【好想同你講下野】一隻厹的日記: 16

天氣凍起黎，啲人就會開始癲。 


大部份人都咁係度「黑痴黑痴」咁打黎打去，最初我唔知咩黎，以為係一種習俗，慶祝冬天嘅到來，就會講句：「黑痴黑痴！」 


就好似新年嗰啲咩：「恭喜發財。」 


原來呢種叫感冒。 




我仲以為得狗先會感冒，原來人都會好似狗咁病，會流鼻水，會發燒。 


我留意到一種現象，通常會有兩種病人，一種係病咗但堅稱自己無病，死都要扮強人。以爸爸為例子。 


另一種係病咗會好需要人關心，以阿澄為例子。 




阿澄一病，成個人就會嬌嗲好多，會成日撒嬌，嗲媽咪關心佢。 


「媽咪，喂我食粥好唔好呀？」 


完全唔似平時好獨立堅強嘅佢。 




有時我都係度諗，係咪人一病，個心都會病，脆弱咗好多要人關心呢？ 


我記得嗰日，我同阿澄嗌交。原因係佢想剪我啲毛，佢一直好想將我剪成波咁，我彩佢都傻，我仲唔夠似波咩，我就四圍走，無理到佢。 


「喂！阿波，你而家係咪唔聽話呀？」 


明啦係嘛？你要我講出口都傻嘅。 


你剪到我咁低B，我點出去行呀？仲有狗叫我波哥嘅？




然後我地就僵持狀態。 


結果無幾耐，佢就病得好厲害，燒到38.4度。（其實我對數字真係無概念，不過聽聞好似好嚴重） 


係床度訓咗一日，完全落唔到床。 


我一直都好擔心，媽媽亦都係，佢不停咁進出房間，幫阿澄換冰袋，喂佢食藥又抹身咁。 


我就係度，望住，乜野都做唔到，嗰一刻，其實好似自己有一對手，可以照顧阿澄。 




點解我要係四腳動物呢？ 


嗰日，我係咁試我用兩隻腳企，我好想我好似人咁，識兩隻腳行路，用兩隻手。 


但我一企，一、二、三.....五，通常五秒我就會跌返落黎。 


我再試。 


一次，兩次，三次，四次......十次，十一次......二十次.....三十次。 




我都唔記得我試咗幾多次，直到我聽到阿澄好微弱嘅聲音叫：「水......水......水呀......」 


佢想要水！ 


我立即衝出房門，跑去廚房同媽咪講！ 


點知媽咪好大反應，然後鬧：「喂，你做咩入咗黎架？出返去！」 


「唔係呀！阿澄想要水！」

「同我出返去！」 




「阿澄要水呀！」 


媽咪最後一野趕咗我出廚房。 


唔得，阿澄無水死咗咁點算？ 


我衝返入廚房，對唔住都要做一次，我咬住媽咪褲腳，想拉佢入房，佢立即嚇到哇哇大叫，係咁用拖鞋打我，一路打一路鬧：「衰狗！畜生！咬我？」 


我死命扯佢入房門邊，佢終於聽到阿澄叫。 


呼，好彩佢最後都知。 


嘩，不過畀佢打到個頭好暈，好似起咗幾幢樓咁。 


媽媽打人真係幾痛。 


飲完水之後，阿澄又迷迷糊糊咁訓咗幾個鐘。 


我都跟住佢一齊訓，直到佢叫醒我。 


「阿波......」 


我一張開眼，就見阿澄眼仔碌碌咁望住我，好似好返唔少。 


「阿波。」 


我好想唱返首「誰輕輕叫喚我」，但我知道呢一刻唔係講笑嘅時候。


「我好凍呀。」 


凍？人點解咁少毛髮保護自己，著埋衫都叫凍，究竟人係進化咗定退化咗呢？ 



不過我又好似離題。 


「咁你想點？」我問佢。 


「你上黎呀。」佢好似隻招財貓咁招我過去。 


唉，我真係無骨氣。 



我跳上張床，佢打開披畀我捐入去，然後就攬住我。 


我感覺到佢個身好凍，真係幾凍，睇黎係退咗燒，不過唔太夠暖。 


「你會唔會好凍呀？」佢柔情咁問。 


你而家先問會唔會太遲呀？ 


不過算數。 


我搖搖頭，表示無問題。 


佢即刻好開心咁笑，錫咗我一啖，然後話：「你好得意呀阿波，如果以後都可以攬住你就好啦。」 



我都好想，好想可以陪你一世。 





















唉，唔知點解永遠都嬲你唔落。