女神從Online Game走出來了: 05 不要把小孩獨自留在家中
鈴～鈴～鈴～
「仆街！」我嚇得從熟睡中彈起來
「主人？做咩呀？」抱著我的伊語也嚇了一跳
我看一看電話，幸好只是鬧鐘的鈴聲．．．我還怕自己又要遲到了．．．
「伊語，我今日要返工，妳自己喺屋企，唔好出街。肚餓有麵包同粟米片，教過妳點整架啦？總之唔好出街，我盡量天黑前返．．．」我一邊換衫一邊說
「啊．．．你一個人會唔會好危險架．．．？」伊語擔心起來說
「我返工啫．．．唔使打怪嘅．．．我真係要走啦，今晚再講啦！」我說
「等陣！拎埋粒治療水晶去．．．」伊語說著便變出了一顆治療水晶
我接過水晶便馬上出門．．．希望這對我也有效吧．．．
我連早餐都沒有吃便上班去，幸好公司距離我家不遠，半個多小時就回到公司寫字樓了。我貼著牆壁慢慢前進，本能地不發出任何聲音。總算在不驚動任何人的情況下回到坐位，然後便立即打開電腦假裝工作．．．．．．說起來，我又沒有遲到．．．裝甚麼．．．
「流主。」
「哇！」我被突然其來的呼喚嚇了一跳：「仆街想嚇死人咩！」我轉身看過去，原來是Apple
「你仆我街呀？」Apple說
「緊係唔係啦！我．．．我．．．我上網睇緊會展Book場個Guide．．．發現佢貴到嚇死人．．．」我一定是瘋了
「．．．嗯。有無好啲呀？」Apple問
「．．．咩好啲呀？」妳不是想說我的藉口太爛吧．．．
「你星期五請左病假呀嘛。」Apple不耐煩問
「係喎．．．」我完全忘記了！醫生紙啊！！
「即係無醫生紙啦？」Apple瞇眼問
我深呼吸一口氣說：「．．．嗱，即係咁，我嗰日就好頭痛嘅，痛到根本都去唔到睇醫生，咪諗住訓下先再去囉．．．咁之後訓醒左，見無痛啦咪諗住起身去睇．．．但係我突然間諗，既然睇醫生咁遠我都去得到，咁即係無事啦，咁無事就唔應該浪費醫療資源嘅．．．所以．．．．．．」
「算啦，你繼續做嘢先，其他嘢我會handle。」Apple說著便回到自己的辦公室了．．．
總算可以鬆一口氣．．．
「今日Lunch你嘅。」身後傳來一把聲，原來是同事阿健
「無啦啦做咩要請你呀．．．」我皺起眉頭
「因為星期五我無啦啦要OT執人地手尾。」阿健說
「呃．．．」我無話可說
「請埋我！」一個女子走過來說。她是寶妮，是Apple的秘書
「又關妳事？」我又皺起眉頭
「聽者有份呀嘛！By the way，嗱，你封Warning Letter。」寶妮說著把信遞給我
「頂．．．仲以為Apple姐會放過我添．．．」想不到一大早我已經紅血了．．．
下午，我還是請了阿健和寶妮吃午飯，幸好他們都沒有去得太盡，只吃了吉野家．．．不過看一看戶口，才短短數天，我的儲蓄便已經都用了一大半．．．因為買了很多東西給伊語．．．唉．．．這樣下去早晚要回去跟父母住了．．．
Apple在會議室說：「嗱，我再提下大家，下星期二就係Cosplay Event，大家醒目啲呀。今日係咁多，收工。」
「呼．．．有驚無險又一日，流主你去邊呀？」阿健一邊收拾自己的文件問
「我？返屋企囉。」我說
「果然係專業宅男呀吓！記得小心身體呀，如果你又病就唔只食晏呀同你講。」阿健笑說
「哈哈．．．當然當然．．．」我苦笑說
辛苦工作了一天，總算是活著離開．．．完全處於負面狀態的我步履蹣跚，猶如一頭喪屍般拖著腳步回家．．．
「喂，收工啦？」盧Sir打招呼說
「係呀．．．」我都沒有氣力回答了
我進入昇降機，不知怎的突然有一股不祥的預感．．．我回到自家門前，還未拿出門匙，伊語便突然打開門！
