好彩醫師話我去比佢執幾劑就無事。
但可惜今日唔出得街,
只能夠係屋企打機。
本來好寧靜咁打緊LOL既時候,
晴晴竟然撞左上黎。

「餵白目,你廢就咪跑啦。」

「唔係一見到我拮我。」



「你捨得比我入去未?」

我帶左佢入屋。

「你上黎做乜?」

「你wts app話你整親隻腳咪上黎睇下幫唔幫到你?」

其實我一直都有keep住同晴晴wts app。
所以我既近況佢都知道下。



「其實無乜。」

「咁呀…你唔洗理我,你有野就叫我。」

「下?你諗住一直坐係到?」

「係呀煩。你去做自己野。」

「咁唔太好,不如開套戲睇。」



我地兩個坐左係梳化睇戲。
晴晴著住一簡樸既純色tee同一條短褲,好有鄰家女孩既感覺。
其實點解佢一定要上黎呢?

「請問狼生你係睇電戲定睇我?」

「睇你….唔係….睇戲!!!」

大佬你著到咁有feel點忍到唔望你…..

「死淫蟲!!!」

唔知係咪我會錯意,
總覺得晴晴呢句野既語氣唔似鬧緊我。



「我肚餓。」晴晴向我訴求。

「整野你食。」

「落去食啦,你都要去敷藥。」

「咁你等我換衫同執執個樣。」

食完野就去左跌打館敷藥。

「呀仔今日帶埋女朋友黎呀?」跌打師傅對我講。

「唔係啦,佢唔會係我女朋友啦。」



「咁靚女又的確唔似係你女朋友。」

「大家識左咁耐比下面好喎。」

不過好奇怪,
晴晴由步入跌打館開始就無出過聲。
平時晴晴應該好多野講先岩。

我望望佢,
原來佢訓著左….
佢有咁累嗎?

直至離開先叫醒佢。

「我自己番去都得。」



「你僕死都未番到去喎。」

「無事喎,你睇下。」

講完我就拐拐下咁自己行開。
拐左幾步就僕左一僕。
晴晴上前攬住我手臂扶扶我。
佢整個身都貼近我手臂。
手臂夾左係中間。

「sor!!!」我向晴晴道歉。

「得唔,唔緊要啦。」



晴晴捉住我手臂扶我去巴士站。

「唔該你……」

「你好少咁老實喎。」

「你夠好少咁……」

「咁咩?」

「咁似女仔。」

「咁你即係話我平時似男人啦。」

「唔係….只係無咁女仔姐。」

「屌,你自己行。」

晴晴鬆手自己行左去。

我諗住追佢,點知成個僕左係到。

「你無事丫嗎?」晴晴番轉頭問我。

「你覺得呢?快啲扶起我先啦。」

「睇你廢到….係咪突然覺得無左我唔得呢?」

「痴線,不嬲都無左你唔得嫁啦。」

「 ……….」

「…….」

「…………………………….」

「如果無左你呢個朋友一定好辛苦….一定。」我嘗試打破尷尬。

「係囉,無左你就無人比我恰。」

「快啲番去,好累。」

「係,再唔快啲行可能又走左架車。」

係車上,我地彼此都無交流。
晴晴全程望住窗外。
係咪我岩岩講錯野呢?
我岩岩果句話係咪嚇親晴晴呢?
係咪應該解釋番我只係當佢好朋友,
如果佢以為我中意佢,
我地既友誼會唔會告終???
但點開口講好呢?

去到大廈閘前….

「我自己番上去就得,今日唔該曬你。」

「嗯……」

第一次見晴晴回應得咁清簡。

「晴晴……其實岩岩我唔係有咩特別意思…..」

「我當然明白啦死蠢。」

「咁就好啦….」我鬆一口氣。

「正懵撚!!!」

「下?」

「無野啦,我番去啦,再見。」

「餵….晴晴?」

晴晴點解好似嬲嬲地咁?
唔通M到?

晴晴咁就行左去….
我試圖追出去。

“”啊””

我僕左係大廈前….
好撚痛…..

