【好想同你講下野】一隻厹的日記: 22

屋企對門柄好鬼矮，我兩三下已經搞掂咗佢。 


EASY啦，原來開門就係咁簡單，咁睇黎我以後想走佬都幾易。 


我衝咗出去，屋企附近我都認得路嘅，因為平時散步、跑步都係呢啲地方，我都知呢度方圓百里都唔知有野架啦，所以我決定行遠啲。 


我係咁向前跑，跑呀跑，過咗屋企啲樹林之後，沿途都係一啲高樓大廈、商場咁。 




好似乜都無咁。 


我想搵啲特別啲嘅野呀。 


我跑到去一個公園附近，見到有隻貓係公園長櫈嗰度伸緊懶腰，我就走入去問下佢。 




「你知唔知點先有啲特別野？」 


「咩特別野？」佢問返我轉頭。 


「我唔知呀，總之唔係啲商場嗰啲啦。」 




「唔會有架，香港係得呢啲架咋。」

「咁咪好可憐？」 


「呢度嘅人鍾意咁嘛。」 


佢問住我，用好奇怪嘅眼神望住我：「你無主人咩？」 


「我有呀，你無？」 


「我主人係度。」佢望一望對面，有一個阿叔係公園門口賣玫瑰花，一枝枝塑膠袋裝住個種，個畫面好怪...... 




「你到底搵咩？」佢又問我。 


「我都唔知呀，不過我覺得花都唔錯。」 


「無可能啦，要錢架。我唔會畀你偷。」


得罪講句，我心裡好質疑到度呢隻貓可以點阻住我，不過.....算啦。 


「你都係搵其他野啦......」佢都未講完，阿叔突然大叫：「偷野呀！喂！」 




原來有個麻甩佬偷咗阿叔袋錢，擺明蝦阿叔，因為佢完全唔夠個賊跑。 


豈有此理。 


我立即狗衝去追賊，幸好我平時都訓練有素跑開步，咦押韻，離題添，我好快就追到個賊好近，佢一野轉咗入後巷，但我貼得佢好近，佢係咁轉頭見到有隻狗追佢，更加驚，嚇到喘哂氣咁，我一個跳步就撲咗去佢後背，咬住咗佢個背脊，佢一個反手打落我個嘴到，嘩，牙都軟埋，勁痛，佢係咁打，但都被我咬住，最後佢頂唔順，拋低咗個錢包就跑走咗。 


痴線，我被佢扑到流牙血，洗唔洗睇牙醫？ 


我拎住個錢包返去畀個阿叔。





「＠＄＠＠％＠︿︿」老實講阿叔啲口音太勁，我實在聽唔明佢講咩，不過我諗係多謝我之類，因為佢係摸摸我個頭講，然後仲請咗我食野，畀咗一枝玫瑰花。 


「畀你送畀你主人，等佢訓練得你咁好。」呢句我終於聽得明。 


咦？？ 


咁我終於有禮物送畀佢。 





「生日快樂呀阿澄。」爸爸媽媽送哂禮物後，去咗切蛋糕。 


我乘機拎枝花出黎。 


「生日快樂呀阿澄。」我咬枝花畀佢。 


佢睇到之後好驚訝。 


「你點得返黎架？」 


「呃，打架打返黎。」 


「你愈黎愈識哄女仔啦點算？不過......」佢錫咗我塊一啖，然後講：「多謝你阿波，我好鍾意呢份禮物。」











你鍾意就好啦。