「Hello」 21:55 
一句好行既開場白。 
「Hi」21:55 
一句好行既回覆,我叫藍偉揚,而Hi返我既女仔叫阿欣,我同佢識左大約…六日零十一個鐘左右,但係宜個女仔將會改變我打後短暫既日子。 

上星期日因為某D關係參加左一個社區中心攪既日營訓練,一路聽住講者沉悶咁對住個POWER POINT咁搬字過紙照讀,我對眼就一路咁四維望,希望可以搵到D野解下悶,橫掃左成個禮堂兩三次之後終於望到個眼睛細細,頭髮長長髮尾微曲,著住灰色外套,黑白間T-shirt,藍色牛仔褲既女仔,唔知點解一個平平凡凡就咁就吸引住我既眼球,而佢就係阿欣。 

時間一分一秒咁過終於捱到去下午時間,下午既活動同上午好唔同,因為我地玩左個叫「羅馬炮架」既活動,大致上就係用竹同繩去紮個架出黎互相射水彈既遊戲,而好幸運咁我同阿欣編左入同一組,等我可以近距離接觸依個女仔,原本以為佢會係一個姐手姐腳既港女,會開口埋口就話難話辛苦,點知原來佢打繩結都有一手,咁熟手一睇就知佢平時玩開SM ...屌...我係想講佢應該係玩過女童軍先啱。 

真係快樂既時光過得特別快,下午既活動都差唔多完結,講左咁耐大家係咪都覺得個故好悶,因為身為一個小毒撚,我到宜家都仲未有膽去撩阿欣講任何一句說話,但係唔知係個天可憐我呢個毒撚,阿欣竟然主動走過黎我身邊開始左我地既對話。 



「喂!」 
四下無人既情況下我竟然回頭望下佢係咪同我身後既人講野 
「下...你喂我呀?」 
「係呀,呢到除左你仲有第二個咩」 
「哈..哈..咁..你叫我做咩呀」 
「想問你一樣野呀 你...係唔係煙民黎架?」 
「... ... ... ... ... ... ... ... ... ...點解咁問呀?」 
「無呀,直覺囉,我直覺好準架」 
「哈..我畫直角都好準架,唔洗用量角器都畫到架..哈..哈..哈..哈」 



唔知係唔係因為個笑話爛得過份既關係...我同阿欣既對話就咁結束左... 

而個日回程到解散都無再講過一句說話,我除左知佢叫阿欣之外...我對佢一無所知。

「你...係唔係煙民黎架?」「你...係唔係煙民黎架?」「你...係唔係煙民黎架?」 

就係一句咁簡單既對話令到我今個星期成個腦都係阿欣,情況就好似夏樹對拓海講左句「我買左件好性感既泳衣呀」完全一樣! 
你地可能會話:「屌,有無咁撚易呀」「你係咪真係咁毒呀」 
事實係真係咁易,事源係我為左個日營,係前一晚開始連一飛煙都無食過,到底係因為我食得太多年攪到身上有陣煙味,定係比佢見到我牙上面有煙漬,定係...其實阿欣個日都有留意我呢? 


唉...都係蒜狗掃把啦...「毒撚最忌有自信」 

不過人就係咁犯賤...我為左依句說話,我決定要搵佢問下點解佢睇得出我係一個煙民。但係人海茫茫點搵呢?你估真係睇CCTVB咁咩,當你想見一個人個陣會咁啱得咁橋飛機撞紙鳶咁比你係條街到撞到咩,所以我用左個最蠢既方法去搵佢,Facebook,當放工返到屋企第一時間就打開Facebook去到搜尋個位到輸入梁詠欣,結果一出,真係又屌左一聲,香港有無咁多人同佢叫埋同一個名呀,足足有成六百幾個!仲要有D有相有D無相,有D個樣細到要出黎到梁國雄議員先睇得到!不過算啦,反正係屋企都無所事事,就開始左我個晚既活動,逐個逐個禁! 

「呀,依個又幾靚喎」「嘩屌!咁撚樣衰就咪學人呀阿欣啦」「哈哈哈哈,抵死呀依個港女,比人中出即飛,like下先」 

就係咁,碌下碌下碌左成個鐘有多終於比我見到阿欣個Facebook。當我想禁加為朋友既時候,腦入面有兩把聲音慢慢咁浮出黎,唔洗講,肯定係天使同魔鬼啦... 

魔鬼:「加咩丫,你依D柒頭,你肯加人人地都唔肯加你啦」 
天使:「你都係想識多個朋友姐,比D信心,禁落去啦」 
魔鬼:「毒撚最忌有自信,毒撚最忌有自信,毒撚最忌有自信呀」 
迷之聲:由於好重要所以要講三次 
天使:「你唔試過又點知你唔得呢」 
魔鬼:「諗清楚喎,三九唔識七無端端加下會比人當變態佬架,雖然你本身就係」 



呀!!!!好煩呀!!!煩係煩在魔鬼講既野銀耳得黎真係好啱聽個下先弊... 

禁...唔禁...禁...唔禁...禁... 

唉...死唔死唔差幾,反正都無咩機會見,柒都係柒一次姐! 
「已發出交友邀請」
 
已有 0 人追稿