「聽講你琴日拉左柔柔走。」肥森問我。

「係呀。」

「真係?咁之後點?」家樂探過頭黎。

「無咩點,總之完左。」我回應佢地。

「你OK丫嗎?」肥森問我。



「放心,無事。」我應肥森。

「咁你今日仲有無同人地表妹一齊番學?」

「無呀,我話想靜下,佢都明白事理。」

隨左陣有人衝左黎我地班房。

「小狼!!!!!」原來係嵐嵐。



「你又做乜?」

「黎睇你囉。」

「你唔搵你表姐搵做咩乜呀。」

「我岩岩搵完表姐啦。」

「你出黎。」



嵐嵐跟左我出去。

「你都知我同你表姐既事啦,所以你既任務都完左。」

嵐嵐唔出聲望住地下。

「餵….你應下人好喎。」

「我仲以為我地係朋友黎……」

「白痴,我地當然係朋友。」我撳住嵐嵐個頭。

起初只係為表姐,
後來當左我係朋友,
所以先黎搵我嗎?


雖然我唔聰明,但我都意會到呢啲事。
平時咁巴渣,
估唔到咁唔識講真心話。

「你條仆街搞到我表姐喊我仲未同你計數。」

「到你計得掂果陣我先再奉陪你啦。」

「你係咪已經無野?」

「已經無野,快啲落番去,你一個中一女仔係到好礙眼。」

「咁遲啲見。」

家樂又走埋黎。



「唔怪得無野啦,原來有左第二個。」

「咪諗咁多。」

其實又點會一夜間就無事。
只係決定向前行而已。

我經過小櫻個位果陣見到佢個樣好煩惱。

「你做咩一臉愁容?」我問小櫻。

「我唔知陸運會玩咩好。」

「是旦填咪得。」



「但我係運動白痴,唔想出醜。但又一定要參加。」

「你填完可以唔參加嫁嘛。」

「原來可以咁嫁!!!?」小櫻驚訝咁望住我。

「好多人都係咁。」

「太好啦。」

小櫻即刻就亂填放左落櫃筒。

「咁小狼你會參加咩?」



「100米、1500米,4X100接力。」

「好犀利呀全部係跑。」

「都係求其玩下姐。」

「咁你都幾中意玩。」

肥森突然搭住我膊頭。

「你唔知我呢位兄弟係前足球隊既明白之星黎咩,我諗得田徑隊既人先夠佢跑。」

「好利害呀!!」小櫻突然講句日文。

全班男生硬曬咁望住小櫻,

「咁而家呢?」小櫻問我同肥森。

「小狼無同你提過?」

「我去一去洗手間。」

「餵,小狼。」

肥森追到去尿兜。

「以為你已經放低左件事。」

「我無資格評論或參與足球隊任何事。」

「我地無人怪過你。」

「但我怪自己呀。」

「其實足球隊好需要你。」

「只係你單方面咁諗姐。」

「你幾時先可以重新振作呀!!?」肥森捉住我。(註:我地兩個都未洗手)

我撥開佢「我點唔振作呀?」

「我唔係講你其他野,我只係講緊足球呀!!」

「我既足球已經完左。 」

我洗一洗手就離開洗手間。

我知道足球隊已經過左選拔,
而且都開始投入練習。
我已經無面目番去。

食完晏又見到小櫻個樣苦口苦面。

「岩岩陸運會既事仲未解決?」我問小櫻。

「其實我仲有樣野煩惱緊。」

「咩?」

「我屋企人又要番去日本。」

「下,你好似岩岩先入學。」

聽到小櫻咁講,
我個心好意外咁戚左一戚。

「佢話係香港同個夥伴合作意外順利。」

我咀咒果條爛坦!!!
但我點解好似好緊張咁既?

「咁你幾時會走?」

「我都唔知,聖誕前掛。」

「咁無辦法,你呢段時間有邊到想去就同我講,我盡量帶你去。」

「多謝你呀小狼。」

「我又幫唔到你啲咩。」

「你有心已經好好。」

小櫻既強顏歡笑令我有啲心痛。

「啊!!你媽媽係香港人,應該有親戚係到,住佢地到得唔得?」

「其實我媽媽係孤兒黎,所以我係香港係無乜親戚。」

「咁真係無辦法… ..不過呢啲之後先諗,可能到時有轉機呢。」

「嗯。」

第一次見到小櫻咁唔開心。
睇小櫻真係好想留底。

我將呢件事講左比肥森佢地知。

「咁真係無計。」肥森都R曬頭。

「一係你娶左佢囉。」家樂又派膠。

「白痴我未成年嫁。」

「呢個都不失為一個方法。」肥森竟然陪佢癲。

「你兩個夠啦。」

「再唔係你兩個假扮一齊拍拖,話唔定佢父母會留小櫻係到。」估唔到連張天欣都係咁。

「欣姐估唔到連你都玩我。」

「其實你點解咁上心?」肥森一語道破。

「大家一場同學嘛。」

最後我地都無諗到一個可以幫小櫻既方案。
打後幾日小櫻都好無心機。

「你呢幾日做咩灰灰地咁?」呀媽問我。

「無野。」

「真係?」

「ummmm…我有個同學要跟父母番外國,唔可以再同我地一齊。」

「如果係人地父母就無辦法啦,係家樂?」

「唔係啦,係佢就唔洗咁頭痕。」

「雖然唔知邊個令你咁著緊,不過人地父母都離港啦,唔通要人地一個留係到,你忍心拆散人地家庭咩?」

呀媽都講得岩,唔通要小櫻一個人住係香港咩,
佢係到又無人無物。

「叫你FD搬黎我到住囉!!!」老豆突破派膠。

「無啦啦點樣叫人黎住呀。」

「當出租你家姐間房。」

老豆果然係生意人。
不過如果小櫻真係住左入黎…..
咪傻!!
佢屋企點會比佢住係一個男仔屋企。
雖然咁講…
但我都控制唔到對小櫻住入黎既幻想。

直到去陸運會,
我地仍然未諗到辦法,
應該係話我地已經放棄左…..