絕口不提愛你: 第一日

「HELLO」 21:55
《HI》
「嘩！咁可怕既你！秒回喎」
《毒女係咁架啦，經常秒回》
「你唔算毒女喎，又行山又踩單車咁，仲做過童軍添」 (無錯，係我撩佢傾計之前我已經花左一個鐘時間去將佢FACEBOOK由頭睇到尾)
《笑》
「係呢，遲D你仲會唔會參加中心攪既活動呀」
《睇下就唔就得岩時間啦，係呢你咁得閒GE?》
「哈哈…今日難得收早丫嘛，你知啦，毒撚放左工又無野做係咁架啦。」
「你忙緊?」(今次仆街啦，唔係咁快比人落逐客令嘛)


《我食緊飯之嘛，返工無耐岩岩先返到屋企》
「你返工係指係中心幫小朋友補習?」
《唔係呀今日返馬會》
「哦…咁夜先食飯咁我都係唔阻你啦，有機會先再搵你啦哈哈」
《喂，你過左二十五歲未呀》
「點解咁問既，你唔係想追我掛?哈哈哈哈」
《去死啦你！！！咁你答唔答呀！》
「我大你三年左右啦」
《咩料先…我今年18咋喎》(其實阿欣23歲)
「總之大你三年啦，你18咁我咪21囉，做咩姐，你想起我底定係想搵我做問卷呀，大學生」


《唔係呀…我想睇下你要唔要戒煙嘛，有個戒煙熱線服務係專比低過二十五歲既人架，如果你有興趣既可以睇下依個網(http://nursing.hku.hk/yquit/)》
「仲以為個戒煙熱線係你電話添，係既我一定打去呀」
《 咁你真係可以試下打喎，其實我都有係依到做兼職架，所以有職業病，鍾意叫人戒煙》
「嘩，百足咁多爪既你，日頭又返學，夜晚又做補習又馬會依加仲話做埋戒煙添，咁忙你會唔會兼顧唔黎架」
《忙D好，平時返學太HEA啦，返工學多D野好D》
「你攪到自己咁忙其實係咪有野要逃避呀?」
《哈哈，你諗太多啦》
 
其實傾傾下已經唔記得左自己最初搵阿欣既目的，變成左一隻不折不扣既狗公，所以都係返返入正題先。
 


「係呢其實點解個日你會知我係一個煙民黎既」
《直覺囉，其實就咁行過黎問你係咪食緊煙真係好唔禮貌。不過我第六感太敏銳啦》
「唉，出活動前一晚我已經無食煙架啦，諗住無人會知，但咁都比你發現到，你D「直角」真係好準」
《加油啦祝你戒煙成功呀》
「係喎，你星期幾會做戒煙個到架，等我個日打黎指定搵你嘛」
《你就想！！無得指定架！不過其實你真係想戒又唔一定要參加依個計劃既，你都可以自己去戒架嘛》
「咁易我就一早戒左啦(喊)，係喎，你住旺角架，上之見完左之後人人都去搭地鐵得你一個行左去既?」
《我住港島個邊去搭巴士嘛》
 
快樂既時光總係過得特別快，原來同阿欣已經由夜晚十點已經傾到凌晨十二點半，習慣早睡早起既我亦都不知不覺咁恰著左，到扎醒時已經凌晨兩點半有多，同時地阿欣仲係上線中。
 
「喂，成兩點幾啦喎，你仲未訓既?」
《做功課丫嘛，你都未訓喎(眼訓公仔)，乜你聽日唔洗返工咩》
「要呀，不過我係到睇緊小說同聽緊歌之嘛，」(雖然真係好累，但為左陪你無計啦)
《要返工都仲唔訓…我聽日就話唔洗返工姐》


「唔洗返工不過要返學囉，哈哈」
《聽日星期日呀邊洗返學架》
「唉，今次豬兜左，完全唔記得聽日星期日(紅都面曬公仔)，其實我習慣左晚晚都四點幾先訓架啦」(為左陪你，我唯有講個咁大既大話啦)
《唉…你咁樣會爆肝架，無陰公囉…》
「都無咩所謂啦，我依D毒撚都無人無物，孤獨慣架啦」
《我覺得我都唔可以好似你咁，享受凌晨既孤獨》
「咁係因為你要做功課先要享受凌晨既孤獨姐」
《都係架，因為凌晨先最安靜可以專心做功課》
「ER….咁今晚咪唔夠安靜囉，個FACEBOOK MSG係咁響，哈哈哈….」
《唔緊要啦，反正我坐左係電腦前面咁耐都無靈感要打D咩(大笑公仔)，同你傾下仲好，無咁悶》
「咁你今晚打算做到幾點先訓呀，咁攪法會爆肝架喎」
《未做完未訓得呀，一早爆左啦，已經生到成面都係豆豆啦》
「做唔做完份功課都好啦，訂個時間比自己訓啦，捱得太勁會傷身架」
《車~你邊有資格話我喎，你都未訓啦》
「都差唔多架啦，我依邊有雀仔叫啦，你都早D訓啦」


《放棄做功課啦，去睇下電影先，習慣左睇完戲先訓》
「嘩…夜媽媽你一定係關曬燈訓係到睇啦，小心睇壞眼呀，你睇戲就唔嘈你啦，搵套悶D既戲，快D悶到訓著啦，早抖」
《哈哈，你講野好唔合理，不過好得意，晚安啦(笑)》
 
就係咁終於完左我第一日同阿欣既對話，其實我真係好累好眼訓，但同時地又好享受你一言我一語既感覺，我諗依種就係戀愛既感覺。