「主人返嚟啦？」伊語看起來很高興
「嚇死人咩．．．妳又知我返嘅．．．」我問
「唔知呀，但係就係感覺到你返！」她說著，這時我才留意到她滿身都是污漬！
我立即緊張起來：「妳做咩成身污糟晒架？妳做咩嚟呀？無事呀嘛？？」
「我．．．諗住煮飯等你返嚟．．．結果．．．」伊語低下頭說
我看一看，發現整個廚房都變得亂七八糟．．．更有一大條血跡由牆身延伸至天花板！地上還有一個燒焦了的痕跡．．．
「妳．．．妳煮咩呀．．．？轟龍呀？」我呆住了，汗顏問道
「唔係呀．．．我原本諗住整個營火係地下．．．但係用錯左最高級嘅火焰球．．．之後拎起嗰支紅色嘅調味料．．．唔知點解又整到成個天花板都係．．．」伊語扁著嘴巴說，連耳朵都垂下來了
在我的廚房用十級火焰球生火？？天花板上的血跡是茄醬？？？要煮甚麼才可以做到這個層次？？？？
伊語輕輕捉住我的衣袖說：「主人．．．對唔住呀．．．」
「算啦．．．唔整左都整左咯．．．」我都沒氣力去怪責任何人了
「對唔住呀．．．你唔好唔開心啦．．．」伊語就像頭小貓般道歉
「得啦得啦．．．我無事．．．」看著伊語滿身污漬的樣子也蠻可憐的．．．她也只是想煮飯給我吃吧．．．
「不過呢．．．我整好左嘢食架啦！我用左啲麵同啲肉．．．你快啲食先啦！食完我再執返好個廚房啦。」伊語拉我到飯枱說
眼前是一碗看來十分普通的麵，而且都是用豬肉乾做配菜．．．吃起來也不怎麼特別，不過．．．我還是感受到伊語的心意．．．我一邊吃，她就坐在我面前看著我，而且還很快樂的樣子．．．
「係喎，妳自己呢？妳食左啦？」我問
「未呀．．．不過我煮左一碗咋．．．宜家個廚房咁樣都煮唔到第二碗．．．」伊語又低下頭了．．．
「啊．．．唔．．．個麵普普通通啦。不過．．．多謝妳．．．」我道謝說
「你開心就好啦．．．」伊語竟然害羞起來，更害羞得雙手掩住面額．．．不過此時，我才發現她的手原來又切傷了！
我立刻緊張起來：「妳又整親呀！？妳唔食治療水晶嘅？」
「對唔住．．．我比左粒水晶你．．．我整唔到第二粒．．．」伊語扁著嘴巴說
「係喎．．．．．．」我從口袋拿出水晶「嗱，係度，快啲食左先！」
「多謝主人！」伊語笑著把水晶吞下，我也稍稍放鬆下來了．．．
然後我說：「不過依度都唔夠我食，我同妳落街食啦。」
「係！」伊語看起來還是一樣天真無邪，沒有壓力的樣子
這晚，我們到了附近商場吃飯，順便也買了一些烹飪書給伊語。伊語開心得緊緊地抱著它們．．．這些書有這麼重要嗎？回到家後，我和她一起清潔廚房，這時，一隻蟑螂突然不知道從那裡走出來！
「哇屌！！甴曱呀！！」我嚇得彈起！我最害怕蟑螂了！
「主人唔使驚！」伊語單手一揮，蟑螂立即爆炸並完全消失成灰燼！
我嚇了一跳：「焰爆術！？」
「係呀！」伊語微笑說
「哇．．．好彩妳係度咋．．．」蟑螂可是我的天敵啊
「我唔會比主人你受傷架，我會好好保護你！」伊語很認真地看著我
「點解．．．呀？」被她這樣看著，我有點不好意思
「因為你係我主人囉！我喺嗰邊個世界，所有嘅經歷同成就都係主人你比我嘅，而且每次遇到困難都總可以逢凶化吉．．．每次我都會諗，其實係咪有人暗中保護緊我．．．」伊語看著我續說：「宜家先知，原來就係主人你．．．所以．．．宜家我都要好好咁保護你！就算返唔到去都唔緊要！」
「啊．．．嗯．．．多謝妳．．．」我都不知道要怎樣回答她．．．
我只不過是玩電玩而已．．．我真的沒想過對她來說卻有著這麽大的影響．．．我開始有點看不起那些隨便開個角色、隨便玩、隨便死了、又再隨便刪除角色的玩家．．．