某天我脫毒了，走上了情聖之路: 第八十章 - 時間總係偷偷的離去
將嵐嵐送左上床之後，
我出番去食野。
見佢一路都未醒，
我就入左房打機，
因怕嘈到佢，我就帶住耳筒打。
打左無耐我就發覺有人係我後面。
應該又係嵐嵐想用啲低B手法黎嚇我。
果然真係….
為左配合佢，我都大叫埋一份，
正所謂臨時演員都係演員。
見到佢滿足既臉容，
睇黎佢應該無晒野。
「醒啦?」我問。
佢無答我，淨係呆左係到。
餓得制?
「係咪肚餓?」小狼企左起身望住我雙眼。
佢都係無反應。
「喂~」我篤篤佢前額。
醒啦仆街。
「我….我…..」嵐嵐欲言又止。
「我唔洗你可憐我!」佢突然爆發。
我呆撚左。
然後佢就跑左出去。
我隨其後。
「嵐嵐!」我捉住佢隻手。
「你放手! 你唔好可憐我! 」嵐嵐十分激動。
做咩事?
係咪太內疚自己講左出黎?
「我邊有可憐你?」
發生咩事?
嵐嵐轉身就跑出門外，連鞋都唔記得著。
我追住佢，想叫佢著番鞋。
跑到去後樓梯，佢喝止我。
「你唔好再跟住我!」
「你做咩? 我都係關心你。」
我做錯啲咩? 你要連鞋都唔著就走?
「我唔要呀!」嵐嵐再怒吼。
佢講完就繼續跑。
我屌，你訓完之後鬼上身!?
「黎若嵐你同我企係到!」我開始燥。
嵐嵐真係比我喝停左。
頂你唔惡啲都唔得。
「去著番對鞋先啦。」我行到去佢身後。
轉身望住我。
我踎低示意想孭佢。
「上黎啦，再行既話，對襪就污糟晒。」
嵐嵐乖乖咁走左上我背脊。
係咪岩岩太惡呢?
番入屋之後，佢著對鞋，拎番自己既行裝就走左。
我思前想後，究竟嵐嵐發生咩事?
突然一反常態。
係咪因為我擅自攬住左佢呢?
自果日起，
嵐嵐無再係我每朝清晨出現。
Wts app同電話都無再回應，
即使係學校見到，佢都刻意避開我。
無佢世界變得好寧…….錯! 係死寂。
曾經我有幾多次想一腳伸開佢?
無人再刻意整炆我、撩交嗌。
一切變得好唔習慣。
原來失去左先知重要，
突然既失去令我感覺到，原來每朝可以見到佢既笑容係幾咁美好。
我每日既小息、lunch同一啲堂與堂既接駁位，
我都會偷望嵐嵐果層，希望搵到一個答案，
比一個讓失去呢份友情既原因。
「得個望字係唔會有結果。」肥森拍拍我膊。
佢應該誤會左啲野。
不過佢都講得岩，
可惜我無勇氣落去搵佢….
以嵐嵐剛烈既性格，應該會當場鬧走我又或者自己跑左去….
「唔啦，等佢下左啖氣先。」
「咁你慢慢等，等到無左為止。」
唔通我可以點?
不過最近真係無咩點撞到嵐嵐。
最後我忍唔住lunch去左搵柔柔。
「唔該，我想搵阮芯柔。」我問一位女同學。
「柔柔? 佢請左半日假岩岩走左lu~」
「哦….好唔該。」
又會咁突然，唔通柔柔病左?
等我wts app下佢。
我︰{病左? }
柔柔︰{唔係呀}
我︰{有野做? }
柔柔︰{嗯}
柔柔︰{你有野搵我? }
我︰{係，岩岩諗住搵你問有關嵐嵐既野，但你朋友話你早退左}
柔柔︰{………}
我︰{做咩? }
柔柔︰{睇黎佢真係無話你知…..}
我︰{咩…..咩事? }
柔柔︰{我今日請假係因為我今日送嵐嵐機}
呢個wts app令我好錯愕。
我︰{送…..送機? 去邊? }
柔柔︰{讀書}
我呢下真係突晒然。
我︰{咁突然? 無聽佢提過既? }
柔柔︰{其實佢屋企一直都有問佢，佢一路都無回應，但佢突然又下左決定，我以為佢會同你講}
我︰{佢完全無提起過任何有關去外國讀書既事}
柔柔︰{佢唔提可能因為佢想一直番係香港掛}
我︰{咁佢幾點機?}
柔柔︰{6點}
我︰{6點? 咁我要幾點黎到機場?}
柔柔︰{最遲都4點半掛。}
下!? 我3點45先放學，一定趕唔切。
除非我早走嫁姐…..
但中學生邊有咁易可以早走到…..
而家3點，我即刻走一定趕得切，
問題係我用咩藉口….
係情急低下….
「肥森! 幫我!」
「下?」
「啹……………..」
「Miss Chan!! 小狼嘔呀!!」肥森神反應。
我無法低下我決定扣喉扮嘔。
「森，你帶佢去洗間先。」Miss Chan叫肥森。
「你搞咩?」肥森係廁所問。
「幫我，話我好嚴重帶我去校務處，我要早遲。」
「唔知你咩事，放心，我帶你去校務處，再幫你執野。」
「忍住!!!」
肥森講完呢兩番話就對我腹部重擊。
「啊!」我嘔多左兩滴野出黎。
「咁應該呃到校務處班傻西。」
「都唔洗咁重手…」
「鬼叫你無演員修養。」
一出校門我就急急腳截的士。
「唔該司機，機場呀。」
「學生哥，呢到好機場好遠wor。」
我望望自己銀包….
發覺真係唔多夠錢….
「對唔住呀….可唔可以車我去最近既巴士站?」我尷尬地同司機講。
「哈哈，你係咪好趕時間?」
唔趕就唔會搭的士啦….
「係…..」
「不如我車你西環A12巴士站，之後你再轉A12，A12係西環過機場好快。」
「多謝司機大佬!!!!」
「唔洗客氣，係呢，趕飛機去旅行?」司機邊開車邊問。
「唔係呀，去送人機。」
「連學到唔番要送人地，送女朋友?」
「唔係啦，送frd姐。」
「哈哈，咁你肯定溝緊人啦。」
「唔係啦，只係一個好緊要既朋友黎。」
「咁呢個朋友睇黎緊要到離晒譜wor。」
「係掛。」
係囉? 嵐嵐幾時變得咁重要?
可惜巴士不似預期….
我等好耐架巴士都未黎…
但時間一秒一秒咁過去….
抵達機場既一刻，
我已經心知不妙….