《玻色子遊戲》: 6

「係呢，我叫何允兒，你可以叫我允兒。我可以點稱呼你？」何允兒問同組嘅男子。
之前大家都對點解黎左學校毫無頭緒，係緊張，害怕嘅心情底下，佢地連對方叫咩名都唔知。禮貌上，何允兒覺得應該要知對方叫咩名，唔係就要先生先生咁叫人。
「我叫楊平。」
「你……好似唔緊張咁嘅。我地無啦啦黎左呢度，你唔驚咩？你係咪知道啲咩？」何允兒覺得佢好奇怪，由見面到而家，楊平都表現得好冷靜，佢似乎知道啲咩咁。
「冇，我同大家一樣，咩都唔知。只係，我覺得大吵大鬧對成件事都係冇幫助。不如快啲離開呢度仲好。」
「你都有道理。」 

另一邊廂……
「我叫呀發，你細過我，你叫我發叔就得。咁你叫咩名呀。」眼鏡大叔一邊行一邊問尖叫女。
「我……我叫小喬……點解你係呢個時候，都仲可以有笑容嘅。」發叔笑騎騎嘅樣，令小喬非常反感。




「呢啲時候先更加要笑，我喊你咪仲驚。」
「你笑得咁衰我仲驚……」小喬有啲不屑。
「吓，你講咩話？」
「冇！我地繼續搵出口啦。」
「工欲善其事 ，必先利其器。呢度咁黑，我地去搵幾支電筒先。」發叔就帶小喬去搵電筒。