【武館MK學生妹。死毒男。人格分裂Miss。】: 【三】

「喂，我落去先！跟住接你！」我講完，已經即刻爬過幅牆跳左出去。

「下？喂……真係跳呀？」阿詩腳都震埋咁騎住度牆。

「跳啦！快d呀，一陣佢地見到我地就煩啦！」

「下……下……但係……」


說時遲那時快，班金毛望左過黎。





「喂，個度兩條友古古怪怪咁既？」

「係佢啦！大佬！」金毛指住已經企左係街上面既我。

「跳呀！」我見狀，即刻向阿詩招手。

「但係……」阿詩繼續腳震。

「妖！跳就跳啦！」於是我一手扯住阿詩隻腳，阿詩就成個人失平衡跌左落我度。





「嘩，屌！好痛呀，你食乜食到咁肥架？」我即刻推開壓住我既阿詩，兩個人坐左係度。

「肯定係佢啦！唔好比佢地走！」金毛們即刻跑過黎，我同阿詩即刻拎起手袋跑走。（你唔係期望mk妹會帶書包返學下話？）

於是我地由學校跑到去旺角，再由旺角跑去亞皆老街，再跑到去九龍醫院附近。


正當我地跑到後巷個陣，突然又有一班金毛前後包抄我地。





「阿Kay，點算好啊？」阿詩驚到即刻呢係我後面。

「你地……你地想點呀！人多蝦人少啊？」

「就係呢個短髮女仔？」有一個黑髮比比鳥頭既人，由人群走左出黎。

「係呀大佬，就係佢打到我地訓係度啦！」

「大佬，個男人婆隔離條女幾索喎，不如……」

「你個契弟，要報仇就同我隻抽，個日阿詩都唔係度既，你唔好拖我friend子落水喎！」

「哦～原來叫阿詩，又幾索喎～」金毛走過黎，勁近咁圍住阿詩望，然後想摸阿詩塊面。

「你個陷家鏟呀！」我即刻衝上前，一拳揮過去金毛甲度，然後再一下將佢過肩摔壓落地，跪係佢背脊上面扯住佢條頸。





「死八婆你做咩呀！」成班人即刻作勢一湧而上。

「咪過黎呀，過黎我就扭斷佢條頸！」其實我都係9up架咋，平時武館中學打交就打得多，點會真係玩到殺人整癱人？


「點呀？大佬！」比比鳥揮揮手，叫班人企定定係度，然後佢一個人走過黎我度。

「你想點啊！我真係會扭……」

「你依家捉緊佢呢個位，」比比鳥蹲低望住我，「點都唔夠力扭斷佢頸骨架，只會扭到自己隻手。一係就捉上少少個度，扭毛巾咁……」

「大佬……大佬唔好教佢呀……」金毛甲即刻嚇到成個人震曬，比我壓住左，就唯有斜眼望上去比比鳥度。

「上次係咪我班兄弟得罪你呀？」





「下？」呢隻比比鳥都幾奇怪，態度突然又咁溫和，「佢勒索阿婆，我咪打佢囉！」

「冇呀冇呀，我冇做過，係佢冇啦啦撩交打咋！大佬，唔好信佢呀！」

「咁你仲打左後面呢幾個人？」比比鳥指向身後既人

「係掛，屌！個晚都飲到咁醉撚認得咩！」


「你就係格林中學中五乙班既夏子琪？」突然，比比鳥係衫袋拎左我幅相出黎。

「係……係又點呀？起我底我就怕你呀！」

「其實我就冇咩特別意思既，只係……」






突然間，比比鳥停頓左落黎，企起身望向我身後既人。

「光天化日做咩欺負其他女學生？咦？仲要唔係我地學校既？」

「大小姐！」突然間，所有金毛都向住我身後既人鞠躬。

「家姐，」比比鳥即刻面色一沉，「我同佢地傾下謁咋嘛！」

「你吹啦！」我即刻大聲反駁。

「走啦你兩個。」壓住金毛甲既我坐係地下，一轉身抬頭往上望，只見一個身穿端莊套裝既女人，但係由於佢站係背光位置，我望唔到佢五官係點樣。

「走啦！阿Kay！」阿詩即刻衝上前，拉住我隻手跑走。






我一路跑，一路回頭望住救我地個個女人既背影。
一個個子好高、頭髮好長、衣著打扮都好端正高貴既女人。


然後，我只見佢一拳打左落比比鳥度。