「睇你真係無左我唔掂,我陪你上番去啦。」

晴晴扶起我上番屋企。

「唔好意思….又要麻煩你…」

「得啦,我又唔係第一日知你廢。」

「你咁樣好傷我自尊…..」

「廢到講兩句就傷到你自尊。」

晴晴真係嘴裡不饒人。

「你無野我就走啦。」

「放心走啦,我係到好安全。」

「白痴,今個聖誕洗唔洗陪你?」

「都好喎。」

「到時再wts app啦」

「 okay~」

總覺得晴晴今日怪怪地。
雖然佢平時都無乜正常過。

話說原來今日無check過wts app。

小櫻︰「你今日隻腳點?」

我︰「岩岩去左敷藥」

小櫻︰「自己?」

我︰「同晴晴,上次見過」

小櫻︰「我記得佢」

小櫻︰「唔通你兩個真係拍緊拖?」

我︰「我地只係朋友!!」

小櫻︰「朋友又會咁緊張黎同你睇醫生?」

我︰「可能因為由細玩到大掛」

小櫻︰「哈哈,你好蠢」

我︰「你想話佢對我有野?」

小櫻︰「可能啦」

我︰「唔會啦,佢見過我以前果個毒樣,一定唔會中意我」

小櫻︰「咁有時女仔唔太睇樣既,不過我都想睇你以前係點既樣」

我︰「點會有人唔睇樣嫁?無得睇」

小櫻︰「起碼我唔係囉….我想睇呀」

我︰「咁如果有個暗瘡肥仔向你表白呢?」

小櫻︰「要睇下佢個人係點,如果佢真係我中意既人,我又唔介意」

我︰ 「咁你中意點既男仔?」

小櫻︰「之前好似答左你」

我︰「之前答得咁hea唔算數啦」

小櫻︰「諗諗先…」

我望住電話等小櫻覆。
有種好期待既感覺。

小櫻︰「都係唔話你知」

我︰「好想知呀!!」

小櫻︰「話你知都得,你講你中意咩女仔先」

小櫻呢個問題考起我…
我確實無乜諗過我係中意咩類型既女仔….
其實靚我就中意….
我同一般狗公都無咩分別。
仲要係毒毒地既狗公…….

我︰「答你唔到」

小櫻︰「咁就無辦法啦」

我︰「你等我諗諗…」

小櫻︰「做咩咁想知人地中意咩男仔?」

我︰「好奇」

小櫻︰「好奇害死你」

我︰「你害得死我先算啦」

小櫻︰「小心我害你一世」

但當我諗到我中意咩類型女仔既時候,
我腦海中浮現左柔柔出黎….
雖然同小櫻咁樣wts app確實有種嗶方面既曖昧感。
但我心裡仍然存在住柔柔嗎?
我應該繼續等,定向前行?
其實點解我會咁中意柔柔呢?
不輪樂瑤定係卓芝,
我都無咁大感受。

其實柔柔係一個點既女仔?
我眼中既柔柔係點?

我︰「一個女仔唔需要太造作,溫柔淡定,會為人為自己打算,會支持身邊既人,可愛,一個女仔可愛,做咩都可愛。可愛並唔係個樣可愛,係從心發出既可愛」

柔柔的確有曬呢啲優點,
但係我當初無珍惜。
好掛住佢。

小櫻︰「對唔住,係咪又令你諗番起佢?」

我︰「唔係呀」

小櫻輸入中……

好似又要小櫻安慰我….

我︰「我真係無野」

小櫻輸入中….

小櫻︰「男仔唔需要太靚仔,整潔就可以,瘦肥唔緊要,但最緊要健健康康,健康既人通常無乜陋習,中意運動,咁樣可以一齊出去玩,又健康,最好會睇動漫咁就同我有無限既話題,溫柔忍耐,我有時會唔知自己想點,所以要有耐性先可以頂到我,識用心去聆聽人,會理解人地既難處,唔會勉強人地,最好有少少孩子氣,總覺得有孩子氣既男仔好可愛。」

以小櫻咁既條件要搵到佢所講既真係唔難,
佢絕對配得上。

我︰「我會多加留意!」

小櫻︰「留意咩?」

我︰「介紹你識」

小櫻︰「咁就靠你啦」

我︰「咁我都靠你啦」

如果小櫻係我女朋友……
諗太多………………….
不過幻想下都無壞。