時佢自己一個人係火車站橋底咁行，我係後面跟住佢。
 
第二年我係尖沙咀搵到佢，佢自己一個人係文化中心對出望維港，眼神好似好空洞咁。
 
呢兩次都係家姐話我知佢會係邊度出現既。
 
但第三次，亦即係第三年，我未搵家姐問邊度可以見到佢之前，已經係無意中見到佢。
 
我當時同父母仲有阿哥去將軍澳食飯，我見未有位住，所以想一個人行下街先。
 


行行下街，我見到佢。
 
佢拖住一個女仔，笑得好開心。
 
起初我都以為自己睇錯，所以我決心行近少少睇。
 
無論係眼，耳定係口鼻都同魯路修一樣，只係頭髮長左，好難說服到我佢並唔係魯路修。
 
就算真係咁岩有個人同佢咁似樣都好，世事總無理由會巧合成咁掛？
 
點解我會咁講？因為係呢個「魯路修」旁邊既女仔我係識既，以前仲好熟添。
 
無錯，個女仔係Ada林穎欣。
 
咁樣令我更加確信佢係魯路修，畢竟我知道Ada佢一直都鐘意魯路修。


 
一個巧合可以話係巧合，兩個巧合可以話係奇蹟，但三個巧合就已經唔可以再呃自己。
 
我必須要面對事實。
 
我見佢地兩個拖住手，笑得好開心，就好似以前我同魯路修一齊果陣咁。
 
啊…
 
一時之間唔知講咩好添…
 
心情好複雜，唔識形容。
 
我係咪應該要嬲？但我嬲唔落。
 


比起嬲，我覺得自己而家係傷心。
 
因為我個心好痛，好似俾人緊緊握住咁。
 
魯路修，我地唔係約定左要五年後再係返一齊架咩..？點解你…
 
算喇，我唔怪佢，要佢等我五年可能真係太長喇…
 
俾我知道而家同你一齊既人係佢就夠喇…起碼我知道佢係真心鐘意你…
 
我而家真係好想衝上去問佢點解要咁做，但我怕。
 
我怕得到既答案會令我更加傷心。
 
算喇…係我傻，係我太天真信五年唔見唔連絡都可以keep到…


 
算喇…
 
我開始轉身離開，因為…
 
因為我見到佢地準備kiss…
 
唉…
 
個心真係好痛好想喊…
 
要幸福啊，魯路修…
 
之後我無再搵家姐，因為已經再無搵佢既需要。
 


就係咁，我自己係果邊繼續讀書，之後兩年都無返香港。
 
呢兩年，我好想拍拖，但始終拍唔到。
 
個心始終放唔落其他人。
 
我搵唔到放低佢既方法。
 
我有諗過dup哂所有佢既野，但我做唔到，因為咁即係意味著我要捨棄成個中學時代。
 
原來，佢早已充斥係我既世界入面。
 
所以，我決定左係果日返去開始既地方，了結呢一切。
 
如果佢真係會等我，果日一定會出現係果度。

呢個係令我死心既最後方法。