某天我脫毒了，走上了情聖之路: 第六十一章 - 混亂

「今年一齊半夜行年宵。」肥森係電話講。

「日頭唔行得咩？」

「年宵緊係半夜行先有feel。」

「但....但我已經約左人......」

「邊個緊要得過我！？」



「晴晴.....」

「叫埋佢囉，又唔係唔識。」

「咁我問下佢.......」

「幫我問埋小櫻。」

「下？.......但係...........」



我同小櫻當晚發生既事已經同肥森講左。

「你兩個仲有野？」

「仲有啲尷尬......」

果日之後我同小櫻少左對話，
主要係我唔知點面對......

「仲有！？連試都考埋啦喎！」



「仲有少少.....」

「妖！！！我唔理！總之你一定要叫埋佢！」

晴晴應該無問題，
但我唔知點向小櫻開口.......

我走入小櫻房，問佢肥森托我問既事。

「可以呀，無問題。」

果然小櫻好恨就答應左，
其實我都唔知自己擔心咩....



「好！午夜團到齊！」肥森振臂高呼。

「真係得你仲有精神興奮....」家樂邊打呵欠邊講。

話畢後就比肥森捉左去行刑......

見到呢個鐘數既年宵人數，都不禁讚嘆香港人係某啲時候都幾齊心。

「盡量唔好走失，盡量.......」肥森講。

「又係到講廢話。」天欣指住肥森個鼻。

「總之出發！！！」

我地走入人群中，果然無耐就開始走散。



「拖實我呀小狼，我唔想連你都無埋。」

「家樂你夠啦.......」

家樂既說話引黎周邊人奇異既目光。

「黃小狼你專心啲睇野啦。」

「如果小櫻得自己一個咁點？」

「佢咁大個人自己一個一陣都唔會有事。」

「唉！講你都唔明。」



我十分焦急。

「我真係唔明你又要唔睬人，又要咁緊張。」

「兩件事黎，佢呀爸交得低佢係我地屋，我就有責任照顧佢。」

「痴孖筋！！咁你用電話打比人啦！」

「.........」

嘟..嘟..嘟.....

「無人聽.......」

「打比其他人。」



連其他人都無人聽。
睇黎人太多聽唔到電話響。

「我地行出呢個area話唔定會見到自己人。」

有去過維園年宵都知道會條通道係無擺攤位。

我左右望仍然唔見佢地既身影。
電話響起，係晴晴既來電。

「喂！你地係邊？小櫻同你一齊？」

「係，我地係行去中央圖書館果條通道到。」

「咁就好，我同家樂一齊，你地係原地等我。」

係中央既出口附近見到小櫻同晴晴既身影。

「終於見番我既女神們啦！！」家樂打開雙手。

「你條濫友個個都話女神嫁啦。」

小櫻無出聲企埋一邊。

「做咩唔聽電話？」

「聽唔到電話響。」

「你唔見左我地係咪應該要打比我！？」

「你咁惡做咩？」

「我惡？你知唔知你咁會令人好擔心！」

「對唔住......」

「算啦......」我嘆氣。

「都唔知你咁緊張做乜......」小櫻輕聲發嘮叨。

「你講咩話！？」我提高聲線。

「.........你以後都唔好再理我！！！小狼“八格”！！！！」小櫻谷到面紅晒。

小櫻講完就轉身跑了。
晴晴追住小櫻既身影。
走前仲打左我一拳「你老味！」

「痴嫁你！？」

我從來未見過小櫻咁嬲。
但其實我又做乜呢.....？

每逢農曆新年我屋企都好忙，根本無時間同小櫻。
或許我根本唔知點開口.....

初四果日晴晴約左我出去，單獨見面。

「好心你咁大個人就咪霸住個鞦韆啦。」我同晴晴講。

「鞦韆呢個野好似無年齡限制！」晴晴反駁。

「Ok.......咁你約我黎依到做咩？」

「你唔記得依到？」

「咪我地細個一齊玩既公園。」

我望晴晴個樣，好似滿懷心事咁。

「你無野嗎？」

「呢句應該係我問你，你點要咁對小櫻？」

「..........」

「小櫻講晒比我聽....你唔覺得咁對小櫻好唔公平咩？你點解仲堅持過去既事！？」

「有啲野唔係輕易控制到。」

「咁你都唔洗咁對佢！」

「我認我果日既語氣係重左，但我真係唔識點面對佢，我仲中意柔柔，無法同小櫻一齊！我最怕有一天我會兩個都中意......」

「懦夫！！淨係識懷念過去！！」

「係！我係，但起碼我清楚知道自己中意咩！」

「你只係中意過去既柔柔！柔柔已經變左，佢唔再中意你啦！你點解要為左一個唔再中意你既女仔，去傷害愛你既人！！」

「你收聲！！！唔係佢中唔中意我，而係我中意佢既問題呀！！」

晴晴突然落下眼淚，

「你變左，黃少朗你個衰人.......」

「對唔住.....」

「我唔會再理你！」

晴晴轉身就左去。
我係原地呆望佢既身影。

有無人可以教我點做？

我拖住失去靈魂既身軀回到屋企樓下。

「男人老狗做咩頭dupdup?」

一把少女得黎又帶點粗鄙既聲線係我耳邊略過。