某天我脫毒了，走上了情聖之路: 第七十章 - 前奏曲

「你猜得贏我就話你知點解！！」

估唔到身為東區拳王既我.....
竟然連中一妹妹都猜唔贏.......
仲要唔只一次....

唔通連個天都唔想我知嵐嵐既秘密！？

「小狼小狼小狼！！！！！！！」家樂向我迎面跑過黎。



「又點.....？」

「我收到風學生會好似話會搞聯校ball....我地脫毒既機會黎啦！！！」

聽落幾吸引，但好地地搞咩聯校ball？

「我都唔太好呢類活動，你搵其他人陪你去.....」

「小狼...你知嗎？...你係最好，只要我同你一齊就有女溝.....」



「繼續吹.....」

咪住....
句野好似有啲問題.......

「仆街！！！你自己去！！！」

「黃小狼，你陪佢去啦，佢已經煩左成朝......」肥森抱怨。

「大佬！！！！！！」家樂捉住我手臂。



「好啦........」

學生會係早會已經宣布聯校ball既事。

全校男仔表現十分興奮。

Lunch期間家樂就捉左我去報名....
離開學生會，咁岩係走廊遇到嵐嵐。

「毒撚報名脫毒？」嵐嵐望住我奸笑。

「我陪fd報...」

「實係啦，點睇都係你有需要多過你個fd喎。」



家樂偷笑左聲。

「咁你又係到做咩呀！？」

「路過~」

「你個理由好充分喎.....」

嵐嵐突然走過黎拍拍我膊頭。

「如果你想脫毒呢....就....大方啲啦。」

嵐嵐講完就轉身跑。



「黎若嵐！！！！！！」

家樂企係我隔離出力咁笑。

「個女仔好得喎.....把口......邊個黎嫁？」

「佢咪就係住我樓上果個女仔囉！」

「溝左佢啦，堅正喎.....把口.....哈哈哈，」

「你咁中意咪溝左佢，我都開始嫌佢煩。」

「小狼.....」家樂拍拍我膊頭...「我唔係你......」

「你條磨碌！！！！」



活動宣佈後果然好多人對此議論紛紛。

兩星期後既舞會，
有種期待既感覺........

「星期六有無興趣去裝身？」家樂問我。

「裝身？」

「你唔係諗住就咁件tee加對波鞋就算？」家樂好認真咁禁住我張枱。

「好好....你冷靜啲..........」

估唔到家樂會咁認.....


老實講我都係志在陪下佢....
唔通我咁既尊容真係會溝到女咩....

星期六當日，
家樂帶左我去尖沙嘴一間tailor made既舖頭。

「呢到好似好貴喎.....」我卻步。

「放心，門面雖輝煌，但都平民價格。」

「樂仔！」舖頭內既裁縫師傅同家樂打招呼。

「廖師傅！！」家樂向佢回招。

家樂睇落似係熟客。

「咁快又黎整恤衫？」廖師傅問家樂。

「係呀，不過今次主要帶朋友黎整番套比較上 causal既suit。」

聽起黎家樂真係成日幫襯。
唔怪得佢件件恤都咁特啦。

廖師傅招手叫我去度身。

「先生點稱呼？」廖師傅問我。

「姓黃，叫少朗。」

「個名好好聽....黃生你身形好靚.....」

「多......多謝.....」

廖師傅好似好沉醉為我度身咁....
佢係敬業樂業定係.......

「搞點！你地過兩日黎拎啦，張單比你爸爸？」

「係呀，唔該廖師傅。」

離開店舖後，
我同家樂坐低左食野。

「其實你屋企人係做咩？」我問家樂。

「生意囉~」

我同家樂雖然一讀中學就認識，
但佢好少講有關佢既事，
永遠一臉嘻皮既樣子。

「小狼.....」家樂搭住我膊頭。

「又想點.......」

本來想推開佢，
但望見佢相當認真既眼神.....

「無論我做咩、講咩，都好少會好認真....」

家樂絕少會認真講野。

「做咩.....？」

唔通有cancer?

「你仲中意阮芯柔嗎？」

「下...做咩突然咁問？」

「答我。」

家樂眼神相堅定。

「唔知.....仲有未放低既感覺。」

「最近有無覺得佢同某啲入好似？」

「咁又無喎........」

家樂鬆一口氣。

「到你答我.....」

「因為我係基。」

「=_=」

「哈，我只係擔心你會張阮芯柔既身影投射左去你果個同座女仔到。」

「你放心！一定唔會！佢同柔柔完全係兩類人黎，點夾硬黎都投射唔到。」

「咁你可以考慮下係佢身影重新開始，中一控。」家樂奸笑。

「無可能！！！揀佢同揀男人根本無分別！！」

試問呢個世上有咩人可以與柔柔相比！？

但聯校舞會確實有點令人期待。




「我又要去！！！！！！！！！」嵐嵐肉緊地捉住我。

星期一番學既時候我將我去舞會既去講左比佢聽。

「帶埋我去！！！！！！！」

「你同你屋企人啦，你同我講擺屁咩！！！」

點解呢條女隻手甩極都甩唔開嫁！！！？

「你中一控似乎嚴重左喎。」

家樂從出現。

「無呀，黎若嵐放開我呀！！！！！」

「我又要去呀！！！」

世上有種人明明好煩，
但你從唔會想出自真心地趕走佢......