【好想同你講下野】一隻厹的日記: 32
陳師奶好大頭蝦，哩個係係人都知。
當阿澄帶住我去跑步時，如果遇見陳師奶，佢第一句會係：「跑步呀？」
其後，佢就會摸一摸佢個褲袋，然後大叫：「哎呀，死啦，我帶漏咗帶銀包。」再急急腳衝返屋企。
係呀，佢勁無記性。
其實佢無記性都唔太關我事，畢竟都係佢屋企嘅野啫。
問題係，佢成日叫錯我個名。
「阿初，你今日幾精神啵。」
初你個頭，我叫阿波呀。
個名係阿澄幫我改架，唔畀你亂改。
我係極力反對佢叫錯我個名，不過每次佢都當我熱情，咁就算。
去到後來我都廢事理佢。
陳師奶無記性嘅記錄，最勁可以去到唔記得接個女放學。
你都咪話唔誇張。
不過，即使係咁，陳師奶都算係一個好人黎嘅。
只係佢之後做咗件事，都影響幾深。
「阿波。你有無諗過結婚呀？」
我仲記得嗰日，食完飯之後，阿澄係間房度問我哩個問題。
「無呀。」
其實問我都係哂事，我對啲狗女都無興趣。
我只可以話：「我淨係想陪住你咋。」係佢身邊挨住佢。
阿澄好似聽得明咁，笑笑口講：「你越黎越識講野啦。」
「係咩，可能為咗哄你掛。」
「有人話要畀你陪一世咩？」
「就算你唔畀我陪，我都要死纏住你。」
佢最後無再講咩，只係笑住咁望住我。
其實我覺得咁樣都已經好幸福。
我係講真。
如果問我，幸福係咩，我會答，陪係阿澄身邊，因為佢係我中意嘅主人。
嗰晚我地照舊睇戲，照舊食宵夜，照舊佢又掩住我隻眼，唔畀我睇啲恐怖野。
一切都好照舊。
佢都好照舊睇睇下訓著咗，好安心咁訓。
然後，嗰晚陳帥奶屋企火燭......
我地狗仔唔識生火，所以一直都覺得，生火係人類嘅專利。
有咗火，人類就可以將啲肉煮熟，又可以照明，又可以取暖同埋趕退啲野獸。
火真係好厲害。
不過，雖然火咁厲害，但佢係殺人方面都好鬼厲害。
可以將一個人殺死。
本來，我都覺得咁多人類住埋一齊，唔同於以前分開一個個山洞，其實一個火燭咪好大件事？
的確係。
無人話畀我地知。
原來火係可以燒得咁勁，咁快。
嗰晚，陳師奶好似唔記得煲緊野唔記得熄火。
咁佢個屋企就燒到乜都無哂。
由於我地屋企都叫同陳師奶一家有啲交情，所以佢地成家人都暫時過咗黎住住先。
當然仲有Diana。
Diana似乎被場火嚇親，無哂平時嗰種公主傲氣，反而係落魄樣。
「阿波，我好驚呀。」
「唔需要驚。都無事啦。」我安慰佢。
「會唔會仲有火架？」
「唔會架啦。」
係陳生住係我地屋企期間，都算幾打擾，因為無啦啦多咗幾個人。
不過咁，仲要其實佢地都幾唔客氣同幾嘈。
阿澄知我唔中意嘈，所以就會成日帶咗我落街跑步。
然後我地係跑步期間，撞到一個人。
黑框眼鏡男。
最初阿澄見到佢時，個樣好似無乜野咁，但我感覺到佢內心其實好唔平靜。
因為佢隻手好不自覺咁震緊。
「你黎做乜野？」
眼鏡男無講啲乜，淨係行前話：「我係度等咗你好耐啦。」
「無人知你係度等。」
「大約一個鐘左右啦。」佢好似無聽到阿澄講野咁。
「你黎做乜？」阿澄又問。
「黎搵你。」
「我無野同你講。」
「但我有。可唔可以聽下我講。」
阿澄最初個態度好堅定咁想拒絕。
「畀幾分鐘我呀。」個男仔個態度好似哀求咁。
「阿波，你係度等我，唔好行開。」
佢地行遠咗一個地方傾，唔知講咩，我淨係見到阿澄由最初好冷淡，到望住個男仔，到眼濕濕，到喊，到個男仔攬住佢。
