[校園][應該純愛][友情]「我想要你，仲有你既世界。」: 擦過
呼。
我而家係咪可以叫做無左個女朋友呢？
正，可以去溝新女。
講笑搵第樣喇，我呢D毒撚又邊可以溝到女吖。
佢肯㨂我，已經可以話係一個神蹪啦。
所以我都應該好好回報佢，乖乖咁等佢五年。
佢應該會返黎搵我掛。
我懷住呢種信念咁去過呢五年。
你問我辛唔辛苦？話唔辛苦就呃你喇。
明明係有女朋友，但要自己去面對DSE，無佢係我身邊陪我為我打氣。
明明身邊都有唔少靚女FD單身，但自己就係無feel去追佢地。
甚至試過有個friend倒追我，但我都只可以拒絕。
我個心始終無辦法放另一個人入去。
所有異性全部都被我直接friendzone哂。
佢既出現同離開，影響左我呢五年黎既人生。
初戀總是深刻的，我終於都明點解D人會咁講。
佢已經深深咁刻係我既生命入面，係一個無辦法輕易磨走既刻印。
同佢一齊既果一年，可以話說係我目前人生中最快樂，最幸福既一年。
亦因為咁，所以先深刻。
縱使有人同我講LD唔會有好結果，尤其係我呢個case，叫我儘快放低，但我始終放唔低。
我始終留左一個希望比自己。
「佢五年後會返黎。」
就算已經出左黎做野，我亦無改變呢個諗法。
今日，已經係佢離開左既第五年。
我決定要返去六年前開始既地方。
時間，真係會改變好多野。
人會被時間改變，地方亦會因時間改變。
學校附近既商場，裝修過，唔同哂。
以前同佢食燒賣既小食店無左，變左順豐。
商場的確係靚左好行左，但就係無左果種feel。
果種名為「回憶」既feel。
我一路行，一路係腦入面比較商場既樣貌。
我始終係鐘意以前既多d，可能因為有人情味d？而家好似好冷冰冰咁。
我終於明白點解近年d人會係咁提「集體回憶」，我都開始有同感。
皇后碼頭，天星碼頭拆我都無乜感覺，到成日去既商場唔同哂先有感覺。
我可能都係港豬喇..
啊，好似講遠左添，都係時候上去喇。
「唷~魯路修！好耐無見喇我地！」
唔，邊個叫我？
我四圍望，睇下係邊個仆街大街大巷咁大聲叫我。
咦，有個女仔行緊過黎我呢邊喎，仲望住我，係咪佢？
但我唔認得佢喎。
「你仲係無變喎，同grad果陣一樣。」
邊位呀你？
我一時忍唔住，直接講左出黎。
「我吖，若睛吖。」
佢係弱智？
時間真係可怕，只係幾年，若睛成個人都唔同哂，索左MK左，好正。
不過就算佢咁正，我都唔會有feel，因為我又會諗起佢以前中學既事。
咁搞到我有少少期待Cherry會變成點添。
我：「喂喂喂，你唔同左好多喎弱智，你唔叫我真係唔會知係你！」
若睛：「係咩哈哈，你就完全無變囉。係呢？你返黎做乜？探miss？」
我一五一十咁同若睛講哂我既意圖。
若睛：「哦…係喎，已經五年嗱…」
我：「係吖，喂唔講啦，我要上去啦。」
若睛：「喂我同你一齊上去啦，反正我無野做。」
嘛，無所謂啦，當敘下舊囉。
沿途行去後山我同若睛一直係度傾呢幾年大家過成點，佢仲話自己大把人追，搵鬼信咩。
上到去公園，得個阿伯係度。
唉…
若睛：「喂魯路修…」
睇黎若睛已經想安慰我，都係要收起自己既情感先，唔好要朋友擔心我。
我：「我無野吖，你可唔可以走先？我想自己一個人係度一陣。」
若睛：「eh…」
我：「唔該你吖。」
我望住佢對眼講，用一個堅定既眼神。。
若睛：「咁好喇，有咩事就call我吖，食飯吹水都可以call我架！下次見喇。」
佢一邊向後退一邊講，真可愛。
等若睛離開左之後我就自己一個係度圍住個公園行。
「同上年無乜分別呢…」
我之所以會咁講，係因為我每年既呢一日我都會返離呢度。
啊…
出乎意料既平靜呢我。
可能我自己都一早做好心理準備會有呢個結局啦…
我只係想再見佢一次啫，好過分咩呢個要求？
我行去鞦韆果度，想話懷念下舊日回憶同重拾童新，卻被我發現到一封信係上面。
信上面寫住「給魯路修。」。
係佢？
我急忙拆開封信，見到入面只有四個字。
「要幸福啊。」
呢手字，無疑係佢。
我周不時會睇佢寫既日記，所以我認得。
咁即係點…？
叫我要幸福..？
即係講分手..？
「呢封信係今日有個女仔放係度架哥仔。」
一直係公園另一邊既阿伯唔知係幾時行左過黎。
今日？即係Cherry今日黎過？
我：「咁個女仔幾時走架？」
阿伯：「唔…你地到之前五分鐘左右喇我估，你地途中可能遇過，個位小姐著白色裙。」
白色裙..？
講起我就有少少印象！頭先行上黎果陣有見過有個女仔全程dup低頭咁落山！
屌！
我即時想去追，但又停低左。
阿伯：「唔去追？」
我：「分左手啦，無謂搞到人喇。」
我一邊拎住封信係度fing，一邊苦笑。
算喇，可能佢已經遇到一個比我更好既人呢？
可以同佢擦過就夠喇。
我係咁同自己講，但眼淚就係停唔到落黎。
完了吧，如無意外…