【好想同你講下野】一隻厹的日記: 21

「點解你呢排個樣好似好苦惱咁嘅？有野煩呀波波？」阿澄歪住頭問我。我無理佢就行開咗。 


因為我畀佢睇穿咗，阿澄果然係阿澄。 


其實係咁嘅。 


人對日子好似好敏感同重視。 




狗因為對數字本身無概念（都話淨係識9)，所以日子當然都會唔記得，出咗世咪出咗世，你出世嗰一日，永遠都唔會再重頭黎過，但人就會好重視呢啲日子，要紀念一下。 


所以就會咁多咩生日、咩咩紀念，咩咩週年。男嘅要準備好禮物呀花呀心思呀餐廳呀，又或者一大班朋友要準備時間地點去慶祝， 



有時我係度諗，究竟係咪拎黎做藉口去玩架咋？ 





有邊個真係會係嗰個人生日裡面，好深刻咁反省：「噢，呢個人出世，到底佢出世嗰刻係點架呢？痛唔痛？開唔開心呢？」
又好似唔會咁樣。 


你唔怪得我地去質疑架啵。 




總之，好奇怪。 


基於咁樣，我就知阿澄生日一定好重要。（我係偷聽到爸爸問佢想要咩禮物） 


再講啦，佢上次都幫我慶祝咗，今日無理由唔幫佢架啵。 


所以，我就好煩惱。 


我知阿澄好鍾意書，特別係小說，佢一日臨訓前都會係咁睇書，放假都係睇書。 




送書其實都係一個唔錯嘅選擇。 


另外，佢亦都好鍾意火影，海賊王嗰啲漫畫，求其搵個咩路FLY，名人畀佢，佢都應該會好開心。 


又或者公仔啦，女仔鍾意公仔嘛，實無死。 


雖然好似好簡單，都知道哂佢想要乜，但...... 


我點買呢？ 




人送禮物畀人就話易啫，狗可以點？ 



其實我基本上上述諗嘅都可以係廢。 


送返一啲我能力負擔起嘅。呃......狗糧？路邊的野花？ 


痴線。 



第一，狗糧佢要黎做乜，連狗糧都係佢畀我。 




第二，路邊的野花不要採呀，都有歌你唱啦。 


為咗呢樣，我苦惱再苦惱。 


我係度諗，即使我送到一份好貴重嘅禮物畀佢，佢都唔會知係我送畀佢架啦。 


咁倒不如？回歸最簡單？ 


唔知係咪因為臨近生日，佢近排嘅心情都好似好好咁。 




我要快啲準備好禮物。 


趁一個無人嘅時間，我決定出街去搵.......