一切好似天氣咁，由陽光變天陰，一切都變得好快。
點解阿澄會原諒佢嘅。
我唔明白個男仔究竟講咗乜野。
我決定行近佢地，然後淨係聽到阿澄話：「咁我買枝水畀你。」跟住轉身就見到我話：「咦，阿波你過咗黎嘅？你陪住佢先，我好快返。」就跑走咗。
我啤住個男仔，我總係覺得佢係唔知做咗啲咩，或者施咗咩魔法畀阿澄。
「望咩啫你。」佢對住我講。
「所以話，我最憎狗。」然後佢電話響起。
「喂？bb呀？無呀，我同緊朋友一齊呀，係呀，好快打返畀你，乖，錫錫。」
吓？
雖然我無讀過書，不過憑我多年睇師奶劇嘅經驗，哩啲好明顯係出軌！
佢又想呃阿澄！
我一時太嬲，然後對住佢係咁吠，佢就係咁鬧：「你嘈乜呀衰狗！」
「你呃阿澄呀而家！」
我忍唔住衝去咬佢，然後突然阿澄大叫：「阿波！停手呀！」
「你做乜咬人架阿波！？」
「阿澄，係佢對你唔住先架，唔好信佢呀，佢呃你架！」
「係囉，可能佢唔中意我啦。」個男仔加把口。
你仲嘈！
我又想上前咬佢，然後阿澄阻住咗：「你又黎，你咁唔知錯，就唔好再認我做主人！」
「咁又唔洗嘅，可能我地太好，佢唔開心主人同其他人咁親密啫。」佢講完之後，將隻手搭去阿澄肩膀。
你個衰人又黎！？
我嬲得仔，一野就咬咗落去佢隻腳，佢痛到係咁叫，然後阿澄拉開我：「你以後唔好返黎啦！走啦你！」
佢喊住咁講。
我......
「走啦你，我無資格做你主人。」
........
其實......
我好想講，但我......
我跑走咗。
我係街度流連咗唔知幾耐，去到好夜好夜先返屋企附近。
我有諗，阿澄會唔會係咁搵我。
係無聊等待期間，我望個屋企，然後我發現屋企有啲唔委。
好似有啲火咁。
屋企火燭？
或者無人知道，到底陳師奶可以重蹈覆轍幾多次，或者點解佢咁堅持要煲野。
不過佢就係煲咗，然後又唔記得熄火，就訓咗。
哩個我後來得知。
我即刻窗爬上屋企，好彩門窗無鎖，我一入到去，就有少少窒息嘅感覺。
當我察覺到哩種感覺時，先驚覺大件事。
因為啲煙已經去到飄哂成間屋嘅程度。
果然，有無數煙由廚房嗰度飄緊出黎，仲係洪洪烈火，好似開咗好多燈咁光。
而且我仲感覺到一股好強嘅熱力。
最弊嘅就係，我睇到啲火已經慢慢咁燒緊出黎，想係廚房衝出客廳。
而門口就正正係廚房隔離。
即係再遲啲就好可能走唔到？
我走去客廳不停大叫，係咁吠，希望叫醒啲人。
其實陳生一家人就係客廳訓，但佢地唔知做乜，燒到咁都仲唔醒。
「喂醒啦醒啦！」
我係咪叫黎叫去佢地都唔醒，痴線。
然後......
「做咩呀？」Diana無啦啦醒咗，終於有狗肯醒實在太好。
「做咩？火燭呀戴安娜！」
「吓？」佢個吓真係完美反映一個無知少女嘅真實反映。
「咁點算？」
「快啲叫醒哂佢地先啦。」
我腦海突然閃過阿澄，係啵！阿澄仲未醒架！
我叫Diana叫醒陳生一家人，我就衝返入房搵阿澄。
阿澄，我黎緊架啦！
入到房，發現阿澄雖然仲訓緊，但已經皺起哂眉。
哩個時候，我發現雖然火未燒到，但啲煙真係越黎越多，突然對我更加辛苦，完全好似無空氣咁。
「阿澄，醒下啦！」
我唔理三七二十一，就跳上張床度叫佢。
「阿澄醒啦。」
跳咗幾下，阿澄終於張開眼。
「阿波？你終於返咗黎！？」佢攬住我。
而家唔係講哩啲嘅時候！