《玻色子遊戲》: 5

佢地一行人就走去學校門口，打算離開學校。
「喂，鎖住左喎」MK仔發現學校正門鎖左。
「黎呀，走後門。」肥大叔提議。「頂你個肺，又鎖住左。連後門都鎖埋，咁依加點呀？」剛才大聲夾惡嘅肥大叔都開始怯起來。
「打電話，報警！」眼鏡大叔提議。
「好好，好主意⋯⋯喂，我冇帶電話，你有冇？」肥大叔搵左陣，搵唔到自己部電話。
「冇喎。」眼鏡叔都表示冇，「有冇人有電話係身呀？」佢笑騎騎咁問其他人。
呢個時候，大家都發現自己冇帶電話。
「冇理由，我唔會唔帶電話出街架喎。連我平時一定會帶嘅手袋都⋯⋯唉，銀包又冇⋯⋯」何允兒覺得好奇怪。
「咩冇理由，唔記得帶電話出街有幾閑呀，我一個禮拜都有三幾日冇帶出街架啦」肥大叔反駁佢。
「唔係呀，我等緊個好重要嘅電話，我唔會唔帶出街架⋯⋯」因為何允兒每日都希望有醫生護士打俾佢有合適嘅骨髓可以移植俾Ivan，所以佢最近一定機不離手。




「一個唔記得就話大懵姐，呢度七個人都冇，會唔會奇怪左少少呢。」眼鏡叔就話，「大家無啦啦黎左呢度，身上面又乜都無⋯⋯有冇人記得自己點解會黎左呢度？」
大家靜晒，似乎冇人記得自己點解會黎左呢度。
「咁就奇怪，大家都失晒憶咁⋯⋯」眼鏡叔唔知點解開始係度扮偵探，分析成件事。
「頂你咪講咁多廢話啦，依加離開呢度最實際⋯⋯呀！挍務處一定有電話。」肥大叔靈機一觸，諗起校務處應該有電話。
「咁行啦。」MK仔似乎好想快啲返屋企，二話不說就帶頭走去校務處。 
 
9-9-9
MK仔拎起電話，撥打999報案熱線。
「嘟－－－－－－」
「唔通嘅？」MK仔再打左幾次都係唔通，然後又嘗試打返屋企搵人求救，但都係唔成功。「唉，頂你個肺，咩事呀，我地係咪俾人軟禁呀。」




「唔好亂咁估住先，我地不如分頭搵搵有冇咩其他出口先啦。」眼鏡叔提議。
「出口？學校除左正門同後門，仲會有咩其他出口呀」肥大叔又開始鼓燥起來。
「我讚成四圍睇睇，反正企係度都係咩都做唔到」之前一路唔出聲嘅一名男子終於講左第一說話
「好，不如咁啦我同呢位妹妹一組（尖叫女），肥佬你同呢位男仔一組（瘦弱男），淨低就你地三個一組啦。」眼鏡叔忽然扮大佬咁指揮大家。
「喂，我做咩要聽你支笛呀」肥大叔唔滿意自己點解要聽眼鏡叔指示。
「得啦，我自己一個得啦。」MK仔一副不屑同其他人一組嘅樣子。
「而家唔知咩情況，自己一個太危險啦。」眼鏡叔苦口婆心咁提醒MK仔。
「得啦，仲之有咩我大叫啦」講完MK仔就自己走開左。
「咁我地都周圍睇睇啦」
然後，各組人就分開，睇下會唔會搵到離開學校嘅出口。