【好想同你講下野】一隻厹的日記: 17

送走咗冬天，春天終於黎到。 


其實我好憎春天，因為春天好潮濕，濕到成地水，我會成身都好唔舒服。 


以前舊屋企，會有陣霉臭味，但好彩而家黎到新屋，阿澄間房好香，媽咪又好注重清潔，咁先無再有咁嘅味道。 


不過我仍然好唔鍾意春天，我啲毛好濕呀。 




但阿澄好似好鍾意春天，同埋佢今日成日都好鬼祟，又會偷偷望住我奸笑。 


「笑咩啫你？」 


「阿波，你今日好似好精神。」 




「你會唔會誤會咗我？」 


「哈哈，睇黎你真係好開心。」 


「唉。」 




佢摸下我個頭，然後就走咗出街。 


咦，好奇怪，呢個時間佢應該唔會出街架啵。 


睇黎佢今日都真係有啲怪...... 


不過我不得不說，雖然我唔鍾意春天，但春風的確好舒服。


好似食綿花糖咁甜，甜到我不知不覺間訓著咗...... 




我發夢，見到阿澄，見到爸爸媽媽，見到我地係一個公園好開心咁玩，最奇怪嘅係，我好似係企係度。 


真係一個奇奇怪怪嘅夢。 


狗點會企係度呢？ 


「Happy birthday to you~ Happy birthday to you~ Happy birthday to 阿波，Happy birthday to you~ 」 


我猛然醒起，就望到阿澄，仲有全家人都係我面前。 




「哈哈，醒啦阿波，今日係你生日呀。」 


「我生日？」 


「戴上呢頂生日帽先啦。」阿澄唔知邊度整黎一頂帽，然後笠落我個頭嗰度。 


跟住媽咪拎咗個蛋糕出黎，蛋糕白雪雪，有啲五顏六色嘅公仔，上面有塊牌寫住：「阿波生日快樂！」 


原來，係我生日？ 




「阿波，你許個願先啦。」阿澄用佢好綿柔嘅手遮住我隻眼。 


許願？ 


我諗唔到我想要咩。


我淨係好想係阿澄身邊，一世。 


「wow，吹蠟燭啦。」佢呼一聲就將枝蠟燭吹熄，吹走咁濟。 




「你許咗咩願呀？」阿澄笑尾尾咁望住我。 


「講咗出黎咪唔靈囉。」 


「係咪想同我永遠一齊呢？我都估到架啦！」阿澄又攬住我。 


呃......咁都畀你估中咗。 


因為，我真係得呢個願望。