又到最悶既英文堂,唉啊傑班仆街又係到抽水,『喂,啊B,做到野喎同到女神一起行路返去,執到寶啦你』話就話大家都毒撚,話就話啊俊有女朋友,但啊俊女朋友相比起依晴簡直係天與地既分別,因此我知道佢地口中無論幾衰講咩都好,心中都只能夠葡萄,我今日心情特別好同到依晴一齊返學,佢仲要買埋早餐比我早,死啦唔記得左比返錢佢,比佢地講下又有咩所謂,我口中講唔係咁,唔係咁,事實上,心中我一直在暗爽,這些機會不是你們的。 

電話收到一個Whatapp信息,原來係依晴發我信息, 

依晴『係啦,今日既懲罰就係要LunchTime陪我一齊食』 

我『唔得喎,我要陪啊傑佢地食架』 

依晴『咁好啦,我跟你地一齊食啦,今日無人陪我食佢地個個都要做project,而我早就做完,我12:45分係你學校門口等你啦』 



我想拒絕既時候,依晴立即發左個信息比我『唔好放飛機啊,嬲死你架』 

我只好無奈地打出『好啊,到時見』 

捱過第五,第六既堂課英文之後,我同啊傑佢地講『依晴佢話想跟埋我地一齊食,因為今日無人陪佢』 

啊傑佢地都識做,佢地話『無所謂啦,照舊吉野家』 

打左鐘聲,我地立刻落到去學校門口,廢事令到依晴等咁耐,我一見到依晴既時候,發現有好多麻甩佬都望住依晴,睇黎我地學校真係好DRY,而依晴見到我既時候就大聲講『啊B~你到啦?等左好耐啦,肚仔餓啦』 



唔洗問,其他人一定好葡萄我呢條毒撚,估唔到依晴係一個咁易相處,咁健談既人,原來同女神做朋友都唔係好難既事黎姐 

我地路上既時候,我同依晴講『依晴,我地食吉野家,你有無所謂啊?』 

依晴『好啊!最鍾意食既就係吉野家』 

啊傑佢地今日對我特別好,可能見我帶依晴出黎食飯,所以都比返幾分面我。 

我同啊傑講『兩個和風牛肉飯,可樂少冰,兩個牛肉汁』 



啊傑『叻仔喎,連人地食咩都記得,你地兩個去坐住先啦』 

依晴坐左係我右邊,唔知點解我有啲心跳既感覺,同佢坐既時候個心跳得特別快。 

五分鐘過後,我地既牛肉飯到左,可能心情好,食咩都好開心。 

依晴夾我一舊牛肉,我又夾返佢一舊牛肉,人地唔知仲以為兩公婆係到耍花槍,可惜現實永遠都係殘酷,依晴『啊B,你聽日得唔得啊?我想去藍田綜合大樓借圖書睇,咁岩我男朋友又唔得閒,不如你陪我啊好唔好』原來依晴佢有男朋友,佢男朋友唔得閒所以搵我,咁我咪水泡。。 

算啦,聽日都無咩做我就陪下依晴去啦。 

我『都可以既,我聽日無咩野做,幾點?』 

依晴『三點鐘,門口等。』
已有 0 人追稿