【武館MK學生妹。死毒男。人格分裂Miss。】: 【四】

【四】

「夏子琪同學，我都明白我地唔係d咩好既優秀學校……」一星期後，晨早流流，我就比訓導主任捉左去照肺。

「點啊又，陳主任？」我一路唔耐煩咁un住腳問，希望佢快d放我返課室訓教。

「唉，我本來都唔中意鬧人既，我都理解我地既學生係活躍d，但你睇下呢張相！」陳主任拎張相出黎，係早兩日學校對面鋪頭閉路電視影既相。

「呢班人依家日日都企門口接你放學，你知唔知今次你得罪既係咩人呀？」





「金毛契弟囉！咩人姐！咩呀？想我跪低認錯呀？我唔會咁易架！係佢地想打呀婆我先出手咋！」

「你大錯特錯呀！黑社會呀！」陳主任甚是勞氣，一手拍落檯度。

「嚇鬼呀？黑社會！你估仲係陳近南古惑仔時期咩，依家d 金毛係唔係都話自己黑社會，係威係勢架啦！」

「我唔知你咩原因得罪班人返黎，但已經有附近居民報左警，警察已經有人過黎了解過，確定左大部份都係黑社會既人，如無意外呢幾日班人都會收斂下既。」

「挑！比警察嚇下就散水，冇撚用，淆底獸！」





「你！究！竟！知！唔！知！事！態！嚴！重！啊！」陳主任突然嬲到企起身指住我大叫，全部教員室既人都望左過黎。

「的確，我地學校都唔係d咩好學校，武館呀嘛！我都知出面d人點睇我地！」主任嬲到叉住腰講，「不過，你唔想畢業，仲有一班同學志在求其拎個學位畢業架！本來我地都已經好擔心要殺校，你唔好再係度搞屎棍得唔得？上左頭條既話，我地學校就多得你唔少呀！」

「駛唔駛咁大聲呀主任！」

「死性不改！我唔理你咁多，總之，呢個月你都要停課！唔準返黎，直到件事平息！」


停課？到底我做錯左咩，點解要罰我？




我只係路見不平，揮拳相助
點解受罰既人係我？

「打橫黎講！明明錯既人就唔係我！呢d咁撚濕鳩既學校，快撚d執柒佢仲好啊！」

「幾時輪到你咁講野呀？你只係一個讀唔成書既社會寄生蟲咋！」


寄生蟲？
點解我讀唔到書就係寄生蟲
而呢班黑白不分既教畜就係社會棟樑？

一怒之下，我右手情不自禁咁一拳打左去主任個頭度。






點知主任既眼鏡比我一拳打碎左
有玻璃飛過佢眼皮，佢眼皮即刻流曬血。


「啊！出事啦！」原本係隔離望住既老師即刻跑上前，擔心主任隻眼都有玻璃入左去
其他老師馬上call白車，而主任就詐死咁坐係地下度話好痛。


學校唔想搞大件事
同醫院講話係主任自己跌倒個陣整爛左眼鏡
並且冇追究我傷人。


但係，我被勸喻自動退學。