絕口不提愛你: 第二日
奴性心重既我九點半鬧鐘都未響就已經自動彈左起身，由於真係好唔習慣咁夜訓既關係，所以我只可以算係一個沒有靈魂既軀殼，拖住疲倦既身軀去梳洗完一輪就開始返工，但由尋日開始，我既生活慢慢咁有左改變。
「早晨，乜咁早起身呀」10:05
《其實我仲訓緊(恰眼訓公仔)，你返工未呀?》
「等緊車啦，你眼訓就繼續補眠啦。」
講完之後佢真係下左線，到底係我唔吸引丫，定係佢真係太眼訓，我真係諗唔通，睇唔透，唯有繼續專注我既工作。
「收工啦，今日少野做到喊，你岩岩先訓醒?」15:19
《咁早收工？GOOD！，一唔洗返工就係咁，我太懶啦》
「難得放假換轉係我都係咁啦，我放假直頭可以由放工就訓，訓到放完假要返工先起身都仲得(黑超)」
《哈哈，你有無咁誇張呀！(標眼水)》
「一D都無誇，請問一下如果收工無野做可以點」
《嗯~你可以去睇下戲啦，跑下步啦》
「最近好似無咩戲好睇，個人又懶唔想跑步」
《乜你咁架，咁你想做D咩丫》
「就係諗唔到先問你，我個人都無咩特別嗜好既，換轉係你放假你會有咩節目丫」
《一個人就留係屋企多》
「咁睇黎我都係要返屋企做毒撚啦(苦笑)，係喎乜你唔洗拍拖架咩」(睇左佢FACEBOOK咁耐，完全搵唔到佢有拍拖既痕跡，唯有出手試探下先)
《要呀，但係今朝起唔到身嘛(遮面)》
「哈…哈…哈…，三點幾都仲好早姐…仲有大把時間行街睇戲食飯啦…」(其實我都預左架啦，係香港一個女仔個樣正正常常點會無男朋友丫…)
《佢要溫書呀…已經好耐無行街睇戲食飯啦》
「咁都好既，起碼佢識諗肯讀書先丫，當然，如果我放假我都想有個女朋友可以陪我過」(其實當下真係好想話佢男朋友不是，但又無理由識人睇二日就話人男朋友架嘛…)
《講到咁唏噓，要浪子回頭？》
「浪乜鬼呀，我既生活圈子都無女性朋友，想拍都無得拍啦」
《拿~你想有女朋友呢，首先要有個好形象，快D戒煙啦~聽聞呢D男仔係去教會識女仔架喎》
《係喎，黎緊月尾會攪活動去迪士尼喎，你會唔會去呀？》
「應該唔去啦，有介紹？」
《嗯…算係架》
「係咪打算介紹你本人比我識呢(奸笑)」
《唔洗介紹啦 你都識我啦 (標眼水X2)》
「我都有興趣去呀，不過月尾應該請唔到假」
《O…咁算啦唔好去啦，唔好特登請假啦》
「唔緊要喎，(為左你)等我諗下辦法先」
《同朋友食飯飲完酒個頭好暈呀》19:39
「唔飲得就唔好飲太多啦，有咩事就搵人接你走啦」
《無事既，得4.5度之嘛(面紅)》
「你食緊飯就咪鬼禁電話啦，真係有事就搵我啦」
《繼續傾都唔緊要架喎》
「都係唔好啦你陪朋友傾計啦」
《其實醉都幾好丫》21:00
「睇下同咩人啦，適當既醉好啦，飲太多聽日頭痛呀」
《哈哈，你成個阿媽咁》(仆你個街呀，FD ZONE就聽得多，比人入媽ZONE真係第一次！)
「咁我都係擔心你唔識節制姐，聽日頭痛唔好話我無提過你(嬲)」
《飲左半支咋已經暈暈地，但好好FEEL》
「飲個半支就醉咁屎，你真係好唔飲得喎」
《咁人地一向都唔飲酒架嘛(嬲)》
「我平時飲半支都醉架，不過係威士忌囉哈哈」
《食屎啦你！！！係呢，你又咁得閒既，係到做緊咩》
「同朋友玩緊鏢呀，下次帶埋你去玩囉」
《出旺角玩？但係我唔識玩喎》
「唔識咪教你囉，最緊要你有興趣學姐」
《好呀！！！》
「喂，你返到屋企未架」23:51
《返左好耐啦仲做緊功課添》
「咁你今晚又打算做到幾點先訓呀」
《好問題，我都答你唔到，做完咪有得訓囉》
「咁我今晚係咪應該體貼D唔出聲等你專心做功課」
《扮啦你，你想專心玩鏢之嘛》
「都唔係架，我可以陪你做功課架，但為左等你有得早D休息都係閃先」
《超超超超超》
「做咩呀，嬲呀?嬲我都好既等你專注D做野嘛」(其實係周公又CALL我去打牌)
《喂，你返到去未呀》02:29
「一早返到啦…….」(對眼差D打唔開)
《我都做完功課啦，好感動呀》
「嘩，今日咁快手既，仲以為你飲完酒會做唔到功課添」
《可能比自己出去放鬆完個人，所以做野都快左》
「咁你做完就快D睇陣戲好去訓教啦」
《唔得呀…黎緊星期三仲要考試呀，不過都係聽日先溫啦，因為太早溫會唔記得》
「眼訓你就眼訓啦咁多籍口架」
「你呀，又熄燈睇戲小心變盲妹呀你」03:30
《…你又知…你裝左CAM係我屋企呀…》
「係你尋晚講你要睇戲訓架嘛，我有用心記住你講野囉」
「咪再成日都係咁啦，好似我咁散光深好慘架」
《乜你有戴眼鏡架咩》
「頂你，你到底訓練個日有無帶對眼出街架」
《邊個得閒記你咁多野姐，你又睇緊小說呀？》
「髮尾微曲，著住灰色外套，黑白間T-shirt，藍色牛仔褲，我就記得你呢，唔理啦，總之你快D訓覺啦(我真係好眼訓呀！！！)」
《你真係記得架喎，唉~~~知道~~~又多個阿媽》
「你再唔訓我就煩過你阿媽架啦！！」
《丫！其實點解你咁得閒搵人傾計既？》
「咁唔搵啦，比人嫌煩啦，訓啦早抖」
《唔係嫌你煩呀，只係奇怪之嘛》
《有人好似發脾氣想人氹咁喎(標眼水)》
《原來你真係訓左…(標眼水)》